ကျာ်ထဝ်၊ မေ (၂၉)
ကောန်ၚာ်သၟတ် နူပွိုၚ်ဍုၚ်ကျာ်ထဝ်၊ တွဵုရးဍုၚ်မန်မွဲတၠဂှ် ဒးဒုၚ်ကၠောံထၞာန်လဝ် ယဲမြန်ကၞုဲဟွံသေၚ်တုဲ ဒးဒုၚ်ကၠောံထၞာန်လဝ် ယဲဇိုၚ်တဲသၟောန်ပါၚ် မကော်ဂး HFMD ရဂှ် သ္ကိုပ်က္ဍိုက်ပ်တွဵုရး ဌာနက္ဍိုက်ပ်ပရေၚ်ထတ်ယုက်တွဵုရး ကံၚ်ဇြဳပၞာန် ဒံက်တာနန္ဒဝေန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲတ္ၚဲအကြာတံဏံ ကောန်ၚာ်သၟတ် အာယုက် (၅) သၞာံ ဒၟံၚ်ကွာန် (ဝါးဒက်ကွၚ်း) ၊ ပွိုၚ်ဍုၚ်ကျာ်ထဝ်ဂှ် စဂွံဆဵုလဝ် စၟယဲ လအာတုပ်ကဵု ယဲမြန်ကၞုဲဂှ်ရ။
ကောန်ၚာ်သၟတ်ဂှ်ဝွံ ယဲတုဲ လလအ်(၂) တ္ၚဲဂှ် မ္ၚးနူခန္ဓကာယဂှ် ပ္ဍဲကဵုဇိုၚ်တဲတံလေဝ် ကလောအ်ကလေန်၊ ဖဍတ်ဂုဟ်တံ တိတ်ကၠုၚ်ရ။
ဗွဲကြဴ ကာလစၟဳစၟတ်ရံၚ် စၟယဲကောန်ၚာ်ဂှ် ဒးဒုၚ်ကၠောံထၞာန်လဝ် ယဲဇိုၚ်တဲသၟောန်ပါၚ် မကော်ဂး HFMD ရဂှ် ဒံက်တာနန္ဒဝေန် ဟီုရ။
“အခါရ ဆဵုလက္ချန်ယဲ ကောန်ၚာ်သၟတ်ဂှ် သွက်ဂွံတီ ယဲမြန်ကၞုဲ ဒှ်ဒၟံၚ်လၟုဟ်ဟာ မုဟာဟီုဂှ် စၟဳစၟတ်လဝ် ကဵုအ္စာဂဥုဲလွဳကောန်ၚာ် ချိုတ်တ်ပၠိုတ်တ်ရ၊ ယဲဒှ်ဒၟံၚ် ပ္ဍဲကောန်ၚာ်ဂှ် ဒှ်ဒၟံၚ်ယဲမြန်ကၞုဲ စဒၟံၚ်ခေတ် ပြဟ်ဟ်ဏံ ဟွံသေၚ်ပုဟ်၊ ဒှ်ဒၟံၚ် ယဲ HFMD ဒၟါနူ Virus တုဲ မလေပ်ဒှ်တိုန် ဂုဟ်ဖဍတ် ပ္ဍဲဇိုၚ်တဲသၟောန်ပါၚ်တံဂှ်ရ” သာ်ဝွံ သ္ဂးရ။
ကုကောန်ၚာ်သၟတ် ဒးဒုၚ်ကၠောံထၞာန်လဝ် ယဲဇိုၚ်တဲသၟောန်ပါၚ်တံဂှ် မၚ်ရံၚ်လွဳလွတ်ကဵုဒၟံၚ် ဗွဲမတၞဟ်ခြာ ပ္ဍဲရုၚ်ဂဥုဲ ဒုၚ်ဇြယိတ်(သိမ်ဇရပ်)တုဲ ပရေၚ်ထတ်ယုက်ခိုဟ်ဒၟံၚ်တုဲ ပွမဒးဂွိၚ်ဂွါဲတံလေဝ် ဟွံမွဲပုဟ်ဂှ် သ္ဂးရ။
ယဲဇိုၚ်တဲသၟောန်ပါၚ် မကော်ဂး HFMD ဝွံ ဒှ်ယဲဂကူကၠောံထၞာန်မွဲ ဟိုတ်နူစၟယဲ ဟွံတုပ်သၟဟ်တုဲ ပ္ဍဲကောန်ၚာ်တံဂှ် ကၠောံထၞာန်ဂၠိုၚ်အိုတ် ဂွံဆဵုကေတ်ရ။
ဗွဲကြဴဒးဒုၚ်ကၠောံထၞာန်ယဲတုဲ ပ္ဍ္ဲသၟောန်ပါၚ်ဂှ် ဒှ်သရဗြိုဟ်၊ ပ္ဍဲဇိုၚ်ကဵု တဲတံဂှ် လက္ချန်ဖဍတ်ဂုဟ်တိုန်တံ မံက်တိတ်ဂှ် ဂွံတီကေတ်ရ။
ယဲဇိုၚ်တဲသၟောန်ပါၚ် မကော်ဂး HFMD ဂှ် ၜိုန်ရယဲဟွံသ္ကာတ်မြဟ်ကီုလေဝ် ဒှ်ယဲဂကူ ဒမၚ်ကျောဝ်လွဳလွတ်ကဵု ၜိုတ် (၂) သတ္တာဟရ။
ပရိုၚ်−သြၚ်လောန်တိုၚ်(မ်)