မတ်မလီု ၊ အံက်တဝ်ပါ ၂၀
ဂကောံဒုၚ်သ္ဇိုၚ်ပၠန်ဂတးတမ်ကညၚ်တံကဵု မဟာမိတ် ကောန်ဍုၚ်အရၚ်တံ ဒပ်ပတန်လဝ်ဗီုပြၚ်ဒပ်ပံၚ်ကောံ ပ္ဍဲကံၚ်သဳပၠတရဴဖိတ်ဒရေဝ် SCEF ဂှ် သွက်ဂွံပါလုပ်အာ အပ္ဍဲဂကောံဇြဟတ်ပၠန်ဂတးမန်တံဂှ် ချပ်ဗစာမံၚ်ဖိုအ်ရောၚ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
ကံၚ်သဳပၠတရဴထမံက်ရုပ်ရဴ ဖိတ်ဒရေဝ်ဒဳမဝ်ကရေသဳ SCEF ကဵု ဂကောံဇြဟတ်ပၠန်ဂတးမန်တံ နူကဵုအန်လိုၚ် သဳကၠဳလဝ် အလန်ဒုတိယ ပ္ဍဲအံက်တဝ်ပါ ၁၆ ဂှ် SCEF လလောၚ်ပတိတ်လဝ် ပရိုၚ်ရ။
ညးစၞးနူကဵု SCEF ကေုာံ ဗော်ဍုင်မန်တၟိ(ဗ္တိုက်သရိုဟ်တၠအဝဵုပၞာန်) NMSP-AD၊ ကံၚ်သဳဖိတ်ဒရေဝ်ဍုၚ်မန် MSFC၊ ကံၚ်သဳညးမဒုၚ်ချပ်ဂၞန် တွဵုရးဍုၚ်မန် MSCC၊ ကမ္မတဳသ္ပစၞးစၠတ်ထဝ်တွဵုရးမန် CRMH တံ ကၠောန်သ္ပလဝ် ကောံဓရီုရ။
စပ်ကဵု လၟေၚ်ကမၠောန်ပရေၚ်ဍုၚ်ကွာန် SCEF ဂှ် ဂကောံညးအုပ်ကာ ပဒိုသဝ်တာဒိုမူ ပတိုန်ထ္ၜးတုဲ မွဲလပါ်ကဵုမွဲလပါ် ကၠောန်လဝ်ပရေၚ်သၟာန်သှ် ချပ်ဗစာလဝ်ရေၚ်သ္ကံနွံရောၚ် ချူလဝ်အပ္ဍဲ လိက်လလောၚ်တြးလဝ်ရ။
သွက်ဂွံပါလုပ်အာ ပ္ဍဲဒပ်ပံၚ်ကောံ SCEF ဂှ် အကြာဂကောံဇြဟတ် ပၠန်ဂတးမန်တံ အကာဲအရာချပ်ဗစာလဝ်နွံရောၚ် အတိုၚ်က္ဍိုပ်သ္ကိုပ်တိုန်စိုပ်လဝ် ကောံဓရီုတံ ပၠလဝ်တရဴဂှ် ညးနွံအခေါၚ်ဟီုဂး NMSP-AD ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပရေၚ်ကမၠောန် SCEF တံဂှ် နူလပါ်က္ဍိုပ်သ္ကိုပ် SCEF သောၚ်ကလးဏာလဝ် နွံ။ တုဲပၠန် က္ဍိုပ်သ္ကိုပ် AD ပိုဲ စပ်ကဵုပရေၚ်ကမၠောန်ဏံ သၟာန်ဏာလဝ် ချပ်ဗစာလဝ် နွံ။ ပရေၚ်ဏံ ဒှ်အဓိကရ။ မွဲတၚ်ပၠန် သွက်ဂွံပါလုပ်အာ SCEF ဂှ် အကြာဂကောံဇြဟတ်ပၠန်ဂတးမန်ပိုဲတံ အကာဲအရာ ချပ်ဗစာစမံၚ်ဖိုအ်ဏီ” သာ်ဝွံ သ္ဂးရ။
တုဲကၠုၚ်ဂိတုဂျူလိုၚ် ၂၁ ဂှ်လေဝ် ညးစၞး SCEF တံကဵု ညးတာလျိုၚ် နူကဵုဂကောံဇြဟတ်ပၠန်ဂတးမန်တံ အလန်ပထမ ဆဵုဂဗ လ္တူအန်လိုၚ်တုဲ ချပ်ဗစာစလဝ်နွံကီုရ။
ဂကောံဇြဟတ်ပၠန်ဂတးမန်တံသီုဖအိုတ် ပါလုပ်အာပ္ဍဲကဵု SCEF ကောံကလောအ်မွဲစွံတုဲ သ္ပအာစၞးသွက်တွဵုရးမ္ဂး သွက်ဂွံကၠောန်အာ ပရေၚ်ပံၚ်တောဲပရေၚ်ဍုၚ်ကွာန်ကဵု ပရေၚ်ပၞာန်တံဂှ် သဳကၠဳလဝ်ရောၚ် ဥက္ကဌ ကမ္မတဳပရေၚ်အုပ်ဓုပ် ကံၚ်သဳဖိတ်ဒရေဝ်ဍုၚ်မန် နာဲမန်သာၚ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
နကဵု SCEF ဝွံ ဒ္တူဒလိုင်အာ “ပရေၚ်မူဝါဒမွဲ၊ မဟာဗျူဟာမွဲဟေၚ်” ကေမ်ရပ်လဝ်မူဝါဒဏံတုဲ ပ္ဍဲအရာကဏ္ဍပရေၚ်ပၞာန်၊ ပရေၚ်ဍုၚ်ကွာန် ကေုာံ ပရေၚ်အုပ်ဓုပ်တံ ဟလေၚ်ညဳညဳ ပံၚ်တောဲပါလုပ်တုဲ ညံၚ်ဂွံဒှ် သ္ပစၞးပရေၚ်ဍုၚ်ကွာန်သၠဲသၠဲလးလးမာန်ဂှ် ဆက်ပ္ညဳပ္ညပ်ပံၚ်တောဲကၠောန်အာကဵု ဂကောံဇြဟတ်မဟာမိတ်တံဂှ် ကဵုဏာလဝ်သမ္တီရောၚ်။
သွက်အရာဏံ တုဲကၠုၚ်ဂိတုဂျူလိုၚ် သတ္တဟတတိယတေံတုဲ နူကဵု SCEF နကဵုအလန်ပထမ ဆဵုဂဗလဝ်ကဵု ဂကောံမဟာမိတ် ရခေၚ်၊ မန်ကေုာံ ပအိုဝ်တံသၟးဟွံက ဂကောံမဟာမိတ် ဒပ်ပံၚ်ကောံပၠန်ဂတးတမ်ကညၚ် SRA ကဵု ဂကောံဇြဟတ်ပၠန်ဂတးတၞဟ်ဟ်တံ နကဵုမွဲမွဲဂကောံကီု နကဵုဂအုံကလောအ်တံကီု နွံရ။
အခိၚ်လၟုဟ်ပၠန်လေဝ် နူကဵု SCEF အလန်ဒုတိယ ဗက်ဆဵုဂဗလဝ် နကဵုမွဲမွဲဂကောံကု ဒပ်ပၞာန်အာရက္ခ AA၊ ဂကောံမဟာမိတ် ဒပ်ပံၚ်ကောံပၠန်ဂတးတမ်ကညၚ် SRA၊ ဒပ်ပအိုဝ် PNLO/PNLA ကဵု ဖိတ်ဒရေဝ်ကံၚ်သဳကောန်ဂကူပအိုဝ် PNFC တံ ပ္ဍဲကဵုဂိတု အံက်တဝ်ပါဏံရ။
ဒုၚ်သ္ဇိုၚ်ကဵု တိုၚ်ခဳ ၃ တၞုၚ်တုဲ အခိၚ်စဒက်ပတန်လဝ် ပ္ဍဲကဵု SCEF ကိုပ်ကၠာအိုတ်ဂှ်တှ်ေ အပ္ဍဲတိုၚ်ခဳ သ္ပစၞးညးဍုၚ်ကွာန်တံဂှ်တှ်ေ NUG ကဵု CRPH တံနွံတုဲ တိုၚ်ခဳသ္ပစၞး တွဵုရး/ယူနေတ်ဖိတ်ဒရေဝ်/ EROs တံဂှ် KIO, KNU, CNF ကဵု ဒပ်ကရေၚ်ဍာဲတံ ပါလုပ်လဝ်ရ။
အပ္ဍဲကဵုတိုၚ်ခဳသ္ပစၞး တွဵုရး/ယူနေတ်ဖိတ်ဒရေဝ်/ EROs တံမ္ဂး ယူနေတ်ဖိတ်ဒရေဝ်သဂိုၚ်၊ ယူနေတ်ဖိတ်ဒရေဝ်မဂွေ၊ ဒေသမာန္တလေဝ် ရဲဒေသအညာတံပါလုပ်လဝ် ပ္ဍဲ SCEF အပ္ဍဲကဵုဂိတု သိပ်တေမ်ပါတေံရ။
ညးစၞး ဂကောံညးဗြဴဍုၚ်ဗမာကဵု ဂကောံညးဗြဴပရေၚ်ဍုၚ်ကွာန်တံ ပံၚ်ကောံတုဲ သ္ပစၞးညးဗြဴ သွက်ဂွံပါလုပ်အာ ပ္ဍဲကဵုတိုၚ်ခဳသ္ပစၞးညးဗြဴဂှ် နွံမံၚ်ကီုရောၚ် ဂွံလဝ်ပရိုၚ် နူကဵု SCEF ကီုရ။
ပရိုၚ်-သြၚ်လောန်တိုၚ်မ်
Photo – NMSP-AD