ဒံၚ်ကျဳ၊ မေ (၂၉)
ပံၚ်တောဲကဵု ဂကောံဇြဟတ်မဟာမိတ် တိုၚ်ပ္ကဴတုပ်တံတုဲ ချူခၞံအာ သၞောဝ်ဥပဒေသ္ဇိုၚ်ဒက်ပ္တန် မပ္တဝ်အာက္ဍိုပ် ကုကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳမွဲရောၚ်ဂှ် ဗော်ဂအုပ်ဒဳမဝ်ကရေဇြဳကောန်ဂကူသေံ SNLD ဟီုရ။
ဗော်ပရေၚ်ဍုၚ်ကွာန်ကောန်ဍုၚ်အရၚ်ဇြဟတ်ဇၞော် ဗော်ဂအုပ်ဒဳမဝ်ကရေဇြဳကောန်ဂကူသေံ SNLD ကောံဓရီုအလုံကၟိန်ဍုၚ်ဂှ် ကၠောန်ဗဒှ်လဝ် ပ္ဍဲဍုၚ်ဒံၚ်ကျဳ တွဵုရးသေံဇၞော် ပ္ဍဲဂိတုမေ နူစၟတ်တ္ၚဲ (၂၆) စဵုကဵု (၂၇) လလအ်ပွိုၚ် (၂) တ္ၚဲရ။
အပ္ဍဲကောံဓရီုဂှ်ဂှ် ကောန်ကမ္မတဳကေၚ်ကာဗဟဵု (၃၁) တၠ မပါလုပ် ကောန်ကမ္မတဳအပံၚ်ဖအိုတ် (၁၁၇) တၠ ကလေၚ်ရုဲစှ်လဝ်ရ။
ပ္ဍဲကၞောတ်ကောံဓရီုဂှ် ဗော် SNLD လလောၚ်ပ္တိတ်လဝ် လစွံစိုတ် (၇) တၚ် သီုကဵုလၟေၚ်ကမၠောန် မကၠောန်အာဂတတေံ ပါလုပ်ရ။
ပ္ဍဲကဵုတၚ်လစွံစိုတ်ဂမၠိုၚ် ပ္ဍဲပရေၚ်ဍုၚ်ကွာန်လၟုဟ်ဂှ် ညံၚ်ဂွံရေၚ်တၠုၚ်ဒတူလိုၚ်အာ လ္ပာ်ဓမ္မကီု၊ သွက်ဂွံဂ္စါန်ရေၚ်တၠုၚ် ပရေၚ်ဗ္တိုက်သ္အးသၞောတ်တၠအဝဵုကီု၊ ကုပရေၚ်ၜိုဟ်လလမ် အပ္ဍဲကၟိန်ဍုၚ်ဂှ် နကဵုမူ အိုဿီုကဵုညးဂမၠိုၚ် သ္ဂောံပါလုပ် သွက်ဂွံရေၚ်တၠုၚ်အာတံ ပါလုပ်ရ။
တုဲပၠန် ပံၚ်တောဲကဵု ဂကောံဇြဟတ်မဟာမိတ် တိုၚ်ပ္ကဴတုပ်တံတုဲ ချူခၞံအာ သၞောဝ်ဥပဒေသ္ဇိုၚ်ဒက်ပ္တန် မပ္တဝ်အာက္ဍိုပ် ကုကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳမွဲရောၚ်ဂှ် ညးမၞုံအခေါၚ်ဟီုဂး ဗော်ဂအုပ်ဒဳမဝ်ကရေဇြဳကောန်ဂကူသေံ SNLD သာၚ်ကျဝ်တူလေန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပြသၞာပိုယ်တံ ဒးဂဗဒၟံၚ်ဂှ် သၞောဝ်သ္ဇိုၚ် ၂၀၀၈ လၟုဟ်ဝွံလေဝ် ပ္တဝ်က္ဍိုပ်ကဵု ကၟိန်ဍုၚ်ပံၚ်ကောံဖေဝ်ဒရာတုဲ ဒှ်သၞောဝ်သ္ဇိုၚ်ဒက်ပ္တန် ဓဇက်လဝ် ဟွံသေၚ်ပုဟ်၊ ကဵုၝဏံလေဝ် ဆက်အာဟွံဂွံပုဟ်၊ ဟိုတ်ဂှ်ရ ပိုယ်တံ အာကဵုသၞောတ်ကၟိန်ဍုၚ်ပံၚ်ကောံဖေဝ်ဒရာဟီုမ္ဂး သၞောဝ်ဥပဒေသ္ဇိုၚ်ဒက်ပ္တန်ဖေဝ်ဒရာတၟိ မဒှ်ရိုဟ်ကၞက်သ္ဇိုၚ်အဓိကမွဲ ဒးနွံရောၚ်၊ မွဲအခိၚ်ဓဝ် ပံၚ်တောဲကဵု ဂကောံဇြဟတ်တိုၚ်ပ္ကဴတုပ်တံ၊ မဟာမိတ်တံတုဲ ချူခၞံအာ နကဵုမူ အိုဿီုကဵုညးဂမၠိုၚ်ပါလုပ်တုဲ ဆက်အာမှ ပြသၞာဏံ ပြေပြံၚ်မာန်ရောၚ်” သာ်ဝွံ ညးသ္ဂးရ။
သ္အာၚ်နူဂှ်ပၠန် သွက်ဂွံထ္မံက်ရုပ်ရဴရေၚ်တၠုၚ်အာ ကုလိက်စံၚ်လလောၚ်တြးမူဝါဒ မံၚ်မွဲစွံဗွဲမၜိုဟ်လလမ် မလလောၚ်ပ္တိတ်နူ ကမ္မတဳပရေၚ်ညဳသၟဟ်ရးသေံ ( CSSU) ဂှ်ေလဝ် ဖျေံလဝ်သန္နိဌာန်ရ။
မွဲလ္ပာ်ဂှ်တုန် ဗော် SNLD ဝွံ လ္တူကမ္မယှေန်ပေါဲရုဲမာဲကၟိန်ဍုၚ်ပံၚ်ကောံကံၚ်ဇြဳပၞာန် (UEC) စၟဳစၟတ် စရၚ်သြန်ဂှ် ဟိုတ်နူကၠုၚ်စိုပ်ဒုၚ်စၟဳစၟတ်လဝ် ဟွံမွဲဂှ်ရ နဒဒှ်ဗော်ပရေၚ်ဍုၚ်ကွာန်ဂှ် စဵုကဵု (၃) သၞာံ ဗဒေါအ်ထောံယာယဳမာန်ဂှ် ဒးဒုၚ်ကဵုလဝ်သတိရ။
လက္ကရဴဏံဂှ် လ္ပာ်ကမ္မယှေန်ကံၚ်ဇြဳပၞာန် သွက်ကိစ္စ ဗော် SNLD မဒုၚ်စၟဳစၟတ် စရၚ်သြန်ဗော်ဂှ် ပဆုဲလဝ်တ္ၚဲ စဵုကဵု ဂိတုဂျောန်အိုတ် ကၠုၚ်စိုပ်ဏံရ။
စပ်ကဵုကိစ္စဏံတုဲ နကဵု SNLD အတိုၚ်တၚ်ဒတူလိုၚ်မူလတေံဟေၚ် မၞုံဒၟံၚ်တုဲ ပြဟ်ဟ်ဏံ အာစိုပ်ဒုၚ်စၟဳစၟတ်၊ ဟွံဒုၚ်စၟဳစၟတ် ဟီုဂှ် ဖျေံလဝ် သ္ဂုတ်သွာတ် ဟွံမွဲဏီပုဟ်ဂှ် သာၚ်ကျဝ်တူလေန် ဟီုရ။
“စပ်ကဵုကိစ္စဏံတုဲ အပြံၚ်အလှာဲမွဲမွဲ ပြဟ်ဟ်ဏံ ဒးဟီုဂှ်ဝါတ်မံၚ်ဏီ၊ အပ္ဍဲဂိတုဂတတေံပၠန် ဗီုလဵုဆက်ဒတူလိုၚ်အာရော တန်တဴတုဲ ပိုယ်တံ ဖျေံသ္ဂုတ်သွာတ်တၟိဟာ၊ ဟွံဖျေံဟာဟီုဂှ် ဆက်တုဲဒးသဳကၠဳအာရောၚ်၊ စပ်ကဵုၝဏံတုဲ ပိုယ်တံ အာဏောၚ်၊ ဟွံအာဏောၚ်ဟီုဂှ် သ္ဂုတ်သွာတ်လဝ် ဟွံမွဲဏီရ” သာ်ဝွံ သ္ဂးရ။
ဗော် SNLD ဝွံ ဗွဲကြဴဒပ်ပၞာန်သီအဝဵုတုဲ ဒဒှ်ရ ဟွံဒုၚ်တဲ ပွမသီအဝဵုဂှ်ကီု ညးစၞးဂွံဒုၚ်ရုဲစှ် (၄၂) တၠ ညးတအ်ဂှ်လေဝ် နဒဒှ်ညးစၞးကောန်ဍုၚ်ကွာန် ဆက်နွံဒၟံၚ်ဂှ် လလောၚ်ပ္တိတ်လဝ်ရ။
ဗော်ဂအုပ်ဒဳမဝ်ကရေဇြဳကောန်ဂကူသေံ SNLD ဝွံ ပ္ဍဲပေါဲရုဲမာဲ ၂၀၂၀ ဂှ် အတိုၚ်ဗၞတ်ဗ္ၜတ်ကၟိန်ဍုၚ်မ္ဂး ဒှ်ဗော်ပရေၚ်ဍုၚ်ကွာန် ဂွံဇၞးလဝ် ဒၞါဲညးစၞးဂၠိုၚ်အိုတ်တတိယမွဲရ။
ပရိုၚ်−သြၚ်လောန်တိုၚ်(မ်)