အပ္ဍဲဒေသမန် အခိၚ်ပၟတ်ဓါတ်လလဳပိုတ် ပဵုပရေံအာ

မတ်မလီု ၊ အံက်တဝ်ပါ ၂၀

အလုံတွဵုရးမန်မွဲ အခိၚ်ပၟတ်ဓါတ်လလဳပိုတ် ပဵုဂၠိုၚ်ကၠုၚ်တုဲ ပၟတ်ကၠုၚ်မံၚ်ဆၜိုတ်အခိၚ်နာဍဳဍောတ်မွဲဟေၚ် ဂွံမံၚ်ဂှ်ရ ပရေၚ်အခက်ခုဲပိုန်ဒြပ်မၞိဟ်တံ ပဵုကြေပ်တိုန်မံၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။

အလဵုအသဳပၞာန် ထ္ၜးဟိုတ် ဥတုရာသဳအေလ်နဳညိုတုဲ ဂေတ်အလန်ပါ်တြးပရအ်ကဵုအာ ပၟတ်ဓါတ်လလဳ အလုံဍုၚ်မွဲရောၚ် လလောၚ်တြးလဝ်ရ။

ဗီုပြၚ်ပါ်တြးပရအ်ကဵုမံၚ် သၞောတ်ပၟတ်ဓါတ်လလဳ အပ္ဍဲပွိုၚ်မွဲတ္ၚဲ ကဵုပွိုၚ် ၈ နာဍဳ၊ ကဵု ၂ နာဍဳ ထပိုတ် ၆ နာဍဳ၊ ကဵု ၄ နာဍဳ ထပိုတ် ၆ နာဍဳ၊ ကဵု ၂ နာဍဳ ထပိုတ် ၆ နာဍဳ မဒှ်ရ။

ဆဂး အပ္ဍဲဒေသတွဵုရးမန် ဗွဲမဂၠိုၚ် ပွိုၚ်မွဲတ္ၚဲမ္ဂး ပၟတ်ကၠုၚ်မံၚ်အကြာပွိုၚ် ၂ နာဍဳကဵု ၜိုတ် ၄ နာဍဳဟေၚ်နွံတုဲ ပ္ဍဲကွာန်လ္ၚဵုတံ ပွိုၚ်မွဲတ္ၚဲဂွံပၟတ်ဓါတ်လလဳ ဆၜိုတ်မွဲၜါနာဍဳဟေၚ် ညးဒေသတံ ဟီုရ။

အခိၚ်ပၟတ်ဓါတ်လလဳပိုတ် ပဵုဂၠိုၚ်ကၠုၚ်တုဲ စနူကဵုတောမ်ပုၚ်သွ၊ ပတိုန်ဍာ်တံဒှ်အခက်ခုဲဂှ်ကီု ပရေၚ်ပိုန်ဒြပ် အဇာဍောတ် အဇာအဒေါဝ်တံ ပရေၚ်ဇီုကပိုက်ဂၠိုၚ်တိုန်မံၚ် မဒှ်ရ။

ဟိုတ်နူဟွံဂွံဓါတ်လလဳတုဲ ကမၠောန်ပရေၚ်ပိုန်ဒြပ် အဇာဍောတ် အဇာအဒေါဝ် ဂွံဗဂေတ်အာမာန် ဒးရာန်မံၚ်ကၠေၚ်စက် နူကဵုဗွဝ်ဖျာဒမၠုတံတုဲ စရိတ်ၚုဟ်မးကၠောန်ပတိတ်တံသၠုၚ်တိုန်အာ ဟွံတန်ကဵုအဆရောၚ် တၠကမၠောန်မွဲ ဟီုရ။

ဟိုတ်နူအခိၚ်ပၟတ်ဓါတ်လလဳပိုတ် ပဵုဂၠိုၚ်ကၠုၚ်ဂှ် ၚုဟ်ကပေါတ်တံ ထပ်ဍၚ်တိုန်ကၠုၚ်မာန်ရောၚ် သၟာပရေၚ်ပိုန်ဒြပ်တံ ထံက်ထ္ၜးလဝ်ရ။

အခိၚ်ပၞာန်သီအဝဵု ကြပ်ပေၚ်ကာလပွိုၚ် ၆ သၞာံဏံ ပရေၚ်ပၟတ်ဓါတ်လလဳပိုတ် ဒှ်အခိၚ်ပရေအ်အိုတ်တုဲ လ္တူပရေၚ်အုပ်ဓုပ်အလဵုအသဳပၞာန် အကြာညးဍုၚ်ကွာန်တံ ပရေၚ်ပါ်ပါဲဇၞော်ကဵုဇြဟတ် နွံရ။

ဟိုတ်နူ ဥတုရာသဳအေလ်နဳညို အသိၚ်ဂမ္တဴသၠုၚ်တိုန်တုဲ ပရေၚ်သုၚ်စောဲဓါတ်ပၟတ်ဂၠိုၚ်တိုန်ဂှ်ကီု၊ ဒၟာနူနွံတိုန်ပၟိက်ဇြဟတ်ပၟတ်ဂၠိုၚ်ဂှ်ရ ဂေတ်ကဵုအလန်ပါ်ပရအ်ကဵုအာ ပၟတ်ဓါတ်လလဳရောၚ် အလဵုအသဳပၞာန် လလောၚ်တြးလဝ်ရ။

ပရိုၚ်-သြၚ်လောန်တိုၚ်မ်

Photo – Social Media