မတ်မလီု၊ မေ (၂၆)
ပ္ဍဲတွဵုရးဍုၚ်မန် အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ် ၚုဟ်သ္ၚု သၠုၚ်တိုန်ကၠုၚ် ဂၠိုၚ်ကဵုဆရဂှ် တၠကမၠောန် ပရေၚ်သွံရာန်သ္ၚုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်သ္ၚု ကၠာပၞာန်ဟွံဂွံသီအဝဵုဂှ် သ္ၚု (ပေါ်ဆန်း) မွဲရိုက်ဂှ် နွံ ၜိုတ် (၃၂၀၀၀) ဒ္ကေဝ်ဓဝ်တုဲ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် မွဲရိုက် စဵုကဵု (၅၄၀၀၀)ဒ္ကေဝ် ၊ မွဲရိုက်မ္ဂး ၚုဟ်သၠုၚ်တိုန်ကၠုၚ် (၂၂၀၀၀) ဒ္ကေဝ်ရ။
တုဲပၠန် သ္ၚု( ဧည့်မထ) လုပ်ပ္ဍဲဂကောံ သ္ၚုအဆံၚ်ဂှ်လေဝ် မွဲရိုက် နူကဵု (၂၅၀၀၀) ဒ္ကေဝ် စဵုကဵု (၃၄၅၀၀) ဒ္ကေဝ် ၚုဟ်သၠုၚ်တိုန်ကၠုၚ် (၁၁၅၀၀) ဒ္ကေဝ်ရ၊ ၚုဟ်သ္ၚု မက္တဵုဒှ်ဒၟံၚ်လၟုဟ်ဝွံ ပ္ဍဲတွဵုရးဍုၚ်မန် စိုပ်ကၠုၚ် စဵုကဵု ၚုဟ်နှေန် ဗွဲမလုပ်သၞောတ်ဗ္ၜတ်ရ။
“အဓိကဂှ်တှ်ေ ကၠေၚ်စက်ရ၊ ကၠေၚ်စက်ဂှ် က္ဍၚ်တုဲ ပၟတ်ဓာတ်လလဳဂှ်လေဝ် ဟွံမှာန်ပုဟ်၊ စက်ဒးဂေတ်ဒၟံၚ်ကဵုပၟတ်တံဂှ် ဥပမာ သွက်ကမၠောန် ညံၚ်ဂွိုအ်ဒေါအ်အာဂှ် ကဵုကၠေၚ်၊ ကဵုဒဳဇြေဝ် ဒးဂေတ်မ္ဂး ခရိတ်အိုတ် ပွမကၠောန်ပ္တိတ်တံ သၠုၚ်ကၠုၚ်မွဲတဲပၠန်ရ၊ ၚုဟ် အပ္ဍဲခရိတ်ဗုတ်တံဂှ်လေဝ် တိုန်အာရ၊ ခရိတ်ဗုတ်တိုန်တုဲ အခါရဒးပလံၚ်ဗ္စိုပ် ဗွဝ်ဖျာတေံ မွဲတဲပၠန်မ္ဂး ခရိတ်ပလံၚ်ဗစိုတ်တံ တိုန်တုဲ တန်တဴကဵု လ္တူတံဏံတုဲ ၚုဟ်နှေန်တံဂှ် ဗီုဍေံကဵုဍေံ ဗက်သၠုၚ်တိုန်ကၠုၚ်ရ” သာ်ဝွံ သ္ဂးရ။
တုဲပၠန် ကာလလၟုဟ်ဂှ် ဟိုတ်နူဒှ်အခိၚ်ကာလ တဵုလွဳသြောံဂှ်ရ သ္ၚုသၟေဟ်အောန်ကၠုၚ်တုဲ ၚုဟ်သ္ၚုသွက်ဂွံထပ်သၠုၚ်တိုန် နွံဒၟံၚ်ရဂှ် သၟာဗၞိက်သ္ၚုတံ သ္ၚဳဂၠိပ်လဝ်ရ။
ဟိုတ်နူၚုဟ်သ္ၚု သၠုၚ်တိုန်ကၠုၚ်ဂှ်ရ အပ္ဍဲဗွဝ်ဖျာ ပရေၚ်သွံရာန် ညိၚ်ဒၟံၚ်တုဲ ညးရာန်ပကောံပကေဝ်တံ စဵုကဵုဟွံမွဲ အောန်ကြဳစှ်ေရ။
ၚုဟ်သ္ၚုတံ ၜိုန်ရဇၞော်သၠုၚ်ဒၟံၚ်ကီုလေဝ် သၟာဗ္ၚတဵုလွဳသြောံတံဝွံ အပ္ဍဲကာလ ဒပ်ပၞာန်သီအဝဵုဂှ် ဟိုတ်နူကပေါတ်ဗၞိက် ဇြဟတ်ပၠောပ် သုၚ်စောဲပရေၚ်တဵုလွဳတံ ၚုဟ်က္ဍၚ်တိုန်ကၠုၚ် မွဲဆမွဲတာန်တုဲ သွက်ဂွံတဵုလွဳသြောံကသီုဂှ် ဒးဂဗဒၟံၚ် အခက်ရ။
တွဵုရးဍုၚ်မန်ဝွံ ဒှ်တွဵုရး တိဨကသြောံ (၇) ကိုဋ်ပြၚ် မၞုံမွဲတုဲ လၟေၚ်သၞာံ လျိုၚ်တာန်သြောံတိတ် (၄) ကိုဋ်ပြၚ် တိတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)