တယိတ်ချံၚ်၊ ဒဳဇြေမ်ဗာ (၁၅)
ဗ္ဒိုပ်ပံၚ်ကောံ ဒပ်ကံၚ်ဇြဳပၞာန် ကဵု ဂကောံပျူသဝ်ထဳ မဖျေံလဝ်ဗ္ဒိုပ် ပ္ဍဲကွာန်ပေဝ်ဒက် (ပဲဒက်)၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ် ပ္ဍဲဂိတုဒဳဇြေမ်ဗာ (၁၄) ပယျာံဂယးပြဟ် ဒးဒုၚ်ဗ္တိုက်လဝ်ဂှ် ညးမစုက်လုက်ကဵု ဒပ် PDF ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ ၜိုတ် (၄) နာဍဳဂယးဂှ် ဂကောံဒပ်ပံၚ်ကောံစဵုဒၞါညးဒေသတံ လုပ်စိုပ်ဗ္တိုက်လဝ် ဗ္ဒိုပ်ပံၚ်ကောံ ဒပ်ကံၚ်ဇြဳပၞာန်တံကဵု ဂကောံပျူသဝ်ထဳတံရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော် မွဲလ္ပာ်ကုမွဲလ္ပာ် က္တဵုဒှ်လဝ် လလအ်ဗ္ဒါဲ (၃) နာဍဳတုဲ အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် (၄) တၠ ဟွံအောန် ဇီုကပိုက်ချိုတ်မာန်ဂှ် သ္ဂးရ။
အပ္ဍဲပရေၚ်ဗ္တိုက်ဏံဂှ် ဒပ်ပံၚ်ကောံ PDF တံ သီဂိုၚ်ဂွံလဝ် လွဟ်လက်နက်လ္ၚဵု နူလ္ပာ်ကံၚ်ဇြဳပၞာန်ကဵု ပျူသဝ်ထဳတံဂှ်တုဲ သီုကဵုရပ်ဂွံလဝ် ကောန်ဒပ်ကံၚ်ဇြဳပၞာန်လ္ၚဵုနွံဂှ် ဟီုဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ဒပ်ပံၚ်ကောံစဵုဒၞါညးဍုၚ်ကွာန်ဒေသတံ ကြဴနူဗ္တိုက် ဗ္ဒိုပ်ပံၚ်ကောံကံၚ်ဇြဳပၞာန်၊ ပျူသဝ်ထဳတံတုဲဂှ် ဆုတ်ကလေၚ်ကၠုၚ် ဗွဲမအံၚ်ဇၞးကီုလေဝ် လ္ပာ်ကံၚ်ဇြဳပၞာန်ဂှ် ထပ်ဗပေၚ်ပၞာန်ရီုတုဲ စဵုကဵုလဒေါဝ်တ္ၚဲ ပန်ပှော်ဒၟံၚ် လွဟ်ဇၞော်၊ လွဟ်ဍောတ်ကြာန်န်ဂှ် ဂွံတီကေတ်ရ။
စပ်ကဵုပရေၚ်အာစိုပ်ဗ္တိုက် ဗ္ဒိုပ်ပံၚ်ကောံကံၚ်ဇြဳပၞာန်ဂှ်တုဲ ဂကောံဒပ်ပံၚ်ကောံ စဵုဒၞါညးဍုၚ်ကွာန်ဒေသတံ ဒဵုကဵုအခိၚ်လၟုဟ် ဟွံဂွံလလောၚ်ပ္တိတ်ဏီရ။
ပရိုၚ်−သြၚ်လောန်တိုၚ်(မ်)