နေဗျဳဒဝ် ၊ အံက်တဝ်ပါ ၁၇
တၠအဝဵုပၞာန် ဥူမေန်အံၚ်လှိုၚ် ဟိုတ်နူလ္ၚပ်စိုတ် မိက်ဂွံဒှ်သမ္မတ သီကေတ်အဝဵုအလုံရးနိဂီုဍုၚ်တုဲ ပတောအ်ထၜးပြံၚ်လှာဲလဝ် ဗီုပြၚ်ညးဍုၚ်ကွာန်ဂှ် သၟိက်မိက်ကဵုဂွံ ပရေၚ်ၜိုဟ်လလမ် နကဵုစိုတ်စေတနာဍာံဍာံ မုက်ဂွညိဟွံမွဲ ဟီုတိတ်ကၠုၚ်ရ။
အပ္ဍဲဂိတုအံက်တဝ်ပါ ၁၅ ကုညးစၞးက္ဍိုပ်သ္ကိုပ်ကောန်ဍုၚ်အရၚ် တိုန်စိုပ်အခန်ကၞာ တ္ၚဲပေၚ်ကၠောံသၞာံ လိက်ကသုက်ပရေၚ်ဒေါအ်ပန်ပှော် ၁၁ ဝါတံ အခိၚ်ဒုၚ်တဲဆဵုဂဗလဝ် အပ္ဍဲကဵုရုၚ် သမ္မတဂှ် ဟီုသ္ဂးလဝ်ရောၚ်။
နကဵုဒပ်ပၞာန် ပၟိက်မိက်ဂွံကဵုဒှ် ဒပ်ပၞာန်စဵုဒၞာသွက်ဍုၚ်ကဵု ညးဍုၚ်ကွာန်တံတုဲ ဒပ်ပၞာန်ဒးဗတိုက်မံၚ်ကဵု ကောဒေံကောန်ဍုၚ်အရၚ် ညးသ္ကံမွဲစွံဂှ်တှ်ေ ဟွံမိက်ကဵုဒှ်ပုဟ် သ္ဂးရ။
ပြဟ်ဟ်ဏံ အလဵုအသဳ၊ စၠတ်ထဝ်ကေုာံဒပ်ပၞာန်တံသီုဖအိုတ် အခိၚ်ဂစာန်ဒက်ပတန်မံၚ် ရးနိဂီုဍုၚ်ဖောအ်ဗြဳတောတက်ဏံ သွက်ဂွံထမံက်အာ လၟေၚ်ကမၠောန်ပရေၚ်ၜိုဟ်လလမ်ဂှ် အခိၚ်အခါခိုဟ်ပြဲ ဗွဲမလောန် ဥူမေန်အံင်လှိုၚ် ဟီုလဝ်ရောၚ်။
ပရေၚ်ကောန်ညးဍုၚ်ကွာန်တံ ချိုတ်ဒးလဝ်ဝပ်တံ ညိဟွံဒေါအ်မွဲသာ် ဟီုပတိတ်ကၠုၚ်အရေဝ် ပရေၚ်ၜိုဟ်လလမ်ဂှ် ပရေၚ်ညးတံဂစာန်မံၚ်သွက်အဝဵုညးတံ ညံၚ်ဂွံခိုၚ်တိုန်အာရောၚ် ညးလ္ၚတ် ပရေၚ်ဍုၚ်ကွာန်ဗမာ ဒံက်တာ သိုၚ်ကျဳဇြေန်သိုဝ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“လၟုဟ် ဟီုမံၚ်အရေဝ်ပရေၚ်ၜိုဟ်လလမ်ကီုလေဝ် ဗတိုက်မံၚ်မွဲလပါ်တေံ ကိစ္စပရေၚ်ဘဲချိုတ်ဒးဝပ် ညးဍုၚ်ကွာန်တံ ဒေါအ်ထောံဟွံမာန် ဆက်ဒှ်အာလဝ်မွဲဒမြိပ်တံဂှ် ကေတ်ပရေၚ်ဓရ်ၜိုဟ်လလမ်ဟီုတုဲ ဂစာန်ကၠောန်မံၚ် သွက်အဝဵုညးတံ ဂွံခိုၚ်ကၠိုက်တိုန်အာ သၟဝ်ပရေၚ်အုပ်ဓုပ်ညးတံ သီုဖအိုတ်တံ ညံၚ်ဂွံညိၚ်သ္ၚိတ်အာ ကၠိုဟ်ဂွံရ” သာ်ဝွံ သ္ဂးရ။
လၟုဟ်ပြဟ်ဟ်ဏံ ကၠောန်မံၚ်ပရေၚ်ၜိုဟ်လလမ်တံဟီုဂှ် ရန်တၟံလဝ် သွက်ပရေၚ်လုပ်သၞောဝ်အလဵုအသဳပၞာန် ဂွံသၠဲလးတိုန်အာကီု၊ ရိုဟ်ကၞက်အဝဵု ပရေၚ်အုပ်ဓုပ်သ္ဇိုၚ်ပၞာန် ညံၚ်ဂွံဗိုန်ဗတ်အာ ကေုာံ နူကဵုသၟဝ်သ္ဇိုၚ်သၞောဝ်ဥပဒေ ၂၀၀၈ သွက်ဂွံထိၚ်ချုပ်အာ ပရေၚ်ညိၚ်ဝပ်အပ္ဍဲဍုၚ်ဂှ်ရောၚ် ညးထံက်ထၜးရ။
ပရေၚ်ဒစးဒုၚ်အာတ်မိက် ညိဟွံစွံတုဲ သွက်ဂွံတက်ကျာ ပရေၚ်ၜိုဟ်လလမ်ဂှ် ကော်ဘိက်လဝ် ဂကောံကောန်ဍုၚ်အရၚ်ရပ်လွဟ်တံတုဲ ဟိုတ်နူပရေၚ်သီအဝဵု ဂကောံပၠန်ဂတးရပ်လွဟ်တံ မံက်တိတ်ကၠုၚ်လဝ်ဂှ်တှ်ေ အလဵုအသဳပၞာန်ကဵုလဝ်အရေဝ် ညံၚ်ဂွံဖျေံလွဟ်လုပ်ကၠုၚ် အပ္ဍဲဗွိုၚ်သၞောဝ်ဥပဒေရောၚ်။
ပရေၚ်ၜိုဟ်လလမ်ဟီုဂှ်တှ်ေ သွက်ပရေၚ်ဖောအ်ဗြဳတောတက် ရးနိဂီုဍုၚ် ဒှ်ပန္နက်သေဝ်ဟွံမွဲဟွံဂွံ ဥူမေန်အံၚ်လှိုၚ် ကညာၚ်ကရေဲလဝ်တုဲ သွက်ဂွံဍိုက်ဗတိုက်နကဵုဇြဟတ်ဂှ် စွံပွန်ပန်ဗတိုက်ပတဝ်လဝ်ကဵု ညးဍုၚ်ကွာန်ဂမၠိုၚ်တန်တဴမံၚ် ပ္ဍဲဒၞာဲဒေသ ပရေၚ်အုပ်ဓုပ်ကောန်ဍုၚ်အရၚ်တံကဵုဒပ်ပၠန်ဂတးတံရောၚ်။
အတိုၚ်တၚ်နၚ် နူကဵု ISP-Myanmar ဂှ်တှ်ေ ပ္ဍဲကဵုဒပ်ပၞာန် ဒှ်ပရေၚ်အပြံၚ်အလှာဲ ဂဥုပ်ဒပ်တုဲ အကြာပွိုၚ် ၆ ဂိတုဂှ် ပ္ဍဲအလုံဍုၚ်မွဲ ဒှ်ပွမကာဂစိုတ်ဂအုံဂအုံကလောအ်ကလောအ် ဟွံအောန်နူကဵု ၇ ဝါနွံတုဲ ကောန်ဍုၚ်ကွာန်တံ ဒးချိုတ်အာလဝ် ၁၇၀ ပြၚ်ရ။
အပ္ဍဲကဵုဏံ ဟိုတ်နူဒပ်ပၞာန်ကျာကြဳလဝ်ဗုမ်ဂှ် ဒးချိုတ်လဝ်ဟွံအောန်နူကဵု ၁၁၁ တၠနွံတုဲ အပ္ဍဲတွဵုရးရခေၚ်မွဲဟေၚ် ချိုတ်အာ ၆၄ တၠ မဒှ်ရ။
အပ္ဍဲကဵုသၟဝ်တၠုၚ်လအာ ပရေၚ်ဗီုတံဏံဂှ် ဂကောံကောန်ဍုၚ်အရၚ်ရပ်လွဟ်တံ ကေတ်ပရေၚ်ၜိုဟ်လလမ်တုဲမ္ဂး ယဝ်ရမိက်ဂွံကၠောန် ပရေၚ်ဍုၚ်ကွာန်တှ်ေ ပံက်အာဗော်ညိ ကေုာံ မိက်ဂွံကၠောန်ပရေၚ်ၜိုဟ်လလမ်တှ်ေ နကဵုဥပဒေ ညံၚ်ဂွံကၠောန်အာဂှ် ဥူမေန်အံၚ်လှိုၚ် ဟီုလဝ်ကု က္ဍိုပ်သ္ကိုပ်ကောန်ဍုၚ်အရၚ် ကၠုၚ်ဆဵုဂဗလဝ်တံဂှ်ရ။
တုဲပၠန် ယဝ်ရ မိက်ဂွံလုပ်ယိုက်ဂၠေၚ်တာလျိုၚ်ပရေၚ်စဵုဒၞာမ္ဂး ပံၚ်တောဲအာကဵုဒပ်ပၞာန်တုဲ ညံၚ်ဂွံကၠောန်အာဒပ်မၚ်ပယျဵု ယိုက်ဂၠေၚ်အာဂှ်ကီု မိက်ဂွံမံၚ်ဗီုကောန်အရာပ် ဗီုပြၚ်ညးဍုၚ်ကွာန်ဓမ္မတာမ္ဂး မံၚ်မာန်ရောၚ် အခိၚ်ကၠာတေံလေဝ်ကေၚ်ဟီုလဝ်တုဲတုဲ သ္ဂးရ။
ဒပ်ဂကောံ ပံၚ်တောဲလဝ်ကဵုဒပ်ပၞာန်တံဂှ် ကဵုလဝ်ဗီုပြၚ်ဖန်ဖက် အခေါၚ်အရာဟီုဂှ်တှ်ေ ဒှ်တိုန်အကာဲအရာ သွက်ဂွံဝဳၜံၚ်ပတိတ်ဏာ ခရိုနဳ ပ္ဍဲဒေသမဆေၚ်စပ်တံရောၚ် ဒံက်တာ သိုၚ်ကျဳဇြေန်သိုဝ် သ္ၚဳဂၠိပ်ရ။
ပြဟ်ဟ်ဏံ အပ္ဍဲကဵုတက်ကျာသဳကၠဳမံၚ်ကဵု အလဵုအသဳပၞာန်ဂှ်တှ်ေ ဂကောံဒေါအ်လဝ်ပန်ပှော်တံကဵု ဂကောံဟွံဂွံထပက်လဝ်စၟတ်တဲဏီ နူကဵုဒေသသၟဝ်ကျာတံသၟးဟွံက ဒပ်မဟာမိတ်ကောဒေံတအာၚ်ကဵု ကိုဝ်က သ္ကိုပ်သ္ကလဝ်လဝေၚ်ပၞာန် ၁၀၂၇ တံလေဝ် ဟိုတ်နူဇြဟတ်ဟရိုဟ်ကြုက် ပါလုပ်လဝ်ကီုရောၚ်။
ဂကောံလ္ၚဵုတံ တက်ကျာသဳကၠဳမံၚ်ပရေၚ်ၜိုဟ်လလမ်ဂှ် သွက်ဍုၚ်ဗမာဂွံၜိုဟ်သြိုဟ်အာကေုာံ ညံၚ်ဂွံကဵုဒေါအ် ပရေၚ်ညးဍုၚ်ကွာန်ဒးဘဲဝပ်ချိုတ်မံၚ်တံဂှ်ဟွံသေၚ်၊ ရန်တၟံ ဂုဏ်ဖဵုပရေၚ်ပူဂဵုညးတံတုဲ အာတ်မိက်သွက်ဂွံပခိုၚ်အဝဵု ပရေၚ်အုပ်ဓုပ်ဒေသမဆေၚ်စပ်ကေုာံ ပရေၚ်ဖောအ်ဗြဳတံ မဒှ်ရ။
နကဵုမၞိဟ်ဟွံအာတိုန်စိုပ် အခန်ကၞာ NCA ပေၚ်ကၠောံသၞာံကီုလေဝ် စၞးဒးအာတ်မံၚ်ဆန္ဒမိက်ဂွံဒှ်တံသၟးမ္ဂး ပရေၚ်ကၠောန်ထေက် အရာဒှ်ထေက်တံ ဆဵုဂဗတက်ကျာသဳကၠဳတုဲ ပံၚ်တောဲဂၠာဲအာသွဟ်ညိဂှ် ဥူမေန်အံၚ်လှိုၚ် ထပ်ဗတိုက်ဖအောဝ်ဏာ နူကဵု Video Message ရ။
ပရေၚ်ကိစ္စတံဏံဂှ်တှ်ေ နူကဵုသၟဝ်ဥပဒေသ္ဇိုၚ်သၞောဝ် ၂၀၀၈ အတိုၚ်ပွဳဗွိုၚ် မူအလဵုအသဳပၞာန်ပံက်ကဵုလဝ်ဂှ် ဒးဒတူလိုၚ်ကၠောန်အာတုဲ ပရေၚ်ပ္ညဳပ္ညပ်ယှအ်ဖျေံတံဟွံပါလုပ်မွဲသာ် ကော်ဘိက်ပရေၚ်ၜိုဟ်လလမ်ဟီုဂှ်တှ်ေပတဝ်အာကဵုဂၠံၚ်ပရေၚ်အံၚ်ဇၞး ဟွံမာန်ပုဟ် ညးလ္ၚတ်တံသ္ၚဳဂၠိပ်ရ။
ဂကောံထပက်စၟတ်တဲ NCA တံသၟးဟွံက ဂကောံဟွံထပက်လဝ်စၟတ်တဲဏီတံဂှ်လေဝ် သွက်ဂွံတက်ကျာ သဳကၠဳအာ နကဵုညးဘိက်ကော်လဝ်တုဲယျရောၚ် ဥူမေန်အံၚ်လှိုၚ် သ္ဂးရ။
ဗွဲတၟေၚ် တုဲကၠုၚ်အကြာပွိုၚ် ၅ သၞာံဏံ ဂကောံဟွံလုပ်တက်လဝ် ကျာ KNU ၊ CNF ကဵု ABSDF တံဂှ်လေဝ် ညံၚ်ဂွံပါလုပ်တက်အာကျာ ပ္ဍဲပေါဲသဳကၠဳပရေၚ်ၜိုဟ်လလမ်ကီုဂှ် ထပ်ကော်ဘိက်ဏာ ဟီုရ။
ဗီုဂှ်ကီု ရန်တၟံအာပရေၚ်ဂုဏ်ဖဵုပိုန်ဒြပ်ဍုၚ်ကဵု ညးဍုၚ်ကွာန်တံတုဲ ဂကောံ PDF တံလေဝ် ညံၚ်ဂွံလုပ်ကၠုၚ် အပ္ဍဲဗွိုၚ်သၞောဝ်ဥပဒေညိဂှ် ညးထပ်ဗတိုက်ဖအောဝ်လဝ်ရောၚ်။
မွဲလပါ်ပၠန် KNU ကဵု CNF ဘိက်ကော်လဝ်နကဵုယၟုတံဂှ် ပါလုပ်မံၚ် အပ္ဍဲကံၚ်သဳပၠတရဴဖိတ်ဒရေဝ် SCEF မွဲကရောံကဵု NUG, CRPH ကဵု ကောန်ဍုၚ်အရၚ်မဟာမိတ်တံရ။
SCEF ဝွံ ဒှ်မူမွဲ ဗျူဟာမွဲတုဲ ဗတိုက်အာဒပ်ပၞာန်ကီုဒှ် ပ္ညဳပ္ညပ်တက်ကျာကီုဒှ် နကဵုမွဲမွဲဂကောံ ကၠောန်အာဟွံသေၚ်၊ သွက်ဂွံပံၚ်တောဲကၠောန်အာမွဲစွံတုပ်ပ်ရောၚ် ဥက္ကဌ KNU ပဒိုသဝ်ဂွာထူဝေၚ်ကဵု ဝန်ဇၞော် NUG ဥူတေန်ထောန်နိုင် သှ်ဆာဲဟီုလဝ်ကဵု အေန်တာဗျူ လိက်ပရိုၚ် The Yomiuri Shimbun ရ။
အပ္ဍဲအကာဲအရာဏံ ပါဲတးလဝ်သွက်ဂွံတက်ကျာကဵု အလဵုအသဳ ညဳသၟဟ်ကောန်ဂကူ မံက်တိုန်ကၠုၚ် ဟိုတ်နူသီအဝဵုကီု ဒပ်ပၞာန်အာရက္ခ AA အခိၚ်လၟုဟ်ဏံ ဒှ်မံၚ်ပေါဲဗတိုက်ဇြဟတ်ဇၞော်ကဵု ဒပ်ပၞာန်ဗမာတံဂှ် စုတ်ယၟုတုဲ ကော်ဘိက်လဝ်ဂှ် ဟွံမွဲဏီပုဟ်။
ပသှ်ေစွံလဝ် ပရေၚ်ဗီုတံဏံဂှ်တှ်ေ ဒှ်မူဝါဒက္ဍိုပ်သ္ကိုပ်သီအဝဵု ညိဟွံပြံၚ်လှာဲတုဲ သွက်တၠုၚ်လအာဍုၚ်ဗမာ ဂတတေံဂှ်တှ်ေ ဆက်ဗၠိုက်တၞီအာမံၚ် ပ္ဍဲဂဗေၚ်ပရေၚ်ပၞာန် ဍာ်ဇမၠိၚ်ဏီရောၚ် နူကဵုဂကောံလ္ၚတ်ဆေၚ်စပ်ကဵု ပရေၚ်ဂီုကၠီုပၞာန်ဗမာ MDSI ညးတာလျိုၚ် သုတေသနပၞာန် ကိုနံၚ်ယော သ္ၚဳဂၠိပ်ရ။
“ပြဟ်ဟ်ဏံ ပ္ဍဲကဵုညးတေံကော်ဘိက်လဝ်ဂှ်တှ်ေ ဒှ်ဗီုပြၚ်ဆက်ဆောံစုက်လုက်အာ လ္တူဂၠံၚ်တရဴပရေၚ်ၜိုဟ်လလမ်ဍာံဍာံဂှ် ဟွံဆဵုညာတ်လဝ်ပုဟ်။ ဟွံဒုၚ်လဝ်သ္ဇိုၚ်ဗီုဏံပုဟ်။ ဟိုတ်ဂှ်ရ သၟဝ်ပရေၚ်တက်ကျာ ထၜးစပရေၚ်ၜိုတ်လလမ်ဂှ် အကြာၜါ်လပါ်တံ ပဋိပက္ခပၞာန်တံ ဆက်ဒှ်အာမံၚ်ဏီ။ ဗွဲစိုတ်ဟွံမိပ်ဒးဟီုမ္ဂး တၠုၚ်လအာပရေၚ်ဍုၚ်ကွာန်ဍုၚ်ဗမာဏံ ဆက်ဗၠိုက်တၞီအာမံၚ် ပ္ဍဲအကြာဂဗေၚ်ပဋိပက္ခပၞာန်တံ ဍာ်ဇမၠိၚ်ဏီရောၚ်၊ အကာဲအရာ ဗလးဆက်သၠဲလးမံၚ်ဏီရောၚ် ပိုဲတံ ဒဟီု မဒှ်ရ” သာ်ဝွံ သ္ဂးရ။
သၞောတ်ဒဳမဝ်ကရေသဳဗော်ဇဳ ခိုၚ်ၚ်ကၠိုက်က် နွံကဵုစေဝ်ပၞောန်ဍာံဍာံ ကေုာံ ဒုၚ်သ္ဇိုၚ်ကဵု သၞောတ်ဒဳမဝ်ကရေသဳဖိတ်ဒရေဝ်တံတုဲ ဆက်ဒက်ပတန်အာ ကၟိန်ဍုၚ်ပံၚ်ကောံရောၚ် ရဲလပါ်ပၞာန်တံ ဟီုရ။
ဆဂး သ္ဇိုၚ်သၞောဝ်ဥပဒေ ၂၀၀၈ ဒုၚ်လဝ်လျိုၚ် ဒပ်ပၞာန်သွက်ဂွံပါလုပ် အပ္ဍဲပရေၚ်ဍုၚ်ကွာန်ဂှ် ပြံၚ်လှာဲတုဲ သွက်ဂွံဂွံအာပရေၚ်ဂၠးကဝ်သ္ပစၟတ်သမ္တီဂှ် ဆက်ကေမ်ရပ်လဝ်လိက်ကသုက် NCA ချိုတ်တ်ဂှ်ရ။
ရဲနူကဵုလပါ် ဂကောံဇြဟတ်ပၠန်ဂတး ထပိုတ်မံၚ်သၞောတ်တၠအဝဵုပၞာန်တံဂှ် သွက်ဂွံပြံၚ်လှာဲထောံ သၞောတ်ပရေၚ်ဍုၚ်ကွာန်အလုံမွဲသီုဖအိုတ်တုဲ ဂစာန်ဒက်ပတိုန်ကၠောန်အာမံၚ် ကၟိန်ဍုၚ်ဖိတ်ဒရေဝ်ဒဳမဝ်ကရေသဳ မၞုံကဵုအခေါၚ်အရာ ပရေၚ်တုပ်သၟဟ်ကဵု ပွမပိုၚ်ပြဳအဝဵု ကုဇကုပေၚ်ၚ်ဟေၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – HOS