အပ္ဍဲသဘၚ်သဳကၠဳသၟတ်မန် သွက်ဂွံသဳကၠဳကိစ္စ ပရေၚ်ယိုက်ဝန်ပၞာန် ဗွဲတၟေၚ်ညိဂှ် NRFF ဗတိုက်ဖအောဝ်

ရေဝ် ၊ အံက်တဝ်ပါ ၁၉

ဥပဒေယိုက်ဝန်ပၞာန်ဝွံ ဒှ်မံၚ်ပရေၚ်ဘပဠ သွက်သၟတ်မန်တံတုဲ ပ္ဍဲကဵုသဘၚ်သဳကၠဳသၟတ်မန် ထေက်ကဵုဒးစွံသတိ စၚ်ခြၚ်သဳကၠဳအာ ညိဂှ် နူကဵုဇြဟတ်ရာမည ဖိတ်ဒရေဝ်ခေတ်တၟိ NRFF ကဵုဏာသတိ ပ္ဍဲအံက်တဝ်ပါ ၁၇ ဂှ်ရ။

အပ္ဍဲတွဵုရးမန် ပွိုၚ်ဍုၚ်ရေဝ် ဒၞာဲတိဍာ်ပရေၚ်သာသၞာ ကျာ်ဒဵုတၟံဗြာတ် စပ်ကဵုကၠောန် သဘၚ်သဳကၠဳဇၞော်သၟတ်မန် အလန်စတုတ္ထ ပ္ဍဲကဵု အံက်တဝ်ပါ ၁၇-၁၈ ဂှ်တုဲ နူကဵု NRFF ပလံၚ်ဗစိုပ်လဝ် လိက်ပံက်ထာၚ် ချူထ္မံက်လဝ်ရောၚ်။

အပ္ဍဲသဘၚ်သဳကၠဳဇၞော်သၟတ်မန်ဂှ် ဂကောံဇြဟတ်ကောန်ဂကူမန် နာနာ၊ ဂကောံမှာဇန်ညးဍုၚ်ကွာန်တံကဵု ညးစၞးဂကောံဇြဟတ် သၟတ်တံ နူအလုံကောန်ဂကူ ကဆံၚ်ခရိုၚ်၊ ပွိုၚ်ဍုၚ် အရာပ်ကွာန် တံကဵု သၟတ်ဆာန်ဂကူ နူကဵုဍုၚ်မ္ဂးတံ ဒှ်ဒၞာဲကၠုၚ်ဆဵုဂဗ ရေၚ်သ္ကံမွဲဒၞာဲရောၚ် NRFF သ္ဂးရ။

အပ္ဍဲအကာဲအရာ သၟဝ်အာဏာစက်ပရေၚ်အုပ်ဓုပ် အလဵုအသဳပၞာန်ဂှ် ရံၚ်အာအကာဲအရာ ကာလ၊ ဒေသ၊ ပယောဂတံတုဲ ဒးကၠောန်လဝ် သဘၚ်သဳကၠဳဇၞော်သၟတ်မန်မ္ဂး ပရေၚ်သဳကၠဳဗၠးဗၠးၜးၜး စပ်ကဵု အကာဲအရာပရေၚ်ဂီုကၠီု သွက်ဂွံဒးဒှ်ဒွိၚ်နွံရောၚ်ဂှ် ကဵုလဝ်သတိရ။

တုဲပၠန် သဘၚ်သဳကၠဳဇၞော် သၟတ်နူကဵုဂကောံဇြဟတ် ကၠောန်မံၚ်ပၠန်ဂတးတံ ပါလုပ်ဟွံမာန်မ္ဂး သွက်ဂွံသ္ပအာစၞးသၟတ်မန် အလုံကောန်ဂကူဟွံရုံဂပ်ဏီဂှ် ထေက်ကဵုဒးစွံသတိ သ္ပအာဂရုရောၚ် ထံက်ထ္ၜးလဝ်ရ။

အပ္ဍဲကဵုအရာပရေၚ်ကေၚ်ကာ သၟတ်တံဟီုမ္ဂး ပရေၚ်ပညာ၊ ပရေၚ်ထတ်ယုက်၊ အခေါၚ်အရာ ကမၠောန်တံသၟးဟွံက ပရေၚ်ဂီုကၠီု ဘဝမၞိဟ်တံ ညံၚ်ဂွံဂျိုၚ်တဴမံၚ်စံၚ်အာ ဂုဏ်သိက္ခာနွံနွံဂှ် ဒှ်ပရေၚ်ကိစ္စ ဇၞော်ရောၚ် ချူထ္မံက်လဝ် ပ္ဍဲကဵုလိက်ပံက်ထာၚ်ဂှ်ရ။

စပ်ကဵုဥပဒေ ယိုက်ဝန်ပၞာန်အဓ္ဓမ အလဵုအသဳပၞာန်ကၠောန်မံၚ်ဂှ် သွက်သၟတ်ဒေသတံကီု သၟတ်အလုံကၟိန်ဍုၚ်မွဲကီု ဘပလမံၚ် ပရေၚ်ဂီုကၠီု လမျီုဘဝသၟတ်မန်တံတုဲ ဍဵုဍိုက်ပျဲပျာံ ကဵုမံၚ်ဒဒိုက်စိုတ် ကာယ မိမမန်တံရောၚ် NRFF သ္ဂးရ။

တုဲပၠန် သၟတ်မန်တံညံၚ်ဂွံသ္ၚောဲခြာအာ နူကဵုဌာန်ဒၞာဲ ပွဳဗွိုၚ်ဇကုတံဂှ် ကဵုမံၚ်ဇြဟတ်ဟရိုဟ် ထဍေၚ်ပတိတ်မံၚ်တုဲ ဒှ်မံၚ်ပရေၚ်ပထုဲပလီု ဒြပ်ရတ်ပိုန်ဟာန်လမျီု ကၟိန်အိန်ထံၚ်တံဂှ်ရ ပ္ဍဲကဵုသဘၚ်သဳကၠဳဏံ ထေက်ကဵုစွံသတိ သဳကၠဳအာညိဂှ် ကဵုလဝ်သတိကီုရ။

စပ်ကဵုပရေၚ်ယိုက်ဝန်ပၞာန် ရာန်ကေတ်မၞိဟ်တုဲ ထပက်မံၚ်အဇာ အကာဲအရာဗီုပြၚ် ဒးသောၚ်ကလးကေတ်မံၚ် ဍာ်ဇမၠိဏံ ညးစၞးစၠတ်ထဝ်တံလေဝ် ဒတူလိုၚ်ဗၠးဗၠးၜးၜးတုဲ သွက်ဂွံသောၚ်ကလးကဵုအာ အကာဲအရာဟွံမွဲပုဟ် ညးအခေါၚ်နွံဟီုဂး NRFF နာဲပဳတာ ဟီုကဵုဌာန်ပရိုၚ် သြၚ်လောန်တိုၚ်မ်ရ။

ဟိုတ်ဂှ်ရ ပ္ဍဲကဵုအရာဗတိုက်သရိုဟ်အာ သၞောတ်တၠအဝဵုပၞာန် ညံၚ်ဂွံဒေါအ်ထောံ ပရေၚ်ဍဵုဍိုက်နာနာတံမာန်ဂှ် နဲကဲထမံက်ရုပ်ရဴ ပရေၚ်ဍုၚ်ကွာန် ဟွံတုပ်သၟဟ်ကီုလေဝ် အလုံသၟတ်မန်တံ ထေက်ကဵု ဒးပံၚ်တောဲအာ ကောံကောံကလောအ်ကလောအ် မွဲစွံရောၚ် ညးထံက်ထ္ၜးလဝ်ရ။

“စပ်ကဵုပရေၚ်ပၠန်ဂတး ပရေၚ်ဍုၚ်ကွာန် လညာတ်ဝိဝါဒဗီုပြၚ်တၞဟ်ခြာမံၚ်တံ နဲကဲထမံက်ရုပ်ရဴ ဗီုပြၚ်ဟွံတုပ်သၟဟ်ကီုလေဝ် ဟွံမွဲပၟိက်သၞောတ်တၠအဝဵုပၞာန် တင်တုပ်စိုတ်ဘုံမွဲ အပ္ဍဲကဵုပိုဲညးတံ တုပ်သၟဟ်မံၚ်ညးသ္ကံရ။ ပရေၚ်ဍဵုဍိုက်ဗီုတံဏံ ညံၚ်ဂွံဒေါအ်အာဟီုဂှ် အကာဲအရာ ဒးထပိုတ်အာရိုဟ်ကၞက်သၞောတ်တၠအဝဵုပၞာန်ရောၚ်။ ပ္ဍဲအကာဲအရာဏံ နကဵုသၟတ်တံ စှ်ေပရေၚ်စက်ဒက် သွက်ဂွံပံၚ်တောဲရေၚ်တၠုၚ်အာ ကောံကောံကလောအ်ကလောအ်မွဲစွံတုဲ မိက်ဂွံထံက်ထၜးကဵု အကာဲအရာဏံ မဒှ်ရ” သာ်ဝွံ သ္ဂးရ။

သၟတ်တန်တဴမံၚ် အပ္ဍဲဗွိုၚ်တိဍာ်ဒပ်ပၞာန်ဗမာတံ ထိၚ်ချုက်လဝ်ဂှ် ဒးဇီုကပိုက်မံၚ်ကဵု ကိစ္စပကောံကေတ်မံၚ် ပရေၚ်ယိုက်ဝန်ပၞာန်တံ ဇၞော်ကဵုဇြဟတ်တုဲ သွက်သၟတ် စိုပ်မံၚ်ဍုၚ်မ္ၚးတံမ္ဂး ဗွဲတိုက်ရိုက်ကီုဒှ် မွဲအဆံၚ်ကီုဒှ် ဒးဆဵုဂဗမံၚ်ကီုရောၚ် နာဲပဳတာ ဆက်ဟီုရ။

လၟုဟ်ပြဟ်ဟ်ဏံ ပံက်လဝ်ဘာယိုက်ဝန်ပၞာန် စိုပ်မံၚ်လၟေၚ် ၂၉ ဂှ် ပကောံဂွံလဝ် ဇြဟတ်ကောန်ပၞာန်တၟိ မွဲကိုတ်ပြၚ်နွံတုဲ အတိုၚ်တၚ်နၚ် နူကဵုဌာန်ပရိုၚ်သြၚ်လောန်တိုၚ်မ် ပကောံလဝ်မ္ဂး ပ္ဍဲကဵုတွဵုရးမန် ပကောံဂွံလဝ်သၟတ် ၆၀၀၀ ပြၚ်အာယျ။

သၟတ်ဒးဒုၚ်ပကောံဏာ ပရေၚ်ယိုက်ဝန်ပၞာန် ဗွဲမဂၠိုၚ်တံဟီုဂှ် အခိၚ်အာ စဴနူကမၠောန် ဒးဒုၚ်ရပ်ဂှ်ကီု၊ ရဲတိတ်မ္ၚးအခိၚ်ဗတမ်တံဂှ် စောဲစပ် ဖံက်ပကဝ်အမိၚ်ဒေသန္တဂးတုဲ ရပ်ကၠေၚ်ဏာသၟးဟွံက ဗက်ထဍေၚ်ရပ်ကေတ်လဝ် နူအပ္ဍဲသ္ၚိတံလေဝ် ပါမံၚ် မဒှ်ရ။

သွက်အလုံညးဍုၚ်ကွာန်မန်တံ အခေါၚ်သၠးပွး ပရေၚ်ညဳသၟဟ် ပရေၚ်တုပ်သၟဟ်ကေုာံ အခေါၚ်အဝဵုပိုၚ်ပြဳဇကုဇကု သုန်ဂြာံအာလဝ် သၞာံဗွဲမလံလကာဖာတုဲ သွက်ဂွံကေတ်ဇၞး ဂကောံပၞာန် ဖံက်ပကဝ်မံၚ်အခေါၚ်အရာမၞိဟ် အမှုအရာဇဝတ်ပၞာန်တံမာန် သၟတ်မန်တံညံၚ်ဂွံသဳကၠဳအာဂှ် NRFF ဗတိုက်ဖအောဝ်လဝ်ရောၚ်။

သွက်ပရေၚ်ဗၠးၜးကောန်ဂကူမန်ဂှ် ဒှ်အာပရေၚ်တာဒၞာသၟးဟွံက ဍဵုဍိုက်ထိၚ်ဒဝ်လဝ် ဇြဟတ်သၟတ်မန်တံတုဲ သၞောတ်တၠအဝဵုပၞာန် ခေတ်အဆက်က် ၚိတ်ကလက် တက်ပကဝ်လဝ် ဥာဏ်ပညာ သၟတ်မန်ဇၞော်ဇၞော်ပြဲပြဲတံဂှ် အလုံသၟတ်မန်တံဒစဵုဒစးအာတုဲ ညံၚ်ဂွံပံၚ်တောဲပၠန်ဂတးအာညိဂှ် ဗတိုက်ဖအောဝ်လဝ်ကီုရ။

အပ္ဍဲကဵုတၚ်ရန်တၟံ ကၠောန်သဘၚ်သဳကၠဳ ကောံဓရီုဇၞော် သၟတ်မန်တံဂှ်လေဝ် အပ္ဍဲအကာဲအရာလၟုဟ်ဏံ သွက်ဂွံသ္ၚဳဂၠိပ်အာ အကာဲအရာသၟတ် ကေုာံ သၠာဲဂတးလညာတ် အကြာသၟတ်မန်တံကီု၊ အကြာပွိုၚ် ၂ သၞာံဏံ ဌာန်ကောံသၟတ်မန် ပရေၚ်ဗီုပြၚ်ချဳဒရာၚ်ကၠုၚ် လဝ်နာနာတံ ပါလုပ်ရ။

တုဲပၠန် ကလေၚ်သ္ၚဳဂၠိပ်အာ မူဝါဒသၟတ်မန်ကဵု မဟာဗျူဟာတံကီု၊ ဖျေံအာပရေၚ်ကမၠောန်ဌာန်ဂတ၊ ပရေၚ်ရုဲစှ်ကမ္မတဳ ဆက်ကေတ် အာတာလျိုၚ်တၟိကဆံၚ်ၚ်တံဂှ် ရန်တၟံတုဲကၠောန်လဝ်ဂှ် နကဵု NRFF မိပ်စိုတ်ဒုၚ်တၠုၚ်ရောၚ် ကဵုလဝ်သမ္တီ အပ္ဍဲကဵုလိက်ပံက်ထာၚ်ဂှ်ရ။

ပရိုၚ်-သြၚ်လောန်တိုၚ်မ်

Photo – NRFF