နေဗျဳဒဝ် ၊ အံက်တဝ်ပါ ၁၄
နူကဵုပေါဲရုဲမာဲဒပ်ပၞာန်သီအဝဵု ဒက်ပတန်ပြံၚ်လှာဲအာ ဗီုပြၚ်အလဵုအသဳ ကောန်အရာပ်ညးဍုၚ်ကွာန်တုဲ ကြပ်ပေၚ် ၆ ဂိတု ဏံ ညးတာလျိုၚ်အဆံၚ်ကၟိန်ဍုၚ် ဝန်ဇၞော်ကဵုဒုဝန်ဇၞော်တံ သွက်ညးတာလျိုၚ် လပါ်ကောန်အရာပ် လပါ်ပၞာန်တံဂှ် အလဵုအသဳပၞာန် ကၠောန်အာအပြံၚ်အလှာဲရ။
ပ္ဍဲဂိတုသိပ်တေမ်ပါ ၁၇ တေံ သ္ကိုပ်ကောပ်ကာဲပ္ညဳပ္ညပ် တိုက်၊ ဍာ်၊ ကျာ သ္ကိုပ်ပၞာန်ဇၞော် ကိုကိုဥူဂှ် ခါန်ကၞက်ကဵုအာတာလျိုၚ် ဝန်ဇၞော်ကေၚ်ကာအပ္ဍဲဍုၚ်တုဲ ဗွဲကြဴဏံ စပ်ကဵုညးတာလျိုၚ် လပါ်ကောန်အရာပ် လပါ်ပၞာန်တံဂှ် အမိၚ်နူကဵုရုၚ်သမ္မတ တိတ်ကၠုၚ်မံၚ် အဆက်က်ရောၚ်။
တုဲပၠန် အပ္ဍဲဒပ်ပၞာန်ပရေၚ်အပြံၚ်လှာဲ သ္ကိုပ်ကောပ်ကာဲပ္ညဳပ္ညပ် တိုက်၊ ဍာ်၊ ကျာကီု သ္ကိုပ်ရးဌာန်ပၞာန်ကီု သ္ကိုပ်ၝောံဒပ်လ္ၚဵု၊ စပ်ကဵု ညးတာလျိုၚ် အဆံၚ်ပၞာန်ဇၞော်ဇၞော်တံ ကၠောန်လဝ်ရောၚ် ဂွံတီနူကဵု ပွဳဗွိုၚ်ကောန်ဒပ် CDM တံရ။
အတိုၚ်အမိၚ်နူကဵုရုၚ်သမ္မတ ပတိတ်လဝ်ဂှ်မ္ဂး ဝန်ဇၞော်ပရေၚ်ထတ်ယုက် ဒံက်တာတိတ်ခိုၚ်ဝေၚ်၊ ဒုဝန်ဇၞော် ဒံက်တာအေထောန်၊ ဒုဝန်ဇၞော်ပရေၚ်ပညာ ဒံက်တာဇြဝ်မျေအ်၊ ဒုဥက္ကဌ ဗာန်ဗဟဵု ဥူဇြဝ်မျေအ်နိုင်တံဂှ် ကဵုဒေါံဇူလဝ် နူကဵုတာလျိုၚ်ရ။
ဟိုတ်ဂှ်ရ ပ္ဍဲကဵုဒၞာဲဝန်ဇၞော်ပရေၚ်ထတ်ယုက်ဂှ် ခါန်ကၞက်စုတ် ဒံက်တာသိုဝ်ဝေၚ် ဌာနဝန်ဇၞော်ဟံၚ်ပြာ်တုဲ ဒုဝန်ဇၞော် ပရေၚ်ထတ်ယုက်၊ ပရေၚ်ပညာ၊ သၟာကမၠောန်၊ ညးဗြဴကေုာံ ပရေၚ်ဝေၚ်ဇြဟတ်တံဂှ် ထပက်စုတ်အဇာ ခါန်ကၞက်လဝ်ရ။
ဒုဝန်ဇၞော် ၂ တၠ နူကဵုဌာနဝန်ဇၞော် ပရေၚ်ဘဏ္ဍာအကံက်ခေါန်၊ ဌာနဝန်ဇၞော် ဆက်စၠောံပရေၚ်ပိုန်ဒြပ် ဍုၚ်သအာၚ် ကေုာံ ပရေၚ်ဓလိုက်တမ်ရိုဟ် ကိုန်အစဳဇန်ကောန်ဂကူတံဂှ်လေဝ် ပြံၚ်လှာဲလဝ်တုဲ ဒုဝန်ဇၞော် ပရေၚ်ဝေၚ်ဇြဟတ်ကဵု ညးလုပ်ဂကောံ ဝန်ကၟိန်ဍုၚ်မွဲတၠတံလေဝ် ပြံၚ်လှာဲစိုပ်အာဒၞာဲ ဂကောံကဝ်မယှေန် အခေါင်အရာမၞိဟ် ကောန်ဂကူဍုၚ်ဗမာရ။
တုဲပၠန် ဂကောံအလဵုအသဳသဂိုၚ် ဝန်ဇၞော်ပရေၚ်ဗဂဵုလဟဵု သာယာဂှ်လေဝ် ထပက်စုတ်အဇာခါန်ကၞက်လဝ်တုဲ ဒၞာဲတာလျိုၚ် ဂကောံကံၚ်သဳနေဗျဳဒဝ် ကဵု ဂကောံဝန်ဇၞော်ကၟိန်ဍုၚ်ဂှ်လေဝ် ပြံၚ်လှာဲကဵုအာတာလျိုၚ်ကု ဒုဝန်ဇၞော် ၂ တၠ သၟာကမၠောန်ကဵု ပရေၚ်ကေၚ်ကာ ညးဗြဴတံရ။
သ္ကိုပ်နာဲဗစာ စၠတ်ထဝ်သၞောဝ်ဓဝ်ကၟိန်ဍုၚ် ၂ တၠကီု နာဲဗစာ နူကဵုရုၚ်သၞောဝ်ဓဝ် တွဵုရးသေံ မွဲတၠတံဂှ်လေဝ် ထပက်အဇာ ခါန်ကၞက်လဝ်တုဲ သမ္မတ ခါန်ကၞက်ကေတ်တ် ဥူမေန်အံၚ်လှိုၚ် ထပက်စၟတ်တဲတုဲ နူကဵုရုၚ်သမ္မတ လလောၚ်ပတိတ်လဝ်အမိၚ် မဒှ်ရ။
မွဲလပါ်တေံပၠန် ဒၞာဲတာလျိုၚ် ဝန်ဇၞော်ပရေၚ်စဵုဒၞာ သ္ကိုပ်ပၞာန်ဇၞော် ထောန်အံၚ်ဂှ် သွက်ဂွံထပက်ပၠုပ်အဇာ ဒုသ္ကိုပ်ပၞာန်ဇၞော် ယာပျေအ် ကီု ဝန်ဇၞော်ဌာနဟံၚ်ပြာ်ဂှ် သွက်ဂွံခါန်ကၞက်သ္ပအာဒတန် ဒံက်တာကိုကိုလွေၚ်တံမာန် နူကဵုသမ္မတ ပတိုန်လဝ်စရၚ် ကုဇရေၚ် နာယက စၠတ်ထဝ်ကၟိန်ဍုၚ်ရ။
စပ်ကဵုအလဵုအသဳပၞာန် ထမံက်မံၚ်ရုပ်ရဴ ပရေၚ်ၜိုတ်လလမ်တံဂှ် စိုပ်အာဒၞာဲမွဲမွဲ ဒှ်မာန်တုဲ သွက်ဂွံကောပ်ကာဲထိၚ်ကြာပ်အာ ဂဥုပ်ဒပ်ဂှ် ထပက်ဏာအဇာ ဝန်ဇၞော်ပရေၚ်စဵုဒၞာရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“ယာပျေအ် အာလဝ်က္ဍိုပ် ဂကောံ NSPNC အံၚ်ဇၞးအာ၊ ဗီုပြၚ်ဍေံတံမိက်ဂွံဂွံ စိုပ်အာမွဲအဆံၚ်ယျ တော်ဆဂွံဏောၚ်။ ဟိုတ်ဂှ်တုဲ နကဵုမၞိဟ်အရန် စွံလဝ်ဒုသ္ကိုပ်ပၞာန်ဇၞော်ယာပျေအ်ဂှ် ခါန်ကၞက်စုတ်အာ ဝန်ဇၞော်ပရေၚ်စဵုဒၞာ။ တုဲပၠန် ဟီုမွဲနဲပၠန် ဒုသ္ကိုပ်ပၞာန်ဇၞော်ယာပျေအ် ဒှ်သဳဏဳယာဂၠိုၚ်နူကဵု ဂဥုပ်ဒပ်ယေဝ်ဝေၚ်ဥူဂှ် ကဵုကၠောန်ဝန်ဇၞော်ပရေၚ်စဵုဒၞာတုဲ ဗီုပြၚ်သွက်ဂွံထိၚ်အာ ဂဥုပ်ဒပ်ဏောၚ် အဲညာတ်ရ” သာ်ဝွံ သ္ဂးရ။
ညးဒးဒုၚ်ပတိုန်ပၠုပ်စရၚ် ဝန်ဇၞော်ပရေၚ်စဵုဒၞာ ဒုသ္ကိုပ်ပၞာန်ဇၞော် ယာပျေအ်ဝွံ စှ်ေလဝ်နူကဵုဘာတက္ကသဵုပၞာန် လၟေၚ် ၂၂ တုဲ အခိၚ်သဳအဝဵုဂှ် ကေတ်လဝ်တာလျိုၚ် ပူဂဵုညးကဵုကသပ် ဆေၚ်စပ်ကဵုပရေၚ်ဂီုကၠီု ကောန်ဂကူကီု ကေၚ်ယိုက်ဂၠေၚ်လဝ်တာလျိုၚ် ဝန်ဇၞော်ဂကောံအလဵုအသဳကၟိန်ဍုၚ်၊ ဝန်ဇၞော်ပရေၚ်ကေၚ်ကာ အပ္ဍဲဍုၚ်ကေုာံ ဝန်ဇၞော်ပရေၚ်ဒေသပယျဵုတံရ။
ပြဟ်ဟ်ဏံဝွံ ညးကေတ်မံၚ်တာလျိုၚ် ညးအုပ်ကာကမ္မတဳဗဟဵု ပရေၚ်ထမံက်ရုပ်ရဴၜိုဟ်လလမ်ကေုာံ ညဳသၟဟ်ကောန်ဂကူကီု ပ္ဍဲကဵု NSPNC ဂှ် နဒဒှ် ဥက္ကဌ၊ ပ္ဍဲကဵုကမ္မတဳပရေၚ်ကမၠောန်ဂှ် ကေတ်လဝ်တာလျိုၚ် ဒုဥက္ကဌ ကီုရ။
အပ္ဍဲကိုန်အစဳဇန် အလဵုအသဳပၞာန် ပွိုၚ် ၁၀၀ ကော်ဘိက် ပရေၚ်ၜိုဟ်လလမ် တက်ကျာဒစးဒုၚ်ဟွံမွဲတံကီု ရဲဂကောံ EAO ဟွံပန်ကဵုဒပ်ပၞာန်ဗမာတံကီု ဂကောံပန်မံၚ်ကဵုဒပ်ပၞာန်ဗမာ ဒပ်ကိုဝ်ကကဵု တအာၚ်တံဂှ်လဝ် ညးကော်ဗစိုပ်နၚ် ဝိုၚ်ခုၚ် တက်ကျာတုဲ သဳကၠဳမာန်လဝ် မဒှ်ရ။
အတိုၚ်ရဲဗွိုၚ်ဒပ် CDM တံဟီုဂှ်မ္ဂး အပ္ဍဲကဵုကၠောန်လဝ် အပြံၚ်လှာဲ ညးတာလျိုၚ် အဆံၚ်သၠုၚ်လပါ်ပၞာန်တံတုဲ ဂဥုပ်ညးတာလျိုၚ် ပရေၚ်ဂီုကၠီုပၞာန် သ္ကိုပ်ပၞာန်တာန်ထိုက်ဂှ် ပြံၚ်လှာဲခါန်ကၞက်လဝ် သ္ကိုပ်ကောပ်ကာဲပ္ညဳပ္ညပ် ဒပ်ပၞာန်ဂှ်ရောၚ်။
သွက်ဒၞာဲ ဂဥုပ်ညးတာလျိုၚ်ပရေၚ်ဂီုကၠီုပၞာန်ဂှ် ခါန်ကၞက်လဝ် ညးတာလျိုၚ် ခန်လ္ၚတ်ပၞာန် ပျေအ်ဇြုၚ်လေန်၊ ဒၞာဲအဇာ ညးတာလျိုၚ် ခန်လ္ၚတ်ပၞာန်ဂှ် ခါန်ကၞက်လဝ် သ္ကိုပ်ဌာန်ပၞာန် ရးလ္ဂုၚ် သ္ကိုပ်ပၞာန်တၟေၚ် မေန်လာတ် မဒှ်ကီုရ။
တုဲပၠန် သ္ကိုပ်ဌာန်ပၞာန်ရးအဒေါဝ် ဒုသ္ကိုပ်ပၞာန် အံၚ်ဌေဂှ် ပြံၚ်လှာဲကဵု အာတာလျိုၚ် သ္ကိုပ်ဌာန်ပၞာန်ရးလ္ဂုၚ်တုဲ ဂအုပ်ဘာတက္ကသိုလ်ပၞာန် ဒုသ္ကိုပ်ပၞာန် အံၚ်ကိုနိုၚ်ဂှ် ထပက်စုတ်အဇာ သ္ကိုပ်ဌာန်ပၞာန် ရးအဒေါဝ်ရ။
သ္ကိုပ်ဌာန်ပၞာန်ရးဗၟံက်ဂှ် ပြံၚ်လှာဲလဝ် သ္ကိုပ်ဌာန်ပၞာန် ရးတြိဂံတုဲ သ္ကိုပ်ဌာန်ရးပၞာန် နူကဵုဒၞာဲဏံဂှ် ညးတာလျိုၚ် သ္ကိုပ်ပရေၚ်လဝေၚ်ပၞာန် လၟိဟ်(၂)၊ သ္ကိုပ်ၝောံဒပ် ၅၅ ဂှ် ပြံၚ်လှာဲကဵုအာတာလျိုၚ် ဂအုပ်ဘာ တက္ကသိုလ်ပၞာန် မဒှ်ရ။
ပရေၚ်အပြံၚ်လှာဲ ကၠောန်လဝ်ဗီုတံဏံဂှ်တှ်ေ ညးပတိတ်ကဵုလဝ်ပရဲ သွက်ပရေၚ်ပၞာန်တံဂှ် သၠုၚ်အဆံၚ်ကဵုအာတာလျိုၚ်တုဲ မၞိဟ်ပတေဟ်ညးဂှ်ရ သမ္မတခါန်ကၞက်ကေတ်တ် ဥူမေန်အံၚ်လှိုၚ် တံၚ်ဂြဲပတိုန်ဏာ မွဲအဆံၚ်တုဲမွဲအဆံၚ်ရဂှ် ဗိုလ်ဇၞော် CDM ဇြေန်ယဝ် ဟီုလဝ်ရ။
ပရိုၚ်-သြၚ်လောန်တိုၚ်မ်
Photo – Social Media