မတ်မလီု၊ မေ (၂၈)
ကမၠောန်ကတိုၚ်တၟံ အပ္ဍဲတွဵုရးဍုၚ်မန်ဂမၠိုၚ် ပ္ဍဲအရာကၠောန်ပ္တိတ်တၟံ အဓိကဒးသုၚ်စောဲဒၟံၚ် ဂဥုဲသၞာတ်တံဂှ် ဟုတ်နူရာန်ကေတ်ဟွံဂွံဂှ်ရ သွက်ကမၠောန်ဂွံဂေတ်ဂြိပ်ဂှ် ဒးဂဗဒၟံၚ် အခက်အိုတ်ရဂှ် တၠကမၠောန်ကတိုင်တၟံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗွဲကြဴဒပ်ပၞာန်သီအဝဵုတုဲ ကမၠောန်ကတိုၚ်တၟံ ဒးဒေါအ်ဇူလဝ်တံ သွက်ဂွံကလေၚ်စဂှ် ၜိုန်ရပလေဝ်ပလေတ်ကၠုၚ်ကီုလေဝ် ကံၚ်ဇြဳပၞာန် မ္ၚးနူပိုၚ်ခြာထောံ ပွမသုၚ်စောဲဂဥုဲသၞာတ်ဂှ်တုဲ သီုကဵုရာန်ဟွံဂွံဂှ်ရ ကမၠောန် ဂွံဂေတ်ဂြိပ်ဂှ် အခက်အခုဲနွံဒၟံၚ်ရ။
သွက်ဂွံကဵုအခေါၚ်သုၚ်စောဲ ဂဥုဲသၞာတ်ဂှ် ၜိုန်ရပ္တိုန်ထ္ၜးလဝ် ဇရေၚ်ကံၚ်ဇြဳပၞာန်ကီုလေဝ် ဒဵုကဵုအခိၚ်လၟုဟ် ပွမရေၚ်တၠုၚ်ကဵု မွဲမွဲသာ် ဟွံမွဲဂှ်ရ ကမၠောန်ဂမၠိုၚ် ကလေၚ်စ ဟွံမာန်ဏီပုဟ်ဂှ် တၠကမၠောန်ကတိုင်တၟံ မွဲတၠ ဟီုရ။
ဆ္ဂး ကံၚ်ဇြဳပၞာန်သီအဝဵုဂှ် ကုကမၠောန်ကတိုင်တၟံ ဂကောံရပ်လွဟ်ကောန်ဍုၚ်အရၚ် ဟွံဒှ်ပေါဲဗ္တိုက်ကဵု ဍေံတံဂှ် ကဵုလဝ် အခေါၚ်သုၚ်စောဲဂဥုဲသၞာတ်တံရောင်ဂှ် သ္ဂးရ။
အခိၚ်လၟုဟ်ဂှ် တၠကမၠောန်ကတိုင်တၟံတံဝွံ ဟိုတ်နူၚုဟ်ကၠေၚ်စက် တိုန်ကၠုၚ် မွဲဆမွဲတာန်ကီု ၊ ကၠောန်ပ္တိတ်တၟံတုဲမ္ဂး ဗွဝ်ဖျာမရာန်တံ အောန်ကြဳစှ်ေကၠုၚ်ဂှ်ရ ကမၠောန်ဂမၠိုၚ် သွက်ဂွံဆက် ဒတူလိုၚ်မာန် ဒးဂ္စါန်ဒၟံၚ်တၟာလှ်ေရ။
ကမၠောန်ခါဲတၟံတံ ဟိုတ်နူကမၠောန် ဂေတ်ဂြိပ်ဟွံမာန်ဂှ်ရ သ္ၚိကၟိန်ဗ္ဒဗ္ဒါဲ ဒတူလိုၚ်ဒၟံၚ် လ္တူကမၠောန်ဂှ် ဂၠိုၚ်ကဵုလ္ၚီ နွံတုဲ ဒးဆေၚ်ဒၟံၚ်မုက်ကဵု အခက်အခုဲ ပရေၚ်မၚ်စံၚ်စသုၚ် ဗွိုက်လ္တက် သ္ၚိကၟိန်တံ ဗွဲမဇၞော်ကဵုဇြဟတ်ရ။
ပ္ဍဲတွဵုရးဍုၚ်မန် တၟံလးဂၠံၚ်တံဂှ် အဓိကကၠောန်ပ္တိတ်ဒၟံၚ် ပ္ဍဲပွိုင်ဍုၚ်ကျာ်ထဝ်၊ သဓီု၊ ပံၚ်၊ ကျာ်မြဟ် ကေုာံ ပွိုၚ်ဍုၚ်ရေဝ်တံတုဲ ကမၠောန်ခါဲတၟံအပံၚ် (၁၀၀) ပြၚ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)