ၜဳကလေၚ်၊ ဂျူလာၚ် (၁၃)
ဗွဲကြဴရပ်ဒက် က္ဍိုပ်သ္ကိုပ်ပျူသဝ်ထဳ နူကွာန်တပျေနဳ၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန် မျဵုသဳတူဂှ်တုဲ ဂစိုတ်ထောံလဝ်ရောၚ်ဂှ် ဂကောံဇြဟတ်ပၠန်ဂတး ကျာ်ထဝ် (KRF) လလောၚ်ပ္တိတ်လဝ် ပ္ဍဲဂိတုဂျူလာၚ် (၁၂) ဂှ်ရ။
တုဲကၠုၚ် ပ္ဍဲဂိတုဂျူလာၚ် (၁၁) ၜိုတ် (၈) နာဍဳဗ္တံဂှ် ကုက္ဍိုပ်သ္ကိုပ်ပျူသဝ်ထဳ မကၠတ်မံၚ်သ္ပဒတဴဒၟံၚ် အပ္ဍဲဘာလကျာ် ကွာန်တပျေနဳ မျဵုသဳတူဂှ် ဂကောံဇြဟတ်ပၠန်ဂတးကျာ်ထဝ် (KRF) ကဵု တမ်ဒပ် (၂) PDF တံ လုပ်စိုပ်ရပ်ဒက်လဝ်ရ။
အဃောမရပ်ဒက် က္ဍိုပ်သ္ကိုပ်ပျူသဝ်ထဳ မျဵုသဳတူဂှ် သီဂိုၚ်ဂွံလဝ် မခတိုဟ်ကၠဟ်တဲ (၂) မတုဲ ဗွဲကြဴစၟဳစၟတ်သၟာန်သၟုက်တုဲ ဒဒှ်ရလုတ်လောန်လဝ် ဒုဟ်ဒဏ်တံ ပြာကတ်ဒၟံၚ်ဂှ်ရ ဂစိုတ်ထောံလဝ်ရဂှ် ညးဒုၚ်တာလျိုၚ် ဂကောံဇြဟတ်ပၠန်ဂတးကျာ်ထဝ် ( KRF) မွဲတၠ ဟီုရ။
အတိုၚ်ဂလာန် ညးဒေသတံဂှ်မ္ဂး က္ဍိုပ်သ္ကိုပ်ပျူသဝ်ထဳဝွံ ရေၚ်တၠုၚ်ကဵုဒၟံၚ်ပရိုၚ် ကံၚ်ဇြဳပၞာန်တုဲ ဟိုတ်နူညးတုဲ ညးဒေသ (၂၀) တၠ ဟွံအောန် ဒးဒုၚ်ရပ်ဒက်လဝ်ရဂှ် သ္ဂးရ။
ဂကောံဇြဟတ်ပၠန်ဂတး ကျာ်ထဝ် KRF ဂှ် ကုကောန်ရဲတဲခွာ ကံၚ်ဇြဳပၞာန်တံ၊ ညးကဵုပရိုၚ် ကေတ်မုက်တံ၊ တိုၚ်အထံက် ကံၚ်ဇြဳပၞာန်တံဂှ် ဒဒှ်ရ ဆက်ဗ္တိုက်သၠေက်အာရောၚ်ဂှ်ကီု ကေုာံ မၚ်မွဲစဵုဒၞါအာ သ္ၚိဌာန်ကၠအ်သွဝ်လမျီု ညးဍုၚ်ကွာန်တံရောၚ်ဂှ် လလောၚ်ပ္တိတ်လဝ်ရ။
ပ္ဍဲပွိုၚ်ဍုၚ်ၜဳကလေၚ်ဂှ် ဗွဲကြဴဒပ်ပၞာန်သီအဝဵုတုဲ ညးကဵုပရိုၚ်ကေတ်မုက်ကံၚ်ဇြဳပၞာန်တံ ကဵု ကောန်ဂကောံပျူသဝ်ထဳတံ (၁၀) တၠဟွံအောန် ဒးဒုၚ်ဂစိုတ်လဝ်ရ။
ပရိုၚ်−သြၚ်လောန်တိုၚ်(မ်)