သဓီု ၊ အံက်တဝ်ပါ ၁၇
အပ္ဍဲတွဵုရးမန် ဍုၚ်သဓီု ဒၞာဲဂတးမုက်ကျာ်ယှိုဲသာယာန်ဂှ် သၟတ်ၜါတၠ ချဳဒရာၚ်ဒစဵုဒစးမံၚ် ပရေၚ်ပကီုပရာတ်လိၚ်ညးဗြဴ ဒးဒုၚ်ရပ်ဏာတုဲကၠေံမံၚ်ရဂှ် ရဲလ္တူဍုၚ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
တုဲကၠုၚ် အံက်တဝ်ပါ ၉ တေံ မောၚ်ထူမောၚ် အာယုက် ၂၀ သၞာံ ဒၟံၚ်အရာပ် ဗေန်လှိုၚ် ဍုၚ်သဓီုကဵု သကအ်ရဲဍေံမွဲတၠတံ ဟိုတ်နူကၠောန် Speak Out ပရေၚ်ဒစဵုဒစးပကီုပရာတ်လိၚ်ညးဗြဴတုဲ ပတိုန်လဝ်ဗီု လ္တူ TikTok ရောၚ်။
သၟတ်ၜါတၠတံဏံဂှ် စိုပ်အခိၚ်ဗတမ်ဂှ်တှ်ေ ဒပ်ဗၠာဲသၟိၚ်တံကၠုၚ်ရပ်ဏာပ္ဍဲကဵုသ္ၚိတုဲ ကုရဲကၟိန်အိန်ထံၚ်တံလေဝ် အဆက်ပိုတ်မံၚ်ရဂှ် ရဲလ္တူဍုၚ်တံ ဟီုရ။
အပ္ဍဲဘာဗတောန်လိက် ဍုၚ်မာန္တလေဝ် ကွးဘာညးဗြဴမွဲတၠ ဒးဒုၚ်သ္ပပကီုပရာတ်လိၚ် တိုန်ကၠုၚ်လဝ် လ္တူမုက်လိက်မှာဇန်ဂှ် ဒုၚ်သ္ဇိုၚ်ဂှ်တုဲ သၟတ်ၜါတၠ ကၠောန်ပရေၚ်ချဳဒရာၚ်ဒစဵုဒစးပကီုပရာတ်လိၚ် ညးဗြဴဂှ်ရ ဒးဒုၚ်ရပ်ဏာရောၚ် ဂွံတီရ။
သၟတ်ၜါတၠဏံ သွက်ဂွံပလံၚ် ဘာတန်ဗတောန်ယိုက်ဝန်ပၞာန်ဂှ် ကၠောန်မံၚ်ရောၚ် ပရိုၚ်မံက်တိတ်မံၚ်ဂှ်ကီု အပ္ဍဲဗဒိုပ်ဗၠာဲသၟိၚ်ဍုၚ် သဓီုဂှ်လေဝ် ပံက်လဝ်အမှု နကဵုဥပဒေ ညိင်-သု-သဳ ရဂှ်ပရိုၚ်တိတ်မံၚ်ရ။
ရဲကၟိန်အိန်ထံၚ်တံ ဗက်ဂၠာဲသၟာန်သၟုဟ်သၟတ်ၜါတၠ ဒးဒုၚ်ရပ်ဏာကီုလေဝ် မုပရိုၚ်မှဟွံဂွံဏီပုဟ်ဂှ် ဂွံတီနူ ရဲကြပ်ကဵုညးတံရ။
ပရိုၚ်-သြၚ်လောန်တိုၚ်မ်
Photo – Social Media