ဗေဂျေၚ်၊ အံက်တဝ်ပါ ၂၀
ကၠာဟွံစိုပ် ၂၀၃၅ မ္ဂး ပ္ဍဲရးနိဂီုဍုၚ်ကြုက် မဟာဍုၚ်ဇၞော်ဗေဂျေၚ်ဂှ် လၟိဟ်မၞိဟ်ပိဂအုံမွဲဂအုံတံ အဝဲအာယုက်သူပါ ဒှ်မၞိဟ်အာယုက် ၆၀ ပြၚ်တံဂၠိုၚ်တိုန်ရောၚ် နူကဵုဌာန်ပရိုၚ် Beijing Daily ချူလဝ်ရ။
နကဵုဗျူဟာ ပရေၚ်ပိုန်ဒြပ်ဍုၚ် စွံတၚ်အဓိကမွဲတုဲ နူကဵုညးချူခၞံမူဝါဒကြုက်တံ တံၚ်လဝ်ကိုန်အစဳဇန် လၟိဟ်ဇြဟတ်မၞိဟ်တံရ။
သွက်အကြာသၞာံဏံ ပရေၚ်ၜံၚ်ကောန် ဇြဟတ်ညံၚ်ဂွံခိုဟ်တိုန်အာ အလဵုအသဳ ဒးဖအိုတ်သြန် ယန် ၁၈၀ ဗဳလဳယာန်(ဒဝ်လာအမေရိကာန် ၂၆ ဒသမ ၉ ဗဳလဳယာန်) ရောၚ်။
ကၠာဟွံစိုပ် ၂၀၃၅ မ္ဂး ပၞောဝ်အာကဵု မၞိဟ်မံၚ်ဒၟံၚ်လ္တူမဟာဍုၚ်ဇၞော်ကြုက် ၃ တၠမ္ဂး မွဲတၠဂှ် ဒှ်အာယုက် ၆၀ ဟွံသေၚ်မ္ဂး ဇၞော်နူဏံဏီရောၚ် ဌာန်ပရိုၚ် Beijing Daily ချူလဝ်ရ။
တုဲကၠုၚ်ကၞောတ်သၞာံဏံ ပ္ဍဲဗေဂျေၚ် မၞိဟ်အာယုက် ၆၀ ကဵု လပါ်လတူ နွံမံၚ် ၅ ဒသမ ၂၉ ပြကောတိကိုတ်လၟိုန်တုဲ ဒှ်လၟိဟ်မၞိဟ်ဍုၚ် ကြပ်ပန်ဂအုံမွဲဂအုံနွံမံၚ် သ္ဂးရ။
နူကဵုအလဵုအသဳမဟာဍုၚ်ဇၞော် ဖန်ဖက်မံၚ်ကဵု သွက်ဂွံသၠုၚ်ပတိုန်ကဵုအာ သြန်ဂိတုပေၚ်သေၚ်သ္ဇိုၚ်တံကီု သၠုၚ်ပတိုန်အသိၚ် ပရေၚ်အထံက်ပၚ် အာယုက်ဇၞော်ဇၞော်တံရ။
လၟိဟ်မၞိဟ်ဍုၚ်ကြုက် ဗွဲကြဴ ၂၀၂၂ ဗၜောတ်စှ်ေအာတုဲ လၟိဟ်အာယုက်ဇၞော်ဇၞော်တံ ပဵုတိုန်ကၠုၚ်ဗွဲမပြဟ်ရ။
တ္ၚဲဏံ လၟိဟ်ကောန်ၚာ်အောန်မံၚ်ဂှ် ကၟိန်အိန်ထံၚ်တံ ပဵုအောန်စှ်ေအာကီု ပရေၚ်ဖောအ်ဗြဳပွမစသုၚ် အိၚ်ဇိၚ်စှ်ေအာသ္ဂးရောၚ် တၠပညာတံ ဟီုရ။
ဍုၚ်ကြုက်သၟးဟွံက ပ္ဍဲကိုဝ်ရဳယာသၠုၚ်ကျာကဵု ဍုၚ်ဂျပါန်တံလေဝ် ပရေၚ်ၜံၚ်ကောန် အောန်အာတုဲ ဒးဇီုကပိုက်မံၚ်ကဵု ပရေၚ်ပြဿနာ လၟိဟ်အာယုက်ဇၞော်ဇၞော်တံ ပဵုဂၠိုၚ်တိုန်ရ။
ထပဵုကဵုအခေါၚ်ၜံၚ်ကောန်တံ ထံက်ပၚ်အပဵုကဵုစရိတ် အိန်ထံၚ်တံဟွံက သွက်စရိတ်မၚ်မွဲရံၚ်စံၚ်ကော်ၚာ်တံဂှ် ထံက်ပၚ်အာ စကာနဲကဲနာနာသာ်တုဲ သွက်ဂွံၜံၚ်ကောန်ဂၠိုၚ်ၚ် အလဵုအသဳဂစာန်မံၚ်ကီုလေဝ် သွဟ်ကၠးကၠးမးမး ဟွံတိတ်ကၠုၚ် ဏီပုဟ်။
Ref:Reuters