ထိုၚ်ဝါန်၊ ဒဳဇြေမ်ဗာ (၁၄)
ကြဴနူကၟာတ်ထောံ ဗၞိက်ပၠောပ်ပ္တိုန်ထိုၚ်ဝါန်တံတုဲ လအ်ဂွံမွဲအံၚ်ဂှ် နဒဒှ်လက္ချန်ပရေၚ်ဆက်ဆောံ ထိုၚ်ဝါန်−ဗေကျေန် မဆောတ်ယောၚ်ကၠုၚ်ဂှ် ကြုက်ဝွံ ဗလးလဝ် က္ၜၚ်ကျာထောံမခတိုဟ် နျူကလဳယျာ မလုပ်လၟိဟ်ဗ္ၜတ် အပ္ဍဲဗွိုၚ်ဒေသစဵုဒၞါဘဲသၞတရဴကျာတံရ။
အပ္ဍဲပွိုၚ် (၂၄) နာဍဳ လောန်ကၠုၚ်တေံဂှ် က္ၜၚ်ကျာ (၂၁) ဖ္ဍိုက်ဝွံ လုပ်စိုပ်လဝ် ဗွိုၚ်ဒေသမစၟတ်လဝ် ပရေၚ်စဵုဒၞါဘဲသၞတရဴကျာ (ADIZ) ပလိုတ်သၠုၚ်ကျာတ္ကအ်ဂှ်တုဲ ပ္ဍဲကဵုက္ၜၚ်ကျာတံဏံဂှ် က္ၜၚ်ကျာထောံမခတိုဟ် နျူကလဳယျာ H-6 (၁၈) ဖ္ဍိုက်ပါလုပ်ဂှ် ဌာနဝန်ဇၞော်ကာစဵုဒၞါထိုၚ်ဝါန် လလောၚ်ပ္တိတ်လဝ်ရ။
ဍုၚ်တ္ကအ်ထိုၚ်ဝါန် ဒဳမဝ်ကရေတ်တေတ် ဂွံအခေါၚ်အုပ်ဓုပ်အပိုၚ်ဂှ် မွဲတ္ၚဲ သွက်ဂွံသီကေတ် နဒဒှ်တိဍာ်တွဵုဒၞက်ကြုက်မာန် ဒးဆေၚ်ဒၟံၚ်မုက်ကဵု ပွမဘပဠတံရ။
စနူကဵုပေါဲရုဲမာဲ သၞာံ ၂၀၁၆ သမ္မတ သာၚ်အေန်ဝါန် မတးပါဲထောံ တၚ်ဒတူလိုၚ် ဍုၚ်ထိုၚ်ဝါန် ဒှ်လစှ်ေဍုၚ်ကြုက်ဂှ်တုဲ ဗေကျေန် သၠုၚ်ပ္တိုန်ကၠုၚ်အသိၚ် ဇြဟတ်ဂရိုဟ် စပ်ကဵုပရေၚ်ပၞာန်၊ ပရေၚ်ကလုတ်တမန် ကေုာံ ပရေၚ်ပိုန်ဒြပ်တံရ။
ပြဟ်ဟ်ဏံ လ္တူကြုက် မကၟာတ်ဂဒဵုထောံ အခေါၚ်ပၠောပ်ပ္တိုန် ကပေါတ်ဗၞိက်တိတ်နူဍာ်၊ အရက်၊ ဍာ်ယာမ၊ စၞစထိုၚ်ဝါန်တံဂှ်တုဲ သ္ကိုပ်ဝန်ဇၞော်ထိုၚ်ဝါန်ဂှ် ဣဏံဝွံ ဝးပ္ကဝ်ဒၟံၚ် စေဝ်ပၞောန်သၠာဲဂတးဗၞိက် ဍုၚ်သ္အာၚ်တံတုဲ ပါ်ဒၟံၚ်ကဆံၚ် လ္တူတ္ကအ်ဝွံရောၚ် စောဲစပ်လဝ် ဗေကျေန်ရ။
ဂကူက္ၜၚ်ကျာ H-6 ဝွံ ဒှ်က္ၜၚ်ကျာထောံမခတိုဟ်ခြာဇမ္ၚောဲ ဍုၚ်ကြုက်အဓိကတုဲ သီုကဵုဖ္ဍိုက် ကမ်လှောဝ် နျူကလဳယျာတံမာန်ဂှ် သ္ဂးရ။
ပရေၚ်ဗလးက္ၜၚ်ကျာထောံခတိုဟ် H-6 အပ္ဍဲမွဲတ္ၚဲဓဝ် လ္တူ (၅) ဖ္ဍိုက်ဂှ်ဝွံ နကဵုဍုၚ်ကြုက်ဂှ် ကၠောန်သ္ပအောန်ကီုလေဝ် အပ္ဍဲသတ္တာဟ ဟွံလအ်တံဏံဂှ် ဗလးလဝ် ဂၠိုၚ်တိုန်ကၠုၚ် တီတီဒှ်ဒှ်ရ။
ဍုၚ်ဗွဲမဂၠိုၚ်ဂၠေၚ် ပါလုပ် သီုကဵုဍုၚ်အမေရိကာန်၊ ကနေဒါ၊ ကိုဝ်ရဳယျာသၠုၚ်ကျာ၊ ဂျပါန်ကေုာံ ကြုက်တံဝွံ လေပ်ထိၚ်ဒက်ခုတ်ပ္တန်လဝ် ဗွိုၚ်တိဍာ်စဵုဒၞါဘပဠဘဲသၞတရဴကျာ (ADIZ) တံ နွံရ။
AIDZ ထိုၚ်ဝါန်ဂှ် ဇၞော်နူကဵု တိဍာ်တွဵုဒၞက်ကျာဍေံတံ တၟာဂလိုၚ်တုဲ ထပ်ဒၟံၚ်ကဵုတိဍာ်လစှ်ေကြုက် မခုတ်လဝ်တံတုဲ ဒၞါဲၝောံဍုၚ်လ္ၚဵုတံလေဝ် ပါလုပ်ဒၟံၚ်ဂှ် ဂွံတီကေတ်ရ။
Ref: Bangkok Post