မတ်မလီု ၊ အံက်တဝ်ပါ ၁၈
အပ္ဍဲကဵုဍုၚ်ဗမာ အခိၚ် အလဵုအသဳဒပ်ပၞာန် ပြံၚ်လှာဲအုပ်ဓုပ်လဝ် ပွိုၚ် ၆ ဂိတုဏံ ကပေါတ်စၞစသ္ဇိုၚ်ကီု ၚုဟ်ကပေါတ်နာနာတံဍၚ်တိုန် စိုပ်မံၚ်အကးရောၚ် ညးဍုၚ်ကွာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူဂိတုအေဗရာတေံ အခိၚ်ဒပ်ပၞာန်ပြံၚ်လှာဲတိုန်ဒှ် အလဵုအသဳ ပွိုၚ် ၆ ဂိတုဂှ် ကၟာတ်ထောံကပေါတ်နူဍုၚ်မ္ၚးတံ မဗ္တမ်ကဵုၚုဟ်ကၠေၚ်စက်ကီု စရိတ်ပလံၚ်ဗစိုပ်နာနာတံ သၠုၚ်တိုန်ကၠုၚ်မံၚ်ဆက်က်ဂှ် အကာဲအရာ ထပက်တိုန်မံၚ် စိုပ်အကးရောၚ်။
အခိၚ်အလဵုအသဳပၞာန်အုပ်ဓုပ်လဝ် ပွိုၚ် ၆ ဂိတုဏံ သ္ၚုပဝ်သာန်မွှိုယ်မွဲရိုက် နူကဵု ၂ ကိုတ်ဂှ် ဒှ်အာ ၂ ကိုတ် ၃ လက်ဒကေဝ်၊ ကၠေၚ်သတ်ဗြဴစ မွဲပဿာ နူ ၁၁,၀၀၀ ဒကဝ်ဂှ် သၠုၚ်တိုန်အာ စိုပ် ၂၅,၀၀၀ ဒကေဝ်ရ။
တုဲပၠန် သွက်ညးဍုၚ်ကွာန်တံ ခၟာဲစာၚ်မွဲမ နူ ၅၀၀ ဒကေဝ် စိုပ်အာ ၇၀၀၊ ကသိုန်ဗကေတ် မွဲပဿာ နူ ၆၀၀၀ ဒကဝ်ဂှ် သၠုၚ်တိုန်အာ စိုပ် ၁၂,၀၀၀ ဒကေဝ်တုဲ ကပေါတ်မွဲမွဲမ္ဂး နူကဵု ၃၀% ဒဵုကဵု ၆၀% ၚုဟ်ထပ်သၠုၚ်တိုန်အာရ။
အခိၚ်အလဵုအသဳပၞာန် အုပ်ဓုပ်လဝ် အကြာပွိုၚ် ၆ ဂိတုဏံ အနှေန်ၚုဟ်ကပေါတ်တံ ထပ်သၠုၚ်တိုန်အာ ၜိုတ်ကဝက်တုဲ ရဲကၠောန်မွဲတ္ၚဲစမွဲတ္ၚဲတံ အကာဲအရာဂွံစအာပုၚ်သွ ဟဂါပ် ဂွံဆက်အာဂှ် ဟွံလောဲသွာရပုဟ် ညးဗြဴပါၚ်ဖဴမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“အနှေန်ၚုဟ်ကပေါတ်တံ ထပ်သၠုၚ်တိုန်အာ ၜိုတ်ကဝက်။ ရဲကၠောန်မွဲတ္ၚဲစမွဲတ္ၚဲတံ ကၠောန်မွဲတ္ၚဲ ဂွံဂွံမွဲလက် မွဲလက်ဘာ်ဟီုဂှ် မာကလေအ်အိုတ်စောန်။ ဂွံမွဲလက် မွဲလက်ဘာ်လေဝ် သွက်ပရေၚ်စသုၚ်ကၟိန်အိန်ထံၚ်တံဂှ် ဟွံပြေပြံၚ်ပုဟ်။ သြန်ဂွံကဵု ၚုဟ်ကပေါတ်တံ ဟွံလောဲသွာ။ ညးဍုၚ်ကွာန်လ္ၚဵုတံ စိုပ်ဒဒိုက်ဟီုဂှ် ဒှ်အာဒဒိုက်ဗွဲမဂၠိုၚ်။ ဂွံစအာပုၚ် ဟဂါပ်ဂွံဆက်ဂှ် အကာဲအရာဟွံခိုဟ်ပုဟ်”သာ်ဝွံ သ္ဂးရ။
အနှေန်ၚုဟ်ကပေါတ်တံဍၚ်တိုန် ဟွံတန်ကဵုဆတုဲ ညးဍုၚ်ကွာန်လ္ၚဵု တံ နူကဵုသ္ၚုဗုဗု ဒးစသ္ၚုကဆံၚ်၊ ယှအ်ကပေါတ်မွဲအဆံၚ် စအာမံၚ် ကီုလေဝ် အနှေန်ၚုဟ်ကပေါတ်တိုန်ဂှ် ဗက်လက်ကရဴဟွံမာန်ရပုဟ် ညးဆက်ဟီုရ။
လၟုဟ်ပြဟ်ဟ်ဏံ ပ္ဍဲကဵုဖျာတံဂှ်တှ်ေ ဇၟာပ်ပ်အနှေန်ၚုဟ်ကပေါတ် ဍၚ်မံၚ်အိုတ်တုဲ အတိုၚ်အလုံမွဲသ္ၚိ ကၠောန်ကမၠောန်ကီုလေဝ် ဍံၚ်ဗက်လကရဴ အနှေန်ၚုဟ်ကပေါတ်တံ ဟွံမာန်ကီု ပ္ဍဲလက်ထက် အလဵုအသဳပၞာန် မုမွဲသာ်လေဝ် သွက်ဂွံတောတက်ဟွံမွဲ ဒှ်အာဍုၚ် လပါ်ဆုတ်စှ်ေမွဲရောၚ် ညးဗြဴပါ်ဖဴမွဲတၠပၠန်ဂှ် ပါ်ပါဲလဝ်ရ။
“ပ္ဍဲဖျာတံဂှ်တှ်ေ အနှေန်ၚုဟ်ကပေါတ် ဇၟာပ်ပ်အရာ သၠုၚ်မံၚ်သီုဖအိုတ်။ ဗက်ဟွံမာန်ပုဟ် ဒှ်မံၚ်။ မုဒှ်ရောတှ်ေ ဗက်ဂၠာဲပရေၚ်ပိုန်ဒြပ် ဇၟာပ်ပ်ဒၞာဲလေဝ် ဟွံပြေပြံၚ်ပုဟ်၊ ခေတ်လဝ်ဟွံခိုဟ်။ မၞိဟ်တံဟီုတှ်ေ ညံၚ်ကဵုကြပ်ချိုတ် သှ်ေမံၚ်ဍိုန်လျ စိုတ်ဓါတ်တံစှ်ေမံၚ်အိုတ်ယျ။ မုဍေံတံကၠောန်လေဝ် တောတက်ဟွံသေၚ်ပုဟ်။ မၞိဟ်တံဆုတ်ယောၚ် ဍုၚ်ကွာန်ဆုတ်စှ်ေအာရနွံ” သာ်ဝွံ သ္ဂးရ။
စိုပ်လက်ထက် အလဵုအသဳဒပ်ပၞာန်ပြံၚ်လှာဲလဝ်ဏံ ညးဍုၚ်ကွာန်တံ ဒးဇီုကပိုက်မံၚ်ကဵု ပရေၚ်ၚုဟ်ကပေါတ်သၠုၚ်ဍၚ်တံတုဲ ပြဿနာသြန်လုပ်တိတ်တံ ဟွံညဳသၟဟ် မဒှ်ရ။
ဖျေံမူဝါဒ ပရေၚ်ပၠုပ်ပတိတ်ဍုၚ်မ္ၚး ဟိုတ်နူအလဵုအသဳပၞာန် ဗၠေတ်ပၠေၚ်အာကီု ကပေါတ်ဟွံလုပ်သၞောဝ်ဂးတုဲ ထၜးဟိုတ် ရပ်ကေတ်ဏာသၟးဟွံက ထၜးဟိုတ်ပရေၚ်ဂီုကၠီု ဗက်ကံက် အာတ်မံၚ်သြန် ပ္ဍဲကဵုဂိက်သၞေဟ်ကၚ် ဟွံဆဟွံတန်တံဒှ်မံၚ်တုဲ ၚုဟ်ကပေါတ်တံ ဒးသၠုၚ်တိုန်အာဂၠိုၚ်ကဵုဆဂှ် တၠကမၠောန်တံ ထံက်ထၜးလဝ်ရ။
အပ္ဍဲလက်ထက်အလဵုအသဳဏံဂှ်တှ်ေ ညးဍုၚ်ကွာန်တံဒးဒုၚ်မံၚ်ဘဲ ပရေၚ်ၚုဟ်ကပေါတ်ဍၚ်သၠုၚ်တံဂှ် သမ္မတ ဥူမေန်အံၚ်လှိုၚ် ဒုၚ်လဝ်ဝန်တုဲ အပ္ဍဲဒေသ ညံၚ်ဂွံထပဵုကၠောန်အာ ပရေၚ်တဵုလွဳ အိုတ်ညိဂှ် ကဵုလဝ်စၞောန်ရောၚ်။
အပ္ဍဲဍုၚ်ဗမာ အပ္ဍဲကဵုမၞိဟ် ၅၀ ပြကောတိကိုတ်ပြၚ်တံဂှ် လၟိဟ်မၞိဟ် ၃၇ ပြကောတိတ်တံ ဒှ်အာညးတၠဒဒိုက်၊ သွက်ဂွံစိုပ်အာ ဘဝတၠဒဒိုက်တံဂှ် အကာဲအရာညာတ်အာတုဲ ဒးဇီုကပိုက်အာကဵု ပရေၚ်အန္တရာဲ ဒိုက်ဂတ်တံမာန်ရောၚ် နူကဵုအစဳဇန် ဖောအ်ဗြဳကုလသမဂ္ဂ UNDP လလောၚ်တြး ကဵုလဝ်သတိ ပ္ဍဲအံက်တဝ်ပါ ၈ ဂှ်ရ။
ပရိုၚ်-သြၚ်လောန်တိုၚ်မ်
Photo – Social Media