မတ်မလီု၊ ဒဳဇြေမ်ဗာ (၁၅)
ဍုၚ်အိန္ဒိယ ဒၟါနူဇြဟတ်ရာန်ၜဲ ဂၠိုၚ်ကၠုၚ်ဒၟံၚ်ဂှ်ရ ပ္ဍဲဗွဝ်ဖျာၜဲဇၞော် တွဵုရးဍုၚ်မန်ဂှ် ကြဴနူဇြဟတ်ရာန် သၠုၚ်တိုန်ကၠုၚ်တုဲ ၚုဟ်ထပ်သၠုၚ်တိုန်ကၠုၚ်ရဂှ် သၟာဗၞိက်ၜဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ၜဲဇၞော်ဝွံ ယဝ်ရဒးပ္တောံကဵု ၚုဟ်နူဂိတုမာတ် အခိၚ်ၜဲတိတ်တေံမ္ဂး ၚုဟ်ထပ်သၠုၚ်တိုန်ကၠုၚ် စဵုကဵု (၂၀၀၀၀) ဒ္ကေဝ်ပြၚ်ရ။
ၚုဟ်ၜဲထပ်သၠုၚ်တိုန်ဒၟံၚ်ကီုလေဝ် ကာလလၟုဟ်ဝွံ ဟိုတ်နူဒှ်အခိၚ်တဵုၜဲဂှ်ရ အပ္ဍဲဗွဝ်ဖျာဂှ် ၜဲသှ်ေသၟေဟ်တံ ဟွံမွဲရပုဟ်ဂှ် သၟာဗၞိက်ၜဲမွဲတၠ သ္ဂးရ။
“အိန္ဒိယ ရာန်ဒၟံၚ်လေဝ်၊ ဇြဟတ်ရာန် ဂၠိုၚ်ညိည ဒှ်ဂွံဏောၚ်၊ ဗ္ၜတ်ကလေၚ်တိုန်ဂှ် ဒှ်ဒၟံၚ်ဗီုပြၚ် ကလေၚ်ကဵုၚုဟ် ဒၟါနူတၚ်နွံပၟိက်နွံဏောၚ်၊ ၜဲဇၞော်ဂှ်လေဝ် ပ္ဍဲဒေသဇကုဂှ် ၜဲဇၞော်ဟွံမွဲရပုဟ်၊ ၜဲပိုယ်စွံလဝ်တံဂှ် သွံထောံယျ၊ အခိၚ်ဏံ ပ္ဍဲဒေသပိုယ် ၜဲတိတ် ဟွံမွဲရပုဟ်၊ ပ္ဍဲမတ်မလီုဂှ်တှ်ေ ပိုယ်လေဝ် လၟုဟ်မှ ဂွံစတဵု” သာ်ဝွံ သ္ဂးရ။
ၜဲဇၞော် တိတ်နူဒေသတံဏံမ္ဂး တဵုသြောံကသီုတုဲမှ တဵုလွဳဒၟံၚ် နဒဒှ်သတ်မုဟ်ကျာတံဂှ်ရ ပ္ဍဲတဲသၟာဂူဗ္ၚတံ ၜဲဇၞော်သၟေဟ် ဟွံမွဲရတုဲ ပ္ဍဲသၟာဗၞိက်လ္ၚဵုတံလေဝ် ၜဲသှ်ေသၟေဟ် ၜိုတ်ညိညရဟေၚ် နွံဂှ် ဂွံတီကေတ်ရ။
ၚုဟ်ၜဲဇၞော်ဝွံ ဟိုတ်နူဇြဟတ်ရာန်ဍုၚ်သ္အာၚ်သၠုၚ်တိုန်တုဲ သှ်ေအောန်စှ်ေကၠုၚ်ဂှ်ရ ၚုဟ်သၠုၚ်တိုန်ကၠုၚ်ကီုလေဝ် အခိၚ်ၜဲဇၞော်တၟိ ကလေၚ်တိတ်ဂှ် ၚုဟ်ကလေၚ်စှ်ေကၠုၚ်မာန်ရောၚ် တၠကမၠောန်ၜဲတံ သ္ၚဳဂၠိပ်လဝ်ရ။
ဆ္ဂး သၟာဂူဗ္ၚတံဝွံ အခိၚ်တဵုလွဳၜဲဇၞော်တံဂှ် ဒးဒုၚ်စသိုၚ်လဝ် ဘဲဒဏ်ခရိတ်အိုတ်နာနာ ကေုာံ ကပေါတ်တမ်တံ ဇၞော်သၠုၚ်တံဂှ်တုဲ ပ္ဍဲအခိၚ်ၜဲဇၞော် ဟွံမွဲ ပ္ဍဲတဲဂှ် ၚုဟ်ကလေၚ်သၠုၚ်တိုန်ကၠုၚ်ဂှ်ရ ပရဲပရာ ဟွံမွဲပုဟ်ဂှ် သ္ဂးအိုတ်ရ။
ၜဲဇၞော် တိတ်နူဒေသ ပါလုပ်သီုကဵုၜဲနာနာတံဂှ် ဍုၚ်အိန္ဒိယကဵု ဍုၚ်ကြုက်တံ ရာန်ကေတ်ဒၟံၚ်အဓိကတုဲ ပါကေဿတာန်၊ နဳပဝ်၊ သေန်ကာပေါဝ် ကေုာံ ဍုၚ်သေံတံလေဝ် ဗ္ကန်ပၠောပ်ပ္တိုန်ဒၟံၚ်တံ နွံဒၟံၚ်ရ။
ပ္ဍဲတွဵုရးဍုၚ်မန်ဂှ် တဵုဒၟံၚ် ၜဲဇၞော်၊ ၜဲသ္ၚေက်၊ ၜဲတလတ် ကေုာံ ၜဲသ္ၚေက်(သာ်ထဝ်) တံအဓိကတုဲ နကဵုတိဨကတဵုလွဳတံဂှ်လေဝ် (၁၇၀,၀၀၀) ပြၚ်နွံတုဲ လၟေၚ်သၞာံ ၜဲနာနာ သီုကဵုပါလုပ် ၜဲဇၞော်တံဂှ် လယျိုၚ်တာန် ပွဳပွူ (၂၀,၀၀၀) တိတ်ဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)