မတ်မလီု ၊ အံက်တဝ်ပါ ၂၀
အပ္ဍဲတွဵုရးမန်ကဵု ကရေၚ် သွက်ဂွံတဵုထပဵုအာ တၞံရာဘာကဵုဒူရေၚ်တံဂှ် ဒုတိယသမ္မတ အလဵုအသဳပၞာန် ဥူညိုသဝ် ကဵုလဝ် စၞောန်ပ္ညုၚ်ရ။
အပ္ဍဲကဵုအံက်တဝ်ပါ ၁၈ အခိၚ်ဒုသမ္မတ ဥူညိုသဝ် စိုပ်ကၠုၚ်ဍုၚ်ဘာအၚ် တွဵုရးကရေၚ်ကဵု ဍုၚ်မတ်မလီု တွဵုရးမန်တံဂှ် ကဵုလဝ်စၞောန်ပ္ညုၚ်ကု သ္ကိုပ်ဝန်ဇၞော် တွဵုရးမန်ကဵု တွဵုရးကရေၚ် ကေုာံ ညးတာလျိုၚ် ဆေၚ်စပ်တံရောၚ်။
အပ္ဍဲတွဵုရးမန် တွဵုရးကရေၚ်ကဵု ရးတနၚ်သဳတံ ဒေသမွဲကဵုမွဲ ပရေၚ်ဆက်စပ်နွံမံၚ်ညးသ္ကံတုဲ ဥတုရာသဳကီု သဘာဝတိဍာ်တံလေဝ် တုပ်သၟဟ်ဂှ်ကီု ဟိုတ်ဂှ်ရ တၞံသတ်ဗြဴကၠေၚ်၊ ရာဘာကဵု ဒူရေၚ်တံ ညံၚ်ဂွံအံၚ်ဇၞး ထပဵုတုဲတဵုလွဳအာညိဂှ် ဥူညိုသဝ် ဟီုရ။
တုဲပၠန် ပရေၚ်တဵုလွဳညံၚ်ဂွံအံၚ်ဇၞးမာန် တၞံအာယုက်ဇၞော်ဇၞော်တံဂှ် ထပက်အဇာတဵုလွဳအာ နကဵုတၞံဂကူမခိုဟ်ဟ်တံတုဲ အကြာဂှ် ကရေပ်တဵုစုတ်အာ တၞံကဝ်ဖဳကဵု ကိုဝ်ဝ်တံကီုဂှ် ကဵုလဝ်စၞောန်ပ္ညုၚ်ရ။
ဒုသမ္မတ ဟီုလဝ်သွက်ဂွံတဵုအာရာဘာကီုလေဝ် ပ္ဍဲဗလးတံမ္ဂး တိသွက်ဂွံတဵုရာဘာညိလေဝ်ဟွံမွဲတုဲ သွက်ဂွံတဵုကရေပ်တဵုစုတ်အာ ကဝ်ဖဳကဵုကိုဝ်ဝ်တံ ဒှ်ဟွံမာန်ပုဟ် ညးတၠကမၠောန်ရာဘာမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“သွက်ဂွံထပ်တဵုအာ ရာဘာတံဂှ် တိဟွံမွဲရပုဟ်၊ အိုတ်မံၚ်ယျ။ ဒှ်မံၚ် တိရာဘာဖအိုတ်ရဏောၚ်၊ ဟွံမွဲရပုဟ်။ သွက်ဂွံထပ်တဵုအာ သၞောတ်တြေံဟီုဂှ် ဟွံလောဲသွာပုဟ်။ သၞောတ်တြေံတံဂှ် ဗရံၚ်တံ ကၠေတ်မံၚ်၊ ဗရံၚ်ကၠေတ်တုဲ နူဏံဂၠိၚ်တိတ်အာဂှ် ဟွံဒှ်ကမၠောန်ပုဟ်။ ကဝ်ဖဳကဵု ကိုဝ်ဝ်တံဂှ် ဒးကလေၚ်တဵုတၟိမှ ဂွံဏောၚ်” သာ်ဝွံ သ္ဂးရ။
တုဲပၠန် သွက်ဂွံထပ်တဵုရာဘာဟီုမံၚ်ကီုလေဝ် ပြဟ်ဟ်ဏံ နူကဵုရာဘာတံဏံ ညံၚ်ဂွံဒှ်အာကပေါတ်ပတိတ် အစောန်စရာဲနွံနွံတံကီု ဂအာၚ်ဗွဝ်ဖျာ ဂွံၚုဟ်ဂၠးကဝ်တံဂှ် ညးတာလျိုၚ်တံ ဖန်ဖက်ဂၠာဲကဵုထေက်ရောၚ် ညးဆက်ဟီုရ။
မွဲလပါ်ပၠန် တၞံသြောံဂန်ဂှ် ညံၚ်ဂွံကၠောန်အာ သွက်စၞစတိရိစ္ဆာန်တံကီု ဘဝပိုန်ဒြပ်မၞိဟ် သွက်ဂွံတောတက်အာ ကေုာံ သွက်ကဏ္ဍ ပရေၚ်ဖောအ်ဗြဳ တဵုလွဳ၊ ကပေါတ်တိတ်နူပရေၚ်တဵုလွဳတံ ညံၚ်ဂွံဒှ် ကပေါတ်နွံကဵုၚုဟ်မး ကၠောန်ပတိတ်အာညိဂှ် ဥူညိုသဝ် ကဵုလဝ်စၞောန်ပ္ညုၚ်ရ။
အတိုၚ်ဗီုဏံ ဒုသမ္မတ ဟီုမံၚ်သွက်ဂွံထပ်တဵုအာ ကမၠောန်ပရေၚ်တဵုလွဳကီုလေဝ် ကာလဒးကၠောန်မ္ဂး ဂၠာဲသၟာကမၠောန် ဝါတ်ဂါတ်ဂှ်ကီု ကပေါတ်ဒးစုတ်ပ္ဍဲပရေၚ်တဵုတွဳတံ ၚုဟ်ဍၚ်မံၚ်အိုတ်အစောန်တုဲ စရိတ်ပရေၚ် ပတိတ်ကပေါတ်နာနာသာ်တံ သၠုၚ်မံၚ်အိုတ်စောန်ဂှ်ရ ရဲသၟာတဵုလွဳတံ ဒးဆဵုဂဗမံၚ်ကဵု ပရေၚ်အခက်ခုဲတံ မဒှ်ရ။
ပရိုၚ်-သြၚ်လောန်တိုၚ်မ်
Photo – CJ