ၜဳကလေၚ်၊ မေ (၂၇)
ပ္ဍဲတွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ အကြာကွာန်တပျေနဳ ကေုာံ ကွာန်အလူ လ္တူဂၠံၚ်ကွဳစက် လ္ဂုၚ်−မတ်မလီုဂှ် ပ္ဍဲဂိတုမေ (၂၆) ပယျာံဂယးဂှ် ဗ္တိုက်ဗ္တိုဟ်လဝ်မာၚ် ကုကရောၚ်ကွဳစက်ကံၚ်ဇြဳပၞာန်တံရဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်တံ ဟီုရ။
ကုကရောၚ်ကွဳစက် ကံၚ်ဇြဳပၞာန် ကွဳစက် (၅) ဖ္ဍိုက်ပါလုပ်တုဲ မဒဳကၠုၚ် နူလ္ပာ်ၜဳကလေၚ် အာကျာ်ထဝ်ဂှ် ဂကောံပံၚ်ကောံ ဒပ်မဟာ (၁) KNLA ကဵု PDF တံ ဗ္တိုဟ်မာၚ် ဗ္တိုက်လဝ်ရ။
ဟိုတ်နူဒးဒုၚ်ဗ္တိုဟ်မာၚ် ဗ္တိုက်ဂှ်ရ ကွဳစက်ကံၚ်ဇြဳပၞာန် (၁) ဖ္ဍိုက် ဇီုကပိုက်လီုလာ်လဝ်တုဲ ကောန်ဒပ်ကံၚ်ဇြဳပၞာန် လ္တူ (၂) တၠ ဟွံအောန် ဂွံဝပ်ဇီုကပိုက်မာန်ဂှ် လျိုၚ်ဂကောံဒပ်စဵုဒၞါညးဍုၚ်ကွာန်ၜဳကလေၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ကွဳစက်ကံၚ်ဇြဳပၞာန် ကြဴနူဒးဒုၚ်ဗ္တိုက် ဗ္တိုဟ်မာၚ်တုဲဂှ် ကောန်ဒပ်ကံၚ်ဇြဳပၞာန်တံ ၜိုန်ရကၠောန်လဝ် ပွပန်ပှော်ဆဆဵုတံကီုလေဝ် ဂကောံပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဂွံဝပ်ဇီုကပိုက်ဟွံမွဲမွဲသာ် ဗွဲမအံၚ်ဇၞး ဆုတ်ကလေၚ်မာန်လဝ်ဂှ် သ္ဂးရ။
ကြဴနူကရောၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်ဗ္တိုဟ်မာၚ်တုဲ လ္တူဂၠံၚ်လ္ဂုၚ်−မတ်မလီုဂှ် ကွဳစက်အာတရဴ ကေုာံ ကွဳစက်ဖ္ဍိုက်ဗၞိက် ဂၠိုၚ်ကဵုကၠံ လလအ်ပွိုၚ်မွဲနာဍဳပြၚ် က္တဵုဒှ်လဝ် ပွဆိုအ်ဗတံရ။
သ္အာၚ်နူဂှ်ပၠန် ပ္ဍဲဂိတုမေ (၂၆) လဒေါဝ်တ္ၚဲ ၜိုတ် (၁၂) နာဍဳဂှ် ဂကောံဒပ်ပံၚ်ကောံ KNLA လုပ်စိုပ်ဗ္တိုက်လဝ် သၞေဟ်ကၚ်စၟဳစၟတ်မုခ်ပြေၚ် ကံၚ်ဇြဳပၞာန် မၞုံပွိုၚ်ဍုၚ်ကျာ်ထဝ်ဂှ်တုဲ အကာဲအရာဂွံဝပ်ဇီုကပိုက်ၜါလ္ပာ် သောဲသောဲဗြဲဗြဲဂှ် ဟွံဂွံတီကေတ်ဏီရ။
ပရိုၚ်−သြၚ်လောန်တိုၚ်(မ်)