ပံၚ်၊ ဒဳဇြေမ်ဗာ (၁၅)
ပ္ဍဲကဵုအမှုဗၠာဲသၟိၚ် (၂) တၠ သီုကဵုပါလုပ် ဗၠာဲသၟိၚ်ထိၚ်ရး နူဗ္ဒိုပ်ဗၠာဲသၟိၚ်ဇိုၚ်ကျာ်၊ ပွိုၚ်ဍုၚ်ပံၚ်၊ တွဵုရးဍုၚ်မန် ဒးဒုၚ်ပန်ဂစိုတ်ဂှ် ညးဒေသ နူကွာန်ဒဒန်တာ မဒးဒုၚ်ရပ်လဝ်ဂှ် ဗွဲမဂၠိုၚ် ဟွံကလေၚ်ဗၠးကၠုၚ်ဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗၠာဲသၟိၚ် (၂) တၠ သီုကဵုပါလုပ် ဗၠာဲသၟိၚ်ထိၚ်ရး မစဴကၠုၚ် နူကွာန်ဒဒန်တာဂှ် ပ္ဍဲဂိတုဒဳဇြေမ်ဗာ (၁၁) တုဲကၠုၚ်တေံ လ္တူဂၠံၚ်ကွဳစက် လ္ဂုၚ်−မတ်မလီု ကွာန်ဖလာတ်၊ ပွိုၚ်ဍုၚ်ပံၚ်ဂှ် သၟာသေနာတ်ဟွံတီယၟုတံ ပန်ဂစိုတ်လဝ် ကဵုသေနာတ်ရ။
ကြဴနူဗၠာဲသၟိၚ် (၂) တၠ ဒးဒုၚ်ပန်ဂစိုတ်တုဲဂှ် ကောန်ဒပ်ကံၚ်ဇြဳပၞာန်တံ နကဵုတၚ်စောဲစပ် ပါလုပ်ဆက်စပ် ပ္ဍဲပရေၚ်ပန်ပှော်၊ ကဵုပရိုၚ်တံဂးတုဲ ကၠုၚ်စိုပ်ရပ်ဒက်ဏာလဝ် သၟတ်ရဲဒေသ (၁၄) တၠ သီုကဵုပါလုပ် ဥူမျာတ်ဇြာန် မၞိဟ်အာယုက်ဇၞော်ဇၞော်တံမဒှ်ရ။
လ္ပာ်ကံၚ်ဇြဳပၞာန်တံ ကြဴနူစၟဳစၟတ်သၟာန်သၟုက် ညးသၟတ်ဒေသ (၇) တၠ မဒးဒုၚ်ရပ်လဝ်တံတုဲဂှ် ကလေၚ်ဗလးလဝ်ကီုလေဝ် ညးဒေသမသှ်ေတံဂှ် ပလံၚ်လဝ် ပ္ဍဲဒၞါဲစၟဳစၟတ်တံတုဲ စၟဳစၟတ်ဒၟံၚ်ဂှ် ဂွံတီကေတ်ရ။
ဗၠာဲသၟိၚ်ထိၚ်ရး ဒုအကြာပ်ဒပ် မျဵုကိုဝ်ဝ် ကဵု ကောန်ဒပ်ဗၠာဲသၟိၚ် ခိုၚ်ဇြဝ်ထောန် မစဴကၠုၚ် ဗ္ဒိုပ်ဗၠာဲသၟိၚ်ဇိုၚ်ကျာ် နူကဵုကွာန်ဒဒန်တာတံဂှ်ဝွံ ဟိုတ်နူဒးဒုၚ်ပန်ကဵုသေနာတ်ဂှ်ရ ချိုတ်အာလဝ် ပ္ဍဲကဵုဒၞါဲဒှ်ပရူဂှ် လွာဲဂှ်ရ။
ကြဴနူဗၠာဲသၟိၚ်ၜါတၠ ဒးဒုၚ်ပန်ဂစိုတ်တုဲဂှ် လ္ပာ်ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီု အပ္ဍဲပွိုၚ်ဍုၚ်ပံၚ်တုဲ ဂၠိုက်ဂၠါဲစၟဳစၟတ်ကၟာတ်လဒဵုတံလေဝ် ကၠောန်ၜိုတ်ဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)