ဟံၚ်ကံၚ်၊ နဝ်ဝေမ်ဗာ (၃၀)
က္ဍိုပ်သ္ကိုပ်ဟံၚ်ကံၚ် ဂျောန်လဳဂှ် အလဵုအသဳဗဟဵု မၞုံဗေကျေန်ဂှ်ဝွံ ဂွိၚ်ဂွါဲတဴဒၟံၚ် ဒဒှ်ရညးရေၚ်တၠုၚ်ဂဗုတ် ဍုၚ်သ္အာၚ်တံ ပါလုပ်ဆက်စပ်ဒၟံၚ် ပ္ဍဲကိစ္စပရေၚ်ဂီုကၠီုကောန်ဂကူတံ ဗွဲမလောန်ဂှ် ဟီုဂးလဝ် ပ္ဍဲဂိတုနဝ်ဝေမ်ဗာ (၂၉) တေံရ။
စပ်ကဵုဂလာန်မဟီုဂးလဝ်ဏံတုဲ နိဿဲဟီုဂးစုတ်လဝ် သီုကဵုပွံက်အဓိပ္ပာယ် စပ်ကဵုသၞောဝ်ဥပဒေ ဗေကျေန် မပြာကတ်တံဂှ်ရ။
ပ္ဍဲဂိတုနဝ်ဝေမ်ဗာ (၂၈) ဂှ် လဳဂှ် ညးရေၚ်တၠုၚ်ဂဗုတ်ဗျိတိၚ်မွဲတၠဂှ်ဝွံ ကြဴနူဒှ်ကၠုၚ်ညးရေၚ်တၠုၚ်ဂဗုတ် သေဌဳဇၞော်ဂျေန်မဳလိုၚ် ညးမၞုံပၟိက်ဒဳမဝ်ကရေဇြဳ မဒးဒၟံၚ်ထံၚ်တုဲဂှ် သွက်ဂွံကၟာတ်တာဒၞါထောံ ဒဒှ်မပါလုပ်ဆက်စပ်ဒၟံၚ် ပ္ဍဲကိစ္စပရေၚ်ဂီုကၠီုကၟိန်ဍုၚ်တံဂှ် အလဵုအသဳဗေကျေန် ရေၚ်တၠုၚ်အာရောၚ် ဇၞော်သ္ကိုပ်ဟံၚ်ကံၚ် ဟီုဂးလဝ်ရ။
ဌာနစဳရေၚ်ဂဗုတ်ဟံၚ်ကံၚ် သွက်ဂွံတာဒၞါ ညံၚ်ညးရေၚ်တၠုၚ်ဂဗုတ် ကောန်ဍုၚ်ဗျိတုၚ် မၞုံယၟု အဵုဝေန် မဒှ်ညးရေၚ်တၠုၚ်ဂဗုတ် ဂျေန်မဳလိုၚ် ဒယှ်တှ်အိုတ် ပ္ဍဲကဵုညးပါ်ပါဲၝောံဍုၚ်ကြုက် ဗော်ကောန်မျူနေတ်မသ္ကိုပ်သ္က ဂွိုအ်လုပ်စိုပ် ပ္ဍဲရုၚ်ဂဗုတ်ဂှ် တာလျိုၚ်လီုလဝ်ရ။
အဵုဝေန်ဂှ်တှ်ေ စပ်ကဵုအကာဲအရာဏံတုဲ မုတၚ်စၟတ်မှ ကဵုဟွံမာန်ပုဟ်ဂှ် ဟီုဂးလဝ်ကဵု ပရိုၚ်မဳဒဳယျာတံရ။
တၚ်ပ္တိုန်ဂလာန် အလဵုအသဳ သွက်ဂွံသၞောတ်ဗ္ၜတ် အခေါၚ်ပါလုပ်ညးရေၚ်တၠုၚ်ဂဗုတ်ဍုၚ်သ္အာၚ် မကၠောန်ဒၟံၚ် ပ္ဍဲကိစ္စပရေၚ်ဂီုကၠီုကောန်ဂကူတံဂှ်ကဵု သွက်ဂွံကၟာတ်တာဒၞါထောံ အဵုဝေန် နူကဵုပွမပါလုပ်ဒၟံၚ် အပ္ဍဲရုၚ်ဂဗုတ်ဂှ် ရုၚ်သၞောဝ်ဓဝ်ဟံၚ်ကံၚ်သၠုၚ်အိုတ် မဒှ်ရုၚ်သၞောဝ်ဓဝ် ဂရၚ်ပ္တီလက္ကရဴအိုတ်ဂှ် တးပါဲလဝ် ပ္ဍဲတ္ၚဲစန်တုဲကၠုၚ်တေံရ။
ၜိုန်ဂှ်ကီုလေဝ် ပွမပါလုပ်ဆက်စပ်ဗေကျေန် ပ္ဍဲကိစ္စကေၚ်ကာသၞောဝ်ဥပဒေဟံၚ်ကံၚ်တံဂှ်ဝွံ မွဲဒကုတ်မွဲဒကဴဂှ်တှ်ေ နွံဒၟံၚ်ပၟိက်ရောၚ်ဂှ်လေဝ် ဇၞော်သ္ကိုပ်ဟံၚ်ကံၚ် လဳ ဟီုဂးလဝ်ရ။
ပ္ဍဲသၞာံ ၁၉၉၇ ဟံၚ်ကံၚ် ကိုဝ်လိုဝ်နဳဗျိတုၚ်တြေံ နူစဒးဒုၚ်ကလေၚ်လှဲပြံၚ်လဝ် ဍုၚ်ကြုက်တုဲဂှ် ၜိုန်ရဒုၚ်လဝ်လျိုၚ် လ္ဂောံကဵုအစဳဇန် “မွဲဍုၚ် သၞောတ်ၜါ” ကီုလေဝ် အကာဲအရာလၟုဟ်ဂှ်တှ်ေ သကဵုပရေၚ်ဗၠးၜး စပ်ကဵုသၞောဝ်ဓဝ်ဟံၚ်ကံၚ် ဂွံလီုလာ်ရောၚ်ဂှ် တၠပညာသၞောဝ်လ္ၚဵုတံ ဟီုရ။
သီုကဵုလဳ သီုကဵုညးတာလျိုၚ် ဟံၚ်ကံၚ်တံဂှ် သ္ပလဝ်ကတိ ကုပရေၚ်အုပ်ဓလီု သၞောဝ်ဥပေဒဟံၚ်ကံၚ် သ္ကာတ်တ်မြဟ်ဟ်တုဲ ဒဒှ်ရကဵုလဝ်ပွစဵုဒၞါ ကုအဝဵုစဳရေၚ်ဂဗုတ် မဗၠးၜး အတိုၚ်သၞောဝ်သ္ဇိုၚ်ရောၚ်ဂှ်လေဝ် ဟီုဂးလဝ် ထပ်ကဵုထပ်ရ။
Ref: Reuters