မတ်မလီု၊ မေ (၂၇)
သၞောဝ်ဥပဒေသ္ဇိုၚ်ဒက်ပ္တန်ကၟိန်ဍုၚ်ဖေဝ်ဒရာ ကေုာံ သၞောဝ်ဥပဒေသ္ဇိုၚ်ဒက်ပ္တန်ဍုၚ်မန်ဂှ် အပ္ဍဲအခိၚ်ကာလခြာဟွံလအ်ဏံ စချူခၞံအာရောၚ် ညးမၞုံအခေါၚ်ဟီုဂး ကောံဓရီုပရေၚ်ဂကူမန် ၂၀၂၂ နာဲဝဏ္ဏမာန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံချုခၞံ သၞောဝ်ဥပဒေသ္ဇိုၚ် ဒက်ပ္တန်ဍုၚ်မန်ဂှ် နူကဵုကောံဓရီုပရေၚ်ဂကူမန် ပံက်လဝ် ကမ္မတဳပရေၚ်တပ်ဇန်ပ္ညဳပ္ညပ် ညးစၞး(၁၇) တၠ ပါလုပ် နူကဵု သွာၚ်ခမဳသၚ်မန်၊ ဗော်ဍုၚ်မန်တၟိ၊ ဗော်ညဳသၟဟ်မန်၊ ဗွိုၚ်ဂကောံမဟာဇန်မန်နာနာ၊ ဗွိုၚ်ဂကောံဘိက်ထေက် ကေုာံ ပူဂဵုဘိက်ထေက်တံတုဲ ပအပ်ကဵုလဝ် တာလျိုၚ်ရ။
အခါလၟုဟ်ဂှ် သွက်ဂွံချူခၞံ သၞောဝ်ဥပဒေသ္ဇိုၚ်ဒက်ပ္တန်ဂှ် ပ္ဍဲကမ္မတဳပရေၚ်တပ်ဇန်ပ္ညဳပ္ညပ် ဗော်ဍုၚ်မန်တၟိ ကေုာံ ဗော်ညဳသၟဟ်မန်တံ မပါလုပ်ဂှ် ရုဲစှ်လဝ် ညးစၞးပိတၠ စၟံစၟံတုဲ ဂကောံမသှ်ေဒၟံၚ်တံ မဒှ်ဂကောံသွာၚ်ခမဳသၚ်မန် ကေုာံ သွာၚ်ဂကောံမဟာဇန်မန်တံ စရၚ်ယၟုညးစၞး ပိတၠစၟံစၟံဂှ်လေဝ် အပ္ဍဲမွဲသတ္တာဟ သွက်ဂွံပလံၚ်ကဵုဂှ် ဖ္တိုက်ဖ္အောဝ်လဝ်ရ။
ဆ္ဂး သွက်ဂွံရုဲစှ် ညးစၞး နူဗွိုၚ်ဂကောံဘိက်ထေက် ကေုာံ ပူဂဵုဘိက်ထေက်တံဂှ် အခက်အခုဲနွံဒၟံၚ်ဂှ်ရ သ္ပပေါဲသဳကၠဳ ကဵုကမ္မတဳကၠောန်ဗဒှ် ကောံဓရီုပရေၚ်ဂကူမန်တုဲ နူဂှ် ရုဲစှ်အာ ညးစၞးမသုန်တၠရောၚ်ဂှ် နာဲဝဏ္ဏမာန် ဟီုရ။
သွက်ဂွံချူခၞံ သၞောဝ်ဥပဒေသ္ဇိုၚ်ဒက်ပ္တန်ဂှ် ရုဲစှ် ညးစၞးကမ္မတဳပရေၚ်တပ်ဇန်ပ္ညဳပ္ညပ်တုဲဗက် စချူခၞံအာ သၞောဝ်ဥပဒေသ္ဇိုၚ် ဒပ်ပ္တန်ကၟိန်ဍုၚ်ဖေဝ်ဒရာ ကေုာံ ဍုၚ်မန်ရောၚ်ဂှ် သ္ဂးရ။
ပ္ဍဲကောံဓရီုပရေၚ်ဂကူမန် မကၠောန်ဗဒှ်လဝ် နူဂိတုမေ (၂) စဵုကဵုဂိတုမေ (၅) ပွိုၚ် (၄) တ္ၚဲတုဲကၠုၚ်တေံဂှ် သၞောဝ်သ္ဇိုၚ်ဒက်ပ္တန်ကၟိန်ဍုၚ်ဖေဝ်ဒရာ ကေုာံ သၞောဝ်သ္ဇိုၚ်ဒက်ပ္တန်ဍုၚ်မန်ဂှ် ပွိုၚ် (၆) ဂိတု ညံၚ်ဂွံတပ်ဇန်တုဲဒှ် ဖျေံလဝ် တၚ်သ္ဂုတ်သွာတ်ရ။
ပရိုၚ်−သြၚ်လောန်တိုၚ်(မ်)