ပံၚ်၊ ဂျူလာၚ် (၁၃)
ပ္ဍဲကွာန် ဖလာတ်ဝတ်ကျဳ၊ ပွိုၚ်ဍုၚ်ပံၚ်၊ တွဵုရးဍုၚ်မန်ဂှ် ဂိတုဂျူလာၚ် (၁၂) ၜိုတ် (၉) နာဍဳ ပယျာံဂယးဂှ် သၟတ်ဗြဴအာယုက် (၁၀) သၞာံ (၃) တၠ ဗၠိုက်ဍာ်ချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၟတ်ဗြဴ (၃) တၠဂှ်ဝွံ အာပလံၚ်ပုၚ်ဂအုပ် ဇရေၚ်အပါ မမၚ်ဒၟံၚ်သဳ ပ္ဍဲဘာလကျာ် ဂြိုပ်ကြုက်တုဲ ကလေၚ်စဴကၠုၚ်ဂှ် ဒဒှ်မဗၠိုက်ဍာ်ချိုတ်အာလဝ် အပ္ဍဲကၟာဍာ် မၜံက်ခါဲလဝ် တိဂတိုၚ်တၟံတံဂှ်ရ။
သၟတ်ဗြဴ မဗၠိုက်ဍာ် ချိုတ်အာ (၃) တၠ ပလံၚ်ပုၚ်ဂအုပ်တုဲ ဟွံကလေၚ်စိုပ်သ္ၚိဂှ်ရ အဃောမအာဂၠါဲဂှ် ဂွံဆဵုကေတ်လဝ် ဂအုပ်ပုၚ်(ဂျိုက်)ဂှ် ကဵု ဒၞပ် ပ္ဍဲဗ္ဒါဲကၟာဍာ်ဂှ်ရ။
လက္ကရဴဂှ်တုဲ အဃောဗက်ဂၠိုက်ဂၠါဲ အပ္ဍဲကၟာဍာ်ဂှ် ပ္ဍဲဗဒါဲတၟံ လဒေါဝ်ကၟာဍာ်ဂှ် ကလေၚ်ဂွံဆဵုလဝ် ဇွသၟတ်ဗြဴ (၃) တၠဂှ်ရောၚ်။
ညးမဗၠိုက်ဍာ် ချိုတ်အာတံဝွံ မဖျဵုသဳရဳ အာယုက် (၉) သၞာံ၊ မသဵုပျေအ်အ်ဇြာန် အာယုက် (၁၁) သၞာံ၊ မခိုၚ်ဒါတုၚ် အာယုက် (၁၂) သၞာံတံ မဒှ်တုဲ ဍေံတံဝွံ ဒှ်ကောန်ၚာ်သၟတ် မတိုန်စိုပ်ကတ်ဗ္တောန်ဒၟံၚ် ပ္ဍဲဘာမူလောန် ဇြယေတ်ချံၚ် တံရဂှ် သ္ဂးရ။
ဇွသၟတ်ဗြဴ (၃) တၠ မဗၠိုက်ဍာ်ချိုတ်အာတံဂှ် ပလံၚ်ဗစိုပ်စၟဳစၟတ် ရုၚ်ဂဥုဲညးဍုၚ်ကွာန်ပွိုၚ်ဍုၚ်ပံၚ်တုဲ ရေၚ်တၠုၚ်ကၠောန်ၜိုတ်ဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)