ကြုၚ်ဒဵု၊ အံက်တဝ်ပါ ၁၅
အပ္ဍဲတွဵုရးကရေၚ် ကွာန်နွံမံၚ်ကရပ်ပွဳဗွိုၚ် ဍုၚ်ကြုၚ်ဒဵုတံဂှ် ထၜးဟိုတ် ဂကောံဇြဟတ်ပၠန်ဂတးတံ ချဳဒရာၚ်အာကၠုၚ်မံၚ်ဂးတုဲ ဒပ်ပၞာန်ဗမာတံ ပန်မံၚ်လွဟ်ဇၞော်ဆက်က်ရဂှ် တမ်ရိုဟ်ကၞက်ပရိုၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲ ဍုၚ်ကြုၚ်ဒဵု၊ ဍုၚ်ကအ်ကြိက် အကြာမွဲဒမြိပ်ဂၠံၚ် ကြုၚ်ဒဵုကဵု ကအ်ကြိက်တံ ဒပ်ပၞာန်ဗမာ ကလေၚ်ထိၚ်ချုက်ဂွံအာတုဲ အကြာမွဲဒမြိပ်ဂၠံၚ်ကဵု ကရပ်ပွဳဗွိုၚ်ဍုၚ် ဒၞာဲဂိက်သၞေဟ်ကၚ် ဖျေံလဝ်ဗဒိုပ်ပၞာန်တံဂှ် ထၜးဟိုတ်ပရေၚ်ဂီုကၠီု ဗက်စၟဳစၟတ်မံၚ်ညးဍုၚ်ကွာန်တံ တေၚ်ၚ်ဂြတ်တ်ရောၚ်။
အပ္ဍဲအံက်တဝ်ပါ ၁၂ အခိၚ်ဗတမ်ကွာန်ဂြိုပ်ကြုက်ဂှ် နူကဵုတမ်ဒပ်ပၞာန်ဗမာ ဖျေံသ္ဇိုၚ်ဍုၚ်ကြုၚ်ဒဵု ထဍိုၚ်ပန်နၚ်လွဟ်ဇၞော် ဒတုံစှ်ေ လ္တူသ္ၚိအပ္ဍဲကွာန်မွဲမ ခတိုဟ်အာတုဲ ကောန်ၚာ်မွဲတၠကဵု ညးအာယုက်ဇၞော်ဇၞော်မွဲတၠ ဒးအာလဝ်ဝပ်ဂှ် တမ်ရိုဟ်ကၞက်ပရိုၚ်ဒေသတံ သ္ဂးရ။
လ္တူဍုၚ်ကြုၚ်ဒဵုဝွံ တမ်ဒပ်ပၞာန်ဗမာ ခမရ ၅၄၅၊ ၅၄၆ ရုၚ်ဗျူဟာပၞာန်တံ ဖျေံလဝ်သ္ဇိုၚ်တုဲ ပန်မံၚ်ကဵုလွဟ်ဇၞော် အကြာကွာန်နွံမံၚ် ကရပ်ပွဳဗွိုၚ်ဍုၚ်ကြုၚ်ဒဵုတံ မွဲဏှမွဲဏှရောၚ်။
ဂကောံဇြဟတ်ပၠန်ဂတးတံ ထပ်ကလေၚ်လုပ်ကၠုၚ်ဗတိုက် ဍုၚ်ကြုၚ်ဒဵုမွဲဝါပၠန်ဂှ် နူကဵုဒပ်ပၞာန်ဗမာ ဟွံမွဲပၟိက်တုဲ အကြာကွာန် နွံမံၚ်ကရပ်ပွဳဗွိုၚ်ဍုၚ်တံကီု ဂကောံပၠန်ဂတးတံလုပ်ချဳဒရာၚ်မ္ဂး ပန်အာကဵုလွဟ်ဇၞော်ရောၚ် ရဲထံက်ဂလာန်ပၞာန်တံ ဘပဠမံၚ်ရ။
ဒပ်ပၞာန်သီအဝဵုတံဂှ် ဆၜိုတ် ဍုၚ်ကြုၚ်ဒဵုကဵု ဍုၚ်ကအ်ကြိက် အကြာမွဲဒမြိပ်ဂၠံၚ် ကြုၚ်ဒဵုကဵု ကအ်ကြိက်တံဂှ်ဟေၚ် ကလေၚ်ထိၚ်ချုက်ဂွံလဝ်တုဲ ကွာန်ဗွဲမဂၠိုၚ်တံဂှ် ထိၚ်ချုက်လဝ် ဟွံမာန်ဏီ၊ ဂကောံဇြဟတ်ပၠန်ဂတးတံဟေၚ် ဆက်ထိၚ်ချုက်ဂွံလဝ် မဒှ်ရ။
ပ္ဍဲဒေသကရပ်ပွဳဗွိုၚ် ပွိုၚ်ဍုၚ်ကြုၚ်ဒဵုဂှ် ဒှ်ဒေသ KNU မဟာဒပ် ၆ ထိၚ်ချုက်လဝ်တုဲ ဂကောံမန်ရပ်လွဟ်တံလေဝ် ထိၚ်ချုက်လဝ်ကီုရ။
အခိၚ်လၟုဟ်ဏံ အကြာဒေသကရပ်ပွဳဗွိုၚ် ဍုၚ်ကြုၚ်ဒဵုဂှ် ကရောၚ်ပၞာန်ဒပ်ပၞာန်ဗမာတံ ပရေၚ်ချဳဒရာၚ်ဟွံမွဲကီုလေဝ် လပါ်သ္ကုတ်သၟဝ်ကျာ ဒေသကအ်ကြိက်ဂှ်တှ်ေ ကရောၚ်ပၞာန်ဗမာ ချဳဒရာၚ်မံၚ်တုဲ ဒှ်မံၚ်ပေါဲဗတိုက်ကဵု KNU မဟာဒပ် ၇ ဇၞော်ကဵု ဇြဟတ်ရ။
ပရိုၚ်-သြၚ်လောန်တိုၚ်မ်
Photo – Social Media