ဂျကာတာ ၊ အံက်တဝ်ပါ ၂၂
ပၟတ်ဂြိပ်တံတဴ ဟိုတ်နူယက်လက်ကၠိုက်ဒှ်ဂျိမာန်တံ ဟဳသွဝ်မံၚ်ဂှ် မၞိဟ်ကဵုလ္ၚဳတံ ယဲဘဲက္တဵုဒှ်အာတုဲ ပ္ဍဲအံက်တဝ်ပါ ၂၀ ဂှ် ကောန်ဍုၚ်အေၚ်ဒိုနဳယှာတံ ထ္ၜးဆန္ဒး ပ္ဍဲဍုၚ်လ္ၚဵုလ္ၚဵုတံရ။
ပ္ဍဲဍုၚ်အေၚ်ဒိုနဳယှာ ပၟတ်ဂြိပ်တံတဴတုဲ အလုံမွဲဒမြိပ်ဇၞောဝ်ဒဵုအဂၞဴတံမ္ဂး ဒးဇီုကပိုက်မံၚ်ကဵု ပရေၚ်အန္တရာဲကျာပပ်ပဳကၠိခန်တံရ။
ဟွံပေၚ်စိုတ်ကဵု လ္တူဂကောံအလဵုအသဳ သမ္မတ ပရာဗိုဝို သူဗဳယာန်တိုတုဲ ပ္ဍဲအံက်တဝ်ပါ ၂၀ ဂှ် ကွးဘာတံ အာက္ဍိုပ် ထ္ၜးမံၚ်ဆန္ဒ မဒှ်ရ။
နူကဵုဂိတုဂျူလိုၚ်တေံရ ပ္ဍဲဒေသဗဝ်နဳယော၊ သူလာဝေသဳသၠုၚ်ကျာ၊ တ္ကအ်ဂျာဗာတံ ပၟတ်ဂြိပ်တဴမံၚ်ဂှ် ညးတာလျိုၚ်တံ လပိုတ်ကဵုဟွံမာန်တုဲ ညးဍုၚ်ကွာန်အေၚ်ဒိုနဳယှာတံ ဒေါသတိတ်မံၚ် မဒှ်ရ။
ညးတံမိက်ဂွံယီုကျာတုဲ ညံၚ်ဂွံပလိုတ်ထောံပၟတ်ဗွဲမပြဟ်ဂှ် ရဲထ္ၜးဆန္ဒတံ အာတ်မိက်ရ။
ဟိုတ်နူယက်လက်ကၠိုက်တံ ပရေၚ်သွံကပေါတ်စှ်ေတုဲ ၚုဟ်ဍၚ်တိုန်အာဂှ် သြန်လုပ်ဟွံမွဲဒှ်မံၚ်ရောၚ် ညးသွံဖျာဇိုၚ်ဂၠံၚ် အာယုက် ၄၀ သၞာံမွဲတၠဂှ် ဟီုရ။
စိုပ်ကၠုၚ်အခိၚ်ကှ်ကတာန်မ္ဂး ပ္ဍဲအေၚ်ဒိုနဳယှာ ဒးဇီုကပိုက်မံၚ်ကဵု ပရေၚ်ပၟတ်ဂြိုပ်တံတဴကီုလေဝ် ဟိုတ်နူအကာဲအရာ ဥတုရာသဳသၞာံဏံတုဲ ပရေၚ်ပၟတ်ဂြိုပ်တဴ ဇၞော်ကဵုဇြဟတ် ဒှ်မံၚ်ရ။
သွက်ဂွံလလောၚ်တြးကဵု အကာဲအရာရးနိဂီုဍုၚ် ပရေၚ်ကာမံက်တိုန်ဂှ် ညးထ္ၜးဆန္ဒးလ္ၚဵု အာတ်မိက်လဝ်ရ။
စပ်ကဵုအရာဂစာန်ပလိုတ်မံၚ်ပၟတ်ဂြိုပ်ဏံမ္ဂး ညးတၠစေတနာတံ သၟာပလိုတ်ပၟတ် ၆၀၀၀၀ ပြၚ် ပါလုပ်မံၚ်ရောၚ် ညးနွံအခေါၚ်ဟီုဂး ဌာနယှအ်ဖျေံဘဲအန္တရာဲသဘာဝ ဗာတောန် ပါန်ဂျိုၚ်တာန် ဟီုရ။
သွက်ဗြဲဂွံဂူ ဂစာန်ကၠောန်မံၚ်မတ်ဗြဲပတောအ် သုၚ်စောဲအာ ၜၚ်ကျာ ၄၉ မဂှ် ပ္ဍဲဗလးအကး ယက်ဂၠုအုပ်ဓလီုလဝ်တုဲ စကာဟွံဂွံ ဒှ်မံၚ်ရ။
သၞာံ ၂၀၂၆ ပထမ ၉ ဂိတုဏံ ပ္ဍဲအေၚ်ဒိုနဳယှာ တိဂူယာတဴအာ ၁ ဒဿမ ၉ ပြကောတိကိုတ်ဟက်တာပြၚ်အာဂှ် ဂကောံမံၚ်ရံၚ်ပၟတ်ဂြိပ်အေၚ်ဒိုနဳယှာ ဟီုရ။
ပ္ဍဲအေၚ်ဒိုနဳယှာ ဟိုတ်နူပရေၚ်ပၟတ်ဂြိုပ်တံတဴတုဲ မလေဝ်ယှာ၊ သၚ်ကာပူဟွံက ပ္ဍဲဒေသတၞဟ်တံကီု အန္တရာဲကျာပပ်ပဳကၠိခန် ဟွံကိက်ညဳကဵုပရေၚ်ထတ်ယုက်တံ ဒးက္တဵုဒှ်ကၠုၚ်ရ။
Ref:AFP