ဘာအၚ်၊ အံက်တဝ်ပါ ၂၀
အပ္ဍဲကဵုတွဵုရးကရေၚ် ဍုၚ်ဘာအၚ် သွက်ဂွံကၠောန်ဗဒှ် ပေါဲသဘၚ်ဇၞော် တ္ၚဲတွဵုရးကရေၚ် မရနုက် ၇၁ ဝါ ကြပ်စိုပ်ကၠုၚ် ၜိုတ်ပွိုၚ် ၂၀ တ္ၚဲဟေၚ်နွံဏံဂှ် ရဲမဝ်တဝ်ပဳကေဝ် အလဵုအသဳပၞာန်တံ သၠုၚ်အသိၚ်ဗက်ဂၠာဲရပ်မံၚ် ကွဳစက်လိုၚ်သေၚ်ဟွံမွဲတံဂှ် ရဲမံၚ်လ္တူဍုၚ်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲဂိတုအံက်တဝ်ပါဏံ အကြာလ္တူဍုၚ်ဘာအၚ်ကီု မ္ၚးဍုၚ်တံကီု မဝ်တဝ်ပဳကေဝ်တံ ဂေတ်မံၚ်ကဵုကွဳစက်တုဲ ဆဵုညာတ်ကွဳစက်ကွဳလိုန်ဓါတ် ဒဳအာကၠုၚ်မံၚ် လ္တူဂၠံၚ်တံမ္ဂး စၟဳစၟတ်လိုၚ်သေၚ်တုဲ ဗက်သီကေတ်မံၚ်ရောၚ်။
ၐိုန်ရရပ်ဂွံဏာ ကွဳစက်လိုၚ်သေၚ်ဟွံမွဲ လၟိဟ်ဗွဲမဂၠိုၚ်ကီုလေဝ် ပတိုန်ထ္ၜးစုတ်လဝ်စရၚ်ညိညိ ဟွံစုတ်စရၚ်ဂှ်သ္ပလဝ်ဂၠိုၚ်ၚ်ဂှ် အာတ်မိက် သြန်လၟိဟ်ကဵုစှော်တုဲ ကလေၚ်ဗလးကဵုလဝ်တံဂှ် ရဲမံၚ်လ္တူဍုၚ်တံ သ္ဂးရ။
မဝ်တဝ်ပဳကေဝ်တံ ရပ်မံၚ်ကွဳစက်လိုၚ်သေၚ်ဟွံမွဲ ဟီုဂှ်တှ်ေ ကၠောန်စမံၚ် ပရေၚ်အာတ်ဓရတ်သြန်တံတုဲ ကွဳစက်ဂကောံရပ်လွဟ်တံ လိုၚ်သေၚ်ဟွံမွဲဂှ် ရပ်သီဏာလဝ်ဟွံမွဲပုဟ် ရဲမံၚ်လ္တူဍုၚ်ဘာအၚ် မွဲတၠ သ္ဂးရ။
မွဲလပါ်ပၠန် စိုပ်အံက်တဝ်ပါ ၂၆ ဂှ် ပေါဲသဘၚ်ဂိတုဝှ်ပေၚ်ကီု ပ္ဍဲနဝ်ဝမ်ပါ ၇ ဂှ် ပေါဲသဘၚ်ဇၞော် တ္ၚဲတွဵုရးကရေၚ် မရနုက် ၇၁ ဝါကီု သွက်ဂွံကၠောန်အာမိပ်ပ်ဇြိပ်ပ်မာန် သ္ကိုပ်ဝန်ဇၞော် ဥူသဝ်မျေအ်ဥူ စဳဇန်မံၚ်ရ။
ပေါဲသဘၚ်ဂိတုဝှ်ပေၚ်ကီု ပေါဲသဘၚ်ဇၞော် တ္ၚဲတွဵုရးကရေၚ်ကီု မိက်ဂွံကၠောန်အာမိပ်ပ်ဇြိပ်ပ်မ္ဂး လ္ပရပ်ကွဳစက်ယာန် လိုၚ်သေၚ်ဟွံမွဲတံညိဂှ် ညးဒေသတံ ထံက်ထ္ၜးဟီုဂးမံၚ်ကီုလေဝ် အလဵုအသဳပၞာန် တွဵုရးကရေၚ်ဂှ် ဆက်ရပ်မံၚ်ကွဳစက်လိုၚ်သေၚ်ဟွံမွဲတံ မဒှ်ရ။
တုဲပၠန် သွက်ပေါဲသဘၚ်ဇၞော်တ္ၚဲတွဵုရးကရေၚ်ဂှ် မွဲသ္ၚိအောန်အိုတ် ဒးစုတ်လဝ်သြန် ၂၀၀၀၀ နွံတုဲ ဟိုတ်နူဒးစုတ်လဝ်သြန်ဂှ်ရ သွက်ညးဍုၚ်ကွာန်သ္ဇိုၚ်တံ ဒှ်မံၚ်ပရေၚ်အခက်ခုဲရောၚ် ညးဒေသတံ သ္ဂးရ။
သွက်ပရေၚ်ယိုက်ဝန်ပၞာန်တံဂှ်လေဝ် ဒးစုတ်ကဵုမံၚ်သြန် လၟေၚ်ဂိတုတံနွံတုဲ လၟုဟ်ပၠန် သွက်ပေါဲသဘၚ်ဇၞော် တ္ၚဲတွဵုရးကရေၚ် ဂးတုဲ ဒးစုတ်ကဵုမံၚ်သြန် ဂကောံပရေၚ်အုပ်ဓုပ်ကီု သွက်ဂွံကၠောန် ပေါဲပြိုၚ်တေအ်ဗဝ်ဂးတုဲ ဇၟာပ်သ္ၚိ ဒးစုတ်ကဵုမံၚ်သြန် ၂၀၀၀၀ ဒကေဝ်ဂှ်လေဝ် သ္ဂးရ။
အကြာၚုဟ်ကပေါတ်ဍၚ် ထပက်တိုန်မံၚ်အကးဏံ ဂကောံပၞာန်တံ ဗက်ကံက်မံၚ်သြန် မွဲဏှမွဲဏှတုဲ အကြာကျာတ်ဝါတ်မံၚ်တံဂှ် ညးဍုၚ်ကွာန်တံ ဒးစုတ်ကဵုမံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media