ၜဳကလေၚ် ၊ အံက်တဝ်ပါ ၁၅
အပ္ဍဲတွဵုရးမန် ဟိုတ်နူသူပါအေလ်နဳညို ကတဵုဒှ်ဇၞော်ကဵုဇြဟတ်ဂှ် အသိၚ်ဓါတ်ဂမ္တဴလုပ် ဒှ် Heat Stroke တုဲ မၞိဟ်ချိုတ်အာ ၅ တၠရဂှ် ညးဒေသတံကဵု ဂကောံရီုဗၚ်ဟံၚ်ပြာ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူအံက်တဝ်ပါ ၁ ဒဵုကဵု ၁၄ အကြာပွိုၚ်ၜါသတ္တဟဏံ ဟိုတ်နူ သူပါအေလ်နဳညို ကတဵုဒှ် အသိၚ်ဓါတ်ဂမ္တဴလုပ် ဒှ် Heat Stroke တုဲ ပ္ဍဲပွိုၚ်ဍုၚ်ၜဳကလေၚ် ၄ တၠ၊ ပွိုၚ်ဍုၚ်သဓီု ၁ တၠ မၞိဟ်ချိုတ် အာလဝ်နွံရ။
အခိၚ်တ္ၚဲကာတ်တ်ဒေါဝ်တ္ၚဲဂှ် ရဲသုၚ်အရက်တံကီု ရဲအဟိန်ကွာ်မံၚ် လ္တူဂၠံၚ်ဂမ္တဴလုပ် ဒှ် Heat Stroke တုဲ လောတ်စှ်ေအာတံ ပါလုပ်မံၚ် သ္ဂးရ။
ဂမ္တဴလုပ်တုဲ ရဲချိုတ်အာလဝ်ဗွဲမဂၠိုၚ်ဂှ်တှ်ေ ရဲသုၚ်အရက်တံကီု သၟတ်တံကီုပါလုပ်မံၚ်ရောၚ် နူကဵုဂကောံရီုဗၚ်ဟံၚ်ပြာ် ပွိုၚ်ဍုၚ်ၜဳကလေၚ် ညးတာလျိုၚ်မွဲတၠ ဟီုရ။
“ပ္ဍဲပိုဲ ပြဟ်ဟ်ဏံ ရဲအတေၚ်ကၠေၚ်ဍဟ်ပိုတ်တုဲ ချိုတ်အာ ဒှ်ပန်တၠယျ။ ပ္ဍဲပ္ၚံက်ဂၠံၚ်ရုၚ်ဗဂဵုလဟဵု မၞိဟ်သုၚ်လဝ်အရက်မွဲ ဒေါမ်လောတ်စှ်ေအာ၊ မွဲတၠပၠန်ဂှ် ဂတမုက်ဆေၚ်စသုၚ်တၞံကှ်ေ၊ ဍေံလေဝ် ဗၜူတုဲလောတ်စှ်ေအာ၊ တုဲပၠန် သၟတ်ဗြဴမွဲတၠ အဟိန်အာမံၚ်ကဵု ကွဳလိုန်လောတ်စှ်ေတုဲ ချိုတ်အာ” သာ်ဝွံ သ္ဂးရ။
တုဲပၠန် ညးဒေသဗွဲမဂၠိုၚ်တံဂှ် သွက်ပရေၚ်စသုၚ်အရိုဟ်တ္ၚဲဂှ် အာကၠုၚ်မှလေဝ် အခက်ခုဲပရေၚ်ဂွံစသုၚ်ဖန်မာန်တုဲ အလဵုအသဳပၞာန် ပံက်ကဵုလဝ်ဒၞာဲဗဒိုပ် ပါဲဓါတ်ဂမ္တဴတံကီုလေဝ် ညးလဵုမွဲမှအာပရေလၟောၚ်မာန် ဟွံသေၚ်ပုဟ် ညးဆက်ဟီုရ။
ဟိုတ်နူသူပါအေလ်နဳညို ဇၞော်ကဵုဇြဟတ်ကတဵုဒှ်တုဲ ပရေၚ်မၞိဟ်ချိုတ် ညံၚ်ဟွံဂွံဒှ်မ္ဂး ဗက်ပံက်မံၚ်ဗဒိုပ်ဂမ္တဴတံဂှ် စွံလဝ်ကၠာ သွက်ညးဇၞော်ဇၞော်ကဵုကောန်ၚာ် မံၚ်ဒၟံၚ်ပ္ဍဲသ္ၚိတံ ဂွံဇြဟတ်ပၟတ်ဓာတ်လလဳဂၠိုၚ်ၚ်ဂှ် ဂစာန်ကၠောန်ကဵုထေက်ရောၚ် ညးဒေသတံ သ္ဂးရ။
မွဲလပါ်တေံပၠန် သွက်ဂွံဒုၚ်ဒဝ်အာ သူပါအေလ်နဳညို ဇၞော်ကဵုဇြဟတ်တံမာန်ဂှ် ပ္ဍဲကဵုဘာလကျာ် ညံၚ်ဂွံပံက်စွံအာ ဗဒိုပ်ပါဲဓါတ်ဂမ္တဴတံဂးတုဲ နူကဵုအလဵုအသဳပၞာန်တွဵုရးမန် ကဵုလဝ်စၞောန်ပ္ညုၚ်ရောၚ်။
ပြဟ်ဟ်ဏံ ပ္ဍဲအကြာဒေသ ပံက်လဝ်ဗဒိုပ်ပါဲဓါတ်ဂမ္တဴတံကီုလေဝ် မၞိဟ်ဗွဲမဂၠိုၚ်တံ မံၚ်ဒၟံၚ်အပ္ဍဲသ္ၚိတုဲ ညးလ္ၚဵတံ စိုပ်မံၚ်ဒၞာဲကမၠောန်ညး တံရောၚ် ဂွံတီရ။
အတိုၚ်ဌာနပရေၚ်ဗြဲကျာ လလောၚ်ပတိတ်လဝ် ပ္ဍဲအံက်တဝ်ပါဏံမ္ဂး အသိၚ်ဓါတ်ဂမ္တဴ တွဵုရးမန် နွံမံၚ်ဒဵုကဵု ၃၇ ဒဳဂရဳသေလ်သဳယာတ်တုဲ အသိၚ်ဂမ္တဴ သွက်ဂွံထပ်သၠုၚ်တိုန်ကၠုၚ်မာန်ရောၚ် ကဵုလဝ်သတိနွံရ။
ပရိုၚ်-သြၚ်လောန်တိုၚ်မ်
Photo – CJ