မော်လမြိုင်၊ အံက်တဝ်ပါ ၁၇
အလဵုအသဳပၞာန် သွက်ဂွံဂၠေံကေတ်သြန် ဍုၚ်ဗာလာရုသ်ဂှ် နူကဵုစၠတ်ထဝ်သ္ပဒတန်တုဲ ဗွဲကြဴဂှ် အနှေန်ထဝ်ကဵု ဒဝ်ဠာတံ ထပက်တိုန်အာတုဲ ပ္ဍဲအံက်တဝ်ပါ ၁၆ ဂှ် ၚုဟ်ကၠေၚ်စက်လေဝ် ဗက်တိုန်ကၠုၚ်ကီုရ။
ကၠာဟွံစိုပ်မွဲတ္ၚဲ အတိုၚ်အလဵုအသဳပၞာန် လလောၚ်ပတိတ်လဝ်မ္ဂး ၚုဟ်ကၠေၚ်ဓါတ် 92 မွဲလေတ် ၄၈၆၀၊ ကၠေၚ်ဓါတ် 95 မွဲလေတ် ၅၀၅၀၊ ကၠေၚ်ဒဳဇြေလ်မွဲလေတ် ၅၆၈၅ ဒကေဝ်ဟေၚ် နွံကၠုၚ်လဝ်ရ။
ဆဂး စိုပ်အံက်တဝ်ပါ ၁၆ ဂှ်တှ်ေ ၚုဟ်ကၠေၚ်ဓါတ် 92 မွဲလေတ် ၄၉၆၅၊ ကၠေၚ်ဓါတ် 95 မွဲလေတ် ၅၁၁၅၊ ကၠေၚ်ဒဳဇြေလ်မွဲလေတ် ၅၇၃၀ ဒကေဝ် ကၠေၚ်မွဲလေတ် ကြပ် ၇၀ ဒကေဝ် ၚုဟ်ကၠေၚ်စက်တံ သၠုၚ်တိုန်ဗက်အာရ။
င္ရုဟ်မွဲဒဝ်လာမ္ဂး ၄၇၅၀ ဒကေဝ် ၚုဟ်သြန်ဒဝ်လာအမေရိကာန် ထပက်တိုန်အာဂှ်ရ ဟိုတ်နူအလဵုအသဳပၞာန်တံ ဗက်ရပ်တုဲ ၚုဟ်ကလေၚ်စှ်ေအာ မွဲဒဝ်လာ ၄၆၅၀ ဒကေဝ်ညိရ။
ထဝ်အပ္ဍဲဍုၚ် မဳလေၚ်လျိုၚ်မွဲဒကေဝ်နွံမံၚ်ပွဳဗွိုၚ် ၁၀၀ ကိုတ်ဂှ် လျိုၚ်မွဲဒကေဝ်တိုန်အာကရပ် ၁၀၃ ကိုတ်ရ။
အလဵုအသဳပၞာန် သွက်ဂွံဗပေၚ်ဗာတ်ဂျက် ဂၠေံအာသြန် နူဍုၚ်ဗာလာရုသ် ၂၁၀၀ ဗဳလဳယာန်ဒကေဝ် ဟိုတ်နူစၠတ်ထဝ်သ္ပဒတန်တုဲ အနှေန်ဒဝ်လာကဵုထဝ်တံတိုန်ကၠုၚ်ဂှ် အပ္ဍဲဗွဝ်ဖျာ ဒှ်အာဂရံက်ဂရိုက်အိုတ် သ္ဂးရ။
ဟိုတ်နူအနှေန်ထဝ်ကဵု ဒဝ်ဠာတိုန်အာတုဲ အလဵုအသဳပၞာန်တံ ဗက်ဂၠာဲရပ်တၠကမၠောန်ဒယှ်ဒယှ်တံကီု အပ္ဍဲဗွဝ်ဖျာတံလေဝ် ၚုဟ်မဟွံညိၚ်ဝပ်ဏီပုဟ်ဂှ် ဂွံတီကေတ်နူကဵုပွဳဗွိုၚ် တၠကမၠောန်ပရေၚ်ပိုန်ဒြပ်တံရ။
ပရိုၚ်-သြၚ်လောန်တိုၚ်မ်
Photo – CJ