လှာဒကှ်၊ အံက်တဝ်ပါ ၁၇
အပ္ဍဲတွဵုရးကရေၚ် ပွိုၚ်ဍုၚ်လှာဒကှ် ပေါဲဗတိုက် ကတဵုဒှ်လဝ် ကွာန်ပုလိၚ်ဂှ် ဒပ်ပၞာန်ဗမာတံ ဒးဂိအာကီုလေဝ် ကလေၚ်ပကောံဇြဟတ်တုဲ ထပက်မံၚ်ကရောၚ်ပၞာန်ရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲဂိတုအံက်တဝ်ပါ ၁၂ ဂှ် ဒပ်ဗလံက် အမတ ၃၁၈ ဖျေံသ္ဇိုၚ်ကွာန်အၜေတ် ပွိုၚ်ဍုၚ်မုဟ်ဍုၚ် တွဵုရးမန်ဂှ် ကလေၚ်ပကောံ ကရောၚ်ပၞာန်တုဲ အတိုၚ်ဂၠံၚ် အၜေတ်-ညိၚ်ဆာန်မျာၚ်-ပုလိၚ်- ဂလာတဂေါန်ဒေၚ်ဂှ် ကရောၚ်ပၞာန်ထပက်လုပ်ကၠုၚ် အပ္ဍဲကွာန်ပုလိၚ်ရ။
နူကဵုကွာန်အၜေတ် ဒပ်ပၞာန်ဗမာ ပါ်ပရးလဝ်ကရောၚ်ပၞာန် လုပ်ကၠုၚ်အပ္ဍဲကွာန်ပုလိၚ်ဂှ်ရ ပေါဲဗတိုက် ကတဵုဒှ်လဝ်ကဵုဒပ်ပံၚ်တောဲမဟာမိတ်တံ နူကဵုအံက်တဝ်ပါ ၁၂ စိုပ် ၁၄ အခိၚ်နူဂယးတုဲ သီုကဵုဒပ်ပၞာန်ကျာတံ ဗက်ဗတိုက်လဝ်ကီုရ။
အကြာပေါဲဗတိုက်ဒှ်လဝ် ကွာန်ပုလိၚ်ဏံ လပါ်ဒပ်ပၞာန်ဟွံအောန် နူကဵု ၁၀ တၠ ချိုတ်အာတုဲ ဇွသှ်ေဇးမံၚ်အပ္ဍဲကွာန်ကီု မကမ်လဝ်နာနာတံလေဝ် ရဲဒပ်ပၠန်ဂတးတံ သီဂွံဏာကီုရ။
ဒပ်ပၞာန်ဂိအာလဝ် ပ္ဍဲကဵုပေါဲဗတိုက်ဂှ်ရ ပန်ဂစိုတ်ဏာသၟတ်မွဲတၠ နကဵုသေနာတ်တုဲ ရပ်တံၚ်ပဝ်တာညးဒေသတံ သ္ပလဝ်ဂဒံၚ်မၞိဟ်ကီု ဗွဲကြဴမှ ကလေၚ်ဗလးဖျဴနၚ်ရဂှ် ဂွံတီနူကဵုညးဒေသတံရ။
ပ္ဍဲကဵုဗဒိုပ်ကုန်ကလုဲ နွံမံၚ်ဂအုံကွာန် ဂလာတဂေါန်ဒေင်ဂှ် ကရောၚ်ပၞာန်ဗမာ မွဲကရောၚ် ကၠုၚ်ထပေၚ်ဇြဟတ်မၞိဟ်ဇွောံမ လွဟ်မကမ်တံကီု ကၠောန်ပရေၚ်သၠာဲဒပ်ကီုတုဲ ပ္ဍဲအံက်တဝ် ၁၄ ဂှ် ကလေၚ်ဆုတ်တိတ်အာ လပါ်ညိၚ်ဆာန်မျာၚ်ရ။
ဒပ်ပၞာန်ဗမာတံ ကလေၚ်ပကောံဇြဟတ်မၞိဟ် ပ္ဍဲကဵုညိၚ်ဆာန်မျာၚ်တုဲ စိုပ်အံက်တဝ်ပါ ၁၆ အခိၚ်ဒေါဝ်တ္ၚဲဂှ် ကရောၚ်ပၞာန်ကလေၚ်ထပက်ကၠုၚ် လပါ်ကွာန်ပုလိၚ်ဂှ်တှ်ေ အကြာဒပ်ၜါလပါ် အကာဲအရာ ပရေၚ်ပၞာန်ကြံၚ်မ္ၚိုဟ်မံၚ်ရ။
ဟိုတ်နူပေါဲဗတိုက်ဒှ်ကီု ကရောၚ်ပၞာန်ဗမာထပက်လုပ်ကၠုၚ်ဂှ်ရ ကောန်ကွာန်ပုလိၚ်တံ ကြပ်အလဵုံကွာန် ထောံသ္ၚိဌာန် ဂြိပ်အာအိုတ်တုဲ ကောန်ကွာန်တံကဵုညးအာတရဴတံ ကၟာတ်ဆိုအ်မံၚ် အပ္ဍဲအကြာပေါဲဗတိုက်နွံမံၚ်ရောၚ် သ္ဂးရ။
ပရိုၚ်-သြၚ်လောန်တိုၚ်မ်
Photo – Social Media