ကောန်ကျိုဝ်၊ အံက်တဝ်ပါ ၁၅
ဟိုတ်နူ က္ဍိုပ်သ္ကိုပ်ဂိုဏ်ရာဇဝတ် ၃ တၠ ပရေၚ်ပံက်ကၠုၚ်လဝ် သေန်တာကျဖျ အပ္ဍဲဍုၚ်ဗမာဂှ် နူကဵုရုၚ်သၞောဝ်ဓဝ် ဍုၚ်ကြုက် ဒေသဗၟံက်မွဲဒၞာဲ ဖျေံအမိၚ်ကာဂစိုတ်ရ။
အတိုၚ်လိက်လလောၚ်တြး အံက်တဝ်ပါ ၁၃ မ္ဂး ဟိုတ်နူ ဝေန်ဟွိုၚ်ယာန်၊ ချာန်တာဝေ ကဵု လျာအိုကျေန်ဖာန်တံ ပါလုပ်လဝ် ပ္ဍဲကဵုဂိုဏ်ရာဇဝတ် ဂကောံကၟိန်အိန်ထံၚ်ဝေတံတုဲ ရုၚ်သၞောဝ်ဓဝ်အဆံၚ်လှုၚ် တွဵုရးဖူကျေန် ဒေသအဂၞဴ နူကဵုရုၚ်သၞောဝ်ဓဝ်ညးဍုၚ်ကွာန် ကောန်ကျိုဝ် အဆံၚ်အဒေါဝ် ဖျေံဏာအမိၚ်ကာဂစိုတ်ဂှ် ချူလဝ်ရ။
ပရေၚ်ကူသာန်ဂဥုဲၜူမာဲဟွံလုပ်သၞောဝ်၊ ကမၠောန်ဗြဴစရာဲဍုၚ် ကေုာံ ကမၠောန်ကာသဳနို ဟွံလုပ်သၞောဝ်တံ သ္ပက္ဍိုပ်ပံက်လဝ်ကီု ပရေၚ်လီလာန်ဆက်စၠောံလဝ်ကေုာံ ဂစိုတ်လဝ်ကောန်ဍုၚ်ကြုက် ဟွံအောန်နူၜါတၠဂှ်ကီု ဂကောံဂိုဏ်ဏံ လုလောန်ကၠောန်လဝ် ပွရာဇဝတ်ဗွဲမဂၠိုၚ် မဒှ်ရ။
က္ဍိုပ်သ္ကိုပ်ဂိုဏ်ဝေ မွဲတၠ ဂစိုတ်လဝ်မၞိဟ် ကၠောန်လဝ်အမှုရာဇဝတ်ဗွဲမဂၠိုၚ် ဂၠိုက်ဂၠာဲစၟဳစၟတ်ဆဵုလဝ်ရောၚ် ရုၚ်သၞောဝ်ဓဝ် ဟီုရ။
ကောန်ဂကောံတၞဟ်ဟ် ၃ တၠဂှ်လေဝ် ဖျေံဒဏ်ထံၚ် မွဲအာယုက်တုဲ မၞိဟ် ၅၅ ပၠန်ဂှ် ဖျေံထံၚ် နူကဵု ၃ သၞာံ ၃ ဂိတု စဵုကဵု ၂၄ သၞာံရ။
ပရေၚ်ကမၠောန်ဂိုဏ်ဏံ သြန်လုပ်လဝ် နွံဒဝ်ဠာ ၁ ဒသမ ၈ ဗဳလဳယာန်ရောၚ် ရုၚ်သၞောဝ်ဓဝ် ဟီုရ။
ဂကောံဂိုဏ်ဏံ ကၠောန်ကမၠောန် ပ္ဍဲကဵုဂအာၚ်ကၠအ်ဇၞော်ဇၞော် ၁၄ ဒၞာဲနွံမံၚ်၊ ဂွံသြန်ဂိတုဗွဲမဂၠိုၚ် ကဵုဂတိကောန်ဍုၚ်ကြုက်တံတုဲ ကောန်နၚ်လဝ်ဍုၚ်ဗမာ ချဳဒရာၚ်လဝ်ရောၚ် နူကဵု CCTV ကြုက် ထၜးလဝ်ပရေၚ်ဏံရ။
အခိၚ်ဗေကျေန် သၠုၚ်ပတိုန်မံၚ် ကမၠောန်ဗတိုက်သရိုဟ်ကျာဖျ ၜက်ပယျဵုဍုၚ်ဒေသအဂၞဲဏံ တၚ်သ္ဂုတ်သွာတ်ရုၚ်သၞောဝ် မံက်တိတ်ကၠုၚ် မဒှ်ရ။
ပ္ဍဲကဵုသေန်တာ ကျာဖျ ဒေသအဂၞဲတံ ခါန်ကၞက်လဝ်သၟာကမၠောန်ၜိုတ် ၃ ကိုတ်နွံတုဲ စကာနဲကဲပရေၚ်လီဠာန်အန်လိုၚ်နာနာတံ သွက်ဂွံလီအာ ညးအာယုက်ဇၞော်ဇၞော် ဍုၚ်ပလိုတ်တံရောၚ် နူကဵုဂကောံပွမဆုဲပြံၚ်မံၚ်စံၚ်ဂၠးကဝ် ချူလဝ်ပ္ဍဲကဵုဂိတုဂျူလိုၚ်တေံရ။
ရဲဒးဒုၚ်စကာကၠောန်မံၚ်ကမၠောန်အန်လိုၚ်ဗွဲမဂၠိုၚ်တံ ကောန်ဍုၚ်သအာၚ် ရဲဒးဒုၚ်သွံစလဝ်တံဒှ်တုဲ ညးကဵုဒးလဝ်ထံၚ် ဒးဒုၚ်စကာလဝ်ကမၠောန် အကာဲအရာ နနဲအဓ္ဓမ မဒှ်ရ။
ပ္ဍဲကဵုဂိတုဂျာန်နဝါရဳ သၞာံဏံလေဝ် ဂကောံကၟိန်အိန်ထံၚ်မြဳတံ ကောန်ရာဇဝတ်ဂမၠိုၚ် ကၠောန်လဝ်ကမၠောန်ကျာဖျပ္ဍဲကဵုဒေသကိုဝ်က ဍုၚ်ဗမာ ၁၁ တၠတံဂှ် သ္ပထောံကာဂစိုတ်တုဲယျ။
ပ္ဍဲဂိတုဖေဖဝ်ဝါရဳပၠန် ဂကောံကၟိန်အိန်ထံၚ်ပေ ယၟုပြာကတ်ပရေအ်ပရေအ်တံ ၄ တၠဂှ်လေဝ် ညးတာလျိုၚ်ကြုက်တံ ကၠောန်သ္ပထောံ ကာဂစိုတ်ကီုရ။
Ref:Aljazeera/CBS