ကွာလာလမ်ပူ၊ အံက်တဝ်ပါ ၂၁
အစဳဇန်သွက်ဂွံဒစဵုဒစး မလေဝ်ယှာပလံၚ်ဖျဴ ဂကူရိုဟေၚ်ဂျာ လၟိဟ်ကဵုလ္ၚီတံ ဇရေၚ်ဒပ်ပၞာန်ဂှ် ခြာဟွံလံတေံ နူကဵု Burma Campaign UK စကၠောန်လဝ်ရ။
အတိုၚ်အလဵုအသဳမလေဝ်ယှာ စဳဇန်လဝ် သွက်ဂွံပလံၚ်ဖျဴ ဂကူရိုဟေၚ်ဂျာဂှ် ဟွံဒှ်ကၠုၚ်တုဲ ထေက်ကဵုဒးတၚ်ဂုဏ်ရောၚ် ဂကောံ Burma Campaign UK ဟီုရ။
ဟွံဒှ်ပလံၚ်ဖျဴ ဂကူရိုဟေၚ်ဂျာတံဂှ် အလဵုအသဳမလေဝ်ယှာ ဖျေံသ္ဂုတ်သွာတ်ဟွံသေၚ်၊ ဒပ်ပၞာန်ဗမာ ဟွံဒုၚ်တဲတုဲ အစဳဇန်ဏံ လီုအာရ။
ညးတၠဒဒိုက် ဆုဲပြံၚ်နူကဵုဍုၚ်ဗမာ ၜိုတ် ၁၅၀၀ တံ သၠောဲပအပ်လဝ်ကဵု ဒပ်ပၞာန်ဗမာတုဲ ကော်ဖျဴနင် နကဵုၜၚ်ပၞာန်ပိဖ္ဍိုက်နွံရ။
အပ္ဍဲကဵုပလံၚ်ဖျဴလဝ်မၞိဟ်တံဏံ ဂကူရိုဟေၚ်ဂျာတံ ညံၚ်ကဵုဟွံပါအာကီု၊ အပ္ဍဲကဵုပလံၚ်ဖျဴလဝ် ဍုၚ်ဗမာဂှ် ဒဵုကဵုအခိၚ်လၟုဟ် ဂကူရိုဟေၚ်ဂျာတံ ဟွံပါပုဟ် သ္ကိုပ်ဝန်ဇၞော် အာန်ဝါ အေဗရာဟေၚ် ဟီုလဝ်ရ။
ပ္ဍဲကဵုပရေၚ်အပြံၚ်သၠောဲပြံၚ်ပအပ်ဏံ သွက်ဘဲအန္တရာဂွံစ္ဍးဂှ် ဒှ်မံၚ်ဒဝိၚ်ဇၞော်ကဵုဇြဟတ်တုဲ ညးလ္ၚဵုတံကၠေံအာနွံ ပရိုၚ်သ္ပဒတန်ဟွံမာန်တံ ပြးဇးမံၚ်ပ္ဍဲကဵုပရိုၚ်တံနွံရ။
ညးကၠေံအာလဝ်တံဂှ် ဒပ်ပၞာန်ကောန်ဏာတုဲ ကဵုလုပ်ပၞာန်အတေၚ် ဒှ်မာန်ရောၚ် အခေါင်အရာမၞိဟ်တံ ဟီုရ။
ဒပ်ပၞာန်ဗမာတံ ဟွံဒုၚ်တဲ ရိုဟေၚ်ဂျာ တးပါဲထောံဂှ် သွက်မလေဝ်ယှာ ဂွံအာမုက်ဂွပေၚ်ၚ် မဒှ်ရ။
အခိၚ်က္ဍိုပ်သ္ကိုပ်သီအဝဵု မေန်အံၚ်လှိုၚ် ကၠုၚ်စိုပ်လဝ်မလေဝ်ယှာဂှ် နူကဵုအလဵုအသဳ ကွာလာလမ်ပူ လးဟကဝ်ဇဝ်ဍာဲ ဒုၚ်တၠုၚ်တုဲ ကဵုလဝ် ပရေၚ်ညးတေံမိက်ဂွံဂွံသ္ပစၟတ်သမ္တီဂှ်ရ။
သွက်ဂွံကလေၚ်ကော်ဖျဴ ညးတၠဒဒိုက်ကောန်ဍုၚ်ဗမာ နွံမံၚ်မလေဝ်ယှာတံဂှ် ညးတုပ်လဝ်စိုတ်ရ။
သွက်မလေဝ်ယှာ နကဵုပရေၚ်ဍုၚ်ကွာန် ဒှ်မှာရာအာ ပရေၚ်ကလုတ်တမာန်ဇၞော်ဇၞော်မွဲ မဒှ်ရ။
ရဲဂြိပ်ပါဲဒဴနူကဵု ပွဂစိုတ်ကဠက်ဂကူမၞိဟ်တံ ကလေၚ်စုတ်ကဵုဏာ တဲညးဂစိုတ်ကဠက်ဂကူမၞိဟ်တံဂှ် အကြာဂၠးကဝ် စရာဲဂုဏ်သွက်ဍုၚ်မလေဝ်ယှာ ဒးယုတ်ဒေက်အာလဝ်နွံရ။
ဒုၚ်တဲဆဵုဂဗလဝ်ကဵု မေန်အံၚ်လှိုၚ် တုဲဂှ်လေဝ် ပရေၚ်ကလုတ်တမာန် မလေဝ်ယှာ ကျအာကီုရ။
သွက်မလေဝ်ယှာ ကိုပ်ကၠာအိုတ် ပြဿနာညးတၠဒဒိုက်ဂွံဒှ်ကၠုၚ် သွက်ညးပၠတရဴဒပ်ပၞာန်ဗမာမွဲတၠဂှ် နူကဵုမလေဝ်ယှာ ဖျေံကဵုလာပ် ဒှ်အာညံၚ်ရဴထပေၚ်လဝ်ဇြဟတ်ရောၚ် သ္ဂးရ။
စပ်ကဵုတရဴဏံတုဲ အခိၚ်ဒပ်ပၞာန်ဗမာ ကေတ်စရာဲကြဴမံၚ် လ္တူမဳဒဳယာဍုၚ်တံကဵု မဳဒဳယာမဟာဇန်တံဂှ် မလေဝ်ယှာ ဂွံအာမုက်ဂွတုဲယျ။
ပ္ဍဲအကာဲအရာ အသိၚ်ဒစဵုဒစး ပရေၚ်ပလံၚ်ဖျဴ ညးတၠဒဒိုက် ရိုဟေၚ်ဂျာ နူမလေဝ်ယှာတံ ဆက်ပလံၚ်ဖျဴအာ ညးတၠဒဒိုက်ဍုၚ်ဗမာတံရောၚ် ဗွဲမလုပ်သၞောဝ် အလဵုအသဳမလေဝ်ယှာ ဟီုမံၚ်ဖိုအ်ရ။
ဆဂး ဗွဲကြဴ ဒပ်ပၞာန်ဗမာတးပါဲ ပရေၚ်ဒုၚ်တဲရိုဟေၚ်ဂျာတုဲ ပရေၚ်သွက်ဂွံပလံၚ်ဖျဴဏံ ဗီုလဵုဆက်ဒှ်အာမာန်ဂှ် သောၚ်ၚ်ကၠးကၠး ဟွံဂွံတီဏီပုဟ်။
Ref:Burmacampaign.org