မတ်မလီု၊ အံက်တဝ်ပါ ၁၉
အပ္ဍဲတွဵုရးမန် သွက်ဂွံဒုၚ်ဒဝ်အာ ဘဲဒဏ်အေလ်နဳညိုဂှ် အလဵုအသဳပၞာန် ပံက်ဟလိုၚ်လဝ် ဌာန်ဒၞာဲပါဲအသိၚ်ဂမ္တဴတံကီုလေဝ် မၞိဟ်ကၠုၚ်ပါဲဂမ္တဴတံ ဟွံမွဲပုဟ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
သွက်ဂွံဒုၚ်ဒဝ်အာဘဲဒဏ် သူပါအေလ်နဳညိုဇၞော်ကဵုဇြဟတ်တုဲ ပ္ဍဲဘာလကျာ် တွဵုရးမန်တံ သွက်ဂွံပံက်စွံလဝ် ဌာန်ဒၞာဲပါဲအသိၚ်ဂမ္တဴကီု ဒှ်ကၠုၚ်ပရေၚ်ကာမံက်တိုန်မ္ဂး ညံၚ်ဂွံဝဳဝတ်အာတံမာန် အလဵုအသဳပၞာန် ကဵုလဝ်စၞောန်ပ္ညုၚ်ရ။
ဆဂး ပ္ဍဲကဵုဌာန်ဒၞာဲပါဲအသိၚ်ဂမ္တဴ အလဵုအသဳပၞာန်ပံက်စွံလဝ်တံမ္ဂး ပၟတ်ဓါတ်လလဳ အခိၚ်ဍာံဍာံကၠုၚ်ဟွံမာန်ကီု သွက်ပရေၚ်အာကၠုၚ် ဒှ်တၚ်ဝါတ်အခက်အခုဲနွံမံၚ်တုဲ ညးကၠုၚ်ပါဲဂမ္တဴတံ ဟွံမွဲပုဟ် သ္ဂးရ။
ပ္ဍဲတွဵုရးမန် သွက်ဂွံဒုၚ်ဒဝ်အာ အသိၚ်ဂမ္တဴတံဂှ် ပံက်စွံအာ ဌာန်ဒၞာဲ ပါဲအသိၚ်ဂမ္တဴ ဒဵုကဵု ၁၄၈ ဒၞာဲရောၚ် နူကဵုဌာနပရေၚ်ထတ်ယုက် အလဵုအသဳပၞာန် ကဵုလဝ်သမ္တီနွံရ။
ညးဍုၚ်ကွာန်တံဂှ် နွံမံၚ်ပၟိက် ဌာန်ဒၞာဲပါဲအသိၚ်ဂမ္တဴတံဟွံသေၚ် သွက်ဂွံဇူအပ္ဍဲသ္ၚိ ပြေပြေပြံၚ်ၚ်မာန် အလဵုအသဳပၞာန် ညံၚ်ဂွံကဵုပၟတ်လလဳ အခိၚ်ဍာံဍာံညိဂှ် အာတ်မိက်မံၚ်ရ။
ကိစ္စပံက်စွံ ဌာန်ဒၞာဲပါဲအသိၚ်ဂမ္တဴ ပ္ဍဲကောံဓရီု အံၚ်တဝ်ပါ ၅ တေံ ကၠောန်လဝ်ဂှ် ဟိုတ်နူသမ္မတ ဥူမေန်အံၚ်လှိုၚ် ကဵုလဝ်အမိၚ်ရောၚ် ဂွံတီရ။
သွက်ဂွံတတ်ၜက်အာ ဘဲဒဏ်ဥတုရာသဳ အေလ်နဳညိုတံမာန်ဂှ် ညးဍုၚ်ကွာန်တံ ညံၚ်ဂွံပကောံဒေပ်စွံလဝ် စၞစဇွောံမတံတုဲ သွက်ဂွံပံက်စွံအာ ဌာန်ဒၞာဲပါဲအသိၚ်ဂမ္တဴတံဂှ် သမ္မတသီုအဝဵု ဥူမေန်အံၚ်လှိုၚ် ကဵုလဝ်စၞောန်အမိၚ်ရ။
အတိုၚ် ဂွံလဝ်တၚ်နၚ် နူကဵုဂကောံရီုဗၚ်ဟံၚ်ပြာ်တံမ္ဂး ပ္ဍဲတွဵုရးမန် ဟိုတ်နူဘဲ အေလ်နဳညိုတုဲ ပ္ဍဲကဵုဂိတုဏံ မၞိဟ် ၅ တၠ ကတဴလုပ်တုဲ ချိုတ်အာလဝ်နွံရ။
သၞာံ ၂၀၂၆ ပ္ဍဲဂိတုနဝ်ဝမ်ပါကဵု ဒဳဇြမ်ပါ အကာဲအရာ သူပါအေလ်နဳညို စိုပ်အာသၠုၚ်အိုတ်ဂှ် အသိၚ်ဓာတ်ကတဴသၠုၚ်တုဲ လၟိဟ်မၞိဟ်ကဵုကိုတ်တံ ချိုတ်မာန်ရောၚ် တၠပညာပရေၚ်ဗြဲကျာ ဂၠးကဝ်တံ တော်ဆလဝ်ရ။
ပရိုၚ်-သြၚ်လောန်တိုၚ်မ်
Photo – CJ