မတ်မလီု၊ အံက်တဝ်ပါ ၁၅
အပ္ဍဲတွဵုရးမန် နူကဵုဒပ်ပၞာန်ဗမာ ပံက်ကၠုၚ်လဝ် ဘာတန်ဗတောန်ယိုက်ဝန်ပၞာန် ညးဍုၚ်ကွာန် နူကဵုလၟေၚ် ၁ စိုပ် ၂၉ ဏံ ပကောံဂွံလဝ် သၟတ် သွက်ယိုက်ဝန်ပၞာန်ပေၚ်အာ ၆၀၀၀ ပြၚ်ယျဂှ် အတိုၚ်ဌာန်ပရိုၚ်သြၚ်လောန်တိုၚ်မ် ပကောံဂွံလဝ်တၚ်နၚ်တံဂှ် ဂွံတီရ။
အလုံဍုၚ်မွဲ ဟိုတ်နူပၞာန်ပၠန်ဂတးတံတုဲ ဇြဟတ်ဒပ်ပၞာန်ဗမာဆောံလေၚ်အာဂှ်ရ ဒပ်ပၞာန်သီအဝဵု ထပၠုပ်ထောံလမျီုဥပဒေ ယိုက်ဝန်ပၞာန်ညးဍုၚ်ကွာန် ဂိတုဖေဖဝ်ဝါရဳ သၞာံ ၂၀၂၄ တေံရ။
ထပၠုပ်ကၠုၚ်လမျီုဥပဒေယိုက်ဝန်ပၞာန်တုဲ ဗွဲကြဴဏံ ပ္ဍဲကဵုတွဵုရးမန်ဂှ် ဒပ်ပၞာန်ဗမာတံ ပံက်ဘာတန်ဗတောန် ယိုက်ဝန်ပၞာန် လၟေၚ်ဂိတုတံတုဲ စိုပ်ဂိတုအံက်တဝ် ၁၁ ဏံ ပံက်လဝ်ဘာယိုက်ဝန်ပၞာန်လၟေၚ် ၂၉ မဒှ်ရ။
သွက်ဘာယိုက်ဝန်ပၞာန်လၟေၚ် ၂၉ ဏံ ပကောံဂွံဏာ သၟတ်ဒေသတံ ၂၁၅ တၠဂှ်တှ်ေ ဗွဲမဂၠိုၚ်မ္ဂး ဒးဒုၚ်တံၚ်ရပ်ဏာလဝ်ပဝ်တာ အတေၚ်အဓ္ဓမတံ မဒှ်ရ။
အတိုၚ်ဌာန်ပရိုၚ် သြၚ်လောန်တိုၚ်မ် ပကောံဂွံလဝ်တၚ်နၚ်တံဟီုမ္ဂး သွက်ဂွံတိုန်ဘာပၞာန် မွဲမွဲအလန်ဂှ် ဒပ်ပၞာန်ဗမာတံ ဒးပကောံကေတ်လဝ်သၟတ်တံ ဟွံအောန်နူကဵု ၂၀၀ တၠရ။
သွက်ယိုက်ဝန်ပၞာန် သၟတ်ဗွဲမဂၠိုၚ် ဒးဒုၚ်ပကောံဏာလဝ်ဂှ်တှ်ေ အခိၚ်အာကမၠောန် စဴကၠုၚ်နူကမၠောန်တံကီု၊ ရဲတိတ်မ္ၚးအခိၚ်ဗတမ်ကီု၊ ထၜးဟိုတ် ပရေၚ်ဖံက်ပကဝ်အမိၚ်ဒေသန္တရ ဂးတုဲ ရပ်ဏာလဝ်၊ သီုဗက်ထဍေၚ်ရပ်ကေတ်လဝ် အပ္ဍဲသ္ၚိတံလေဝ် ပါမံၚ်ကီုရ။
ဟိုတ်နူဒပ်ပၞာန်ဗမာ ဒးဗက်ပကောံကေတ်မံၚ် ကောန်ပၞာန်တၟိ သွက်လၟေၚ်ဂိတုတံဒှ်မံၚ်တုဲ သၟတ်အပ္ဍဲဒေသဗွဲမဂၠိုၚ် ဂြိပ်တိတ်အာ ဍုၚ်မ္ၚးဆက်က်နွံမံၚ်ဂှ်ရ အပ္ဍဲဒေသ ဒှ်မံၚ်ပရေၚ်အခက်အခုဲ သၟာကမၠောန်တံ ဂၠိုၚ်တိုန်ကၠုၚ်ရ။
ပရိုၚ်-သြၚ်လောန်တိုၚ်မ်
Photo – MOI