မတ်မလီု၊ ဂျူလာၚ် (၁၄)
ပ္ဍဲအရာပ် (ဒေါၚ်းဇရပ်) မၞုံဍုၚ်မတ်မလီု၊ တွဵုရးဍုၚ်မန်ဂှ် ဗွဲကြဴထ္ပက်ဂဥုဲစဵုဒၞါ ယဲကဝ်ဝေဒ် အပ္ဍဲအရာပ်တုဲဂှ် မၞိဟ်တြုံမွဲတၠ ချိုတ်အာလဝ်ဂှ် ညးဍုၚ်ကွာန် ဒၟံၚ်ပ္ဍဲအရာပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မၞိဟ်တြုံ အာယုက် (၃၆) သၞာံ မွဲတၠဝွံ တုဲကၠုၚ် ဂိတုဂျူလာၚ် (၆) ဂှ် ကြဴနူထ္ပက်ဂဥုဲစဵုဒၞါ ယဲကဝ်ဝေဒ် မထ္ပက်ကဵုဒၟံၚ် အပ္ဍဲအရာပ်တံဂှ်တုဲ ပ္ဍဲဂိတုဂျူလာၚ် (၇) ဂှ် ချိုတ်အာလဝ်ရ။
မၞိဟ်တြုံမချိုတ်အာဂှ်ဝွံ ဒှ်ညးဒဳဒၟံၚ် ကွဳစက် မတ်မလီု−မြဝတဳတုဲ ယဲခန္ဓလေဝ် ဟွံမွဲမွဲသာ် ဗွဲကြဴထ္ပက်ဂဥုဲစဵုဒၞါကဝ်ဝေဒ်တုဲဂှ် ဍောၚ်ဂးတုဲ အဃောစဴဇူပ္ဍဲသ္ၚိဂှ် မ္ဒးချိုတ်အာလဝ်ရ၊ စပ်ကဵုအကာဲအရာဏံတုဲ ညးဍုၚ်ကွာန်ကောန်အရာပ်မွဲတၠ ဟီုလဝ် ဗီုဏံရ။
“ဍေံဂှ် ထ္ပက်ဂဥုဲကိုဝ်ဝေဒ်တုဲ ချိုတ်အာရ၊ ပ္ဍဲဍေံဂှ် မုယဲခန္ဓသာ်လဵုမှ ဟွံမွဲပုဟ်၊ မၞိဟ်ဏံဂှ် ဒဳဒၟံၚ်ကွဳစက် မြဝတဳ၊ ဒးထ္ပက်ဂဥုဲရောၚ်ဂးတုဲ ပယျာံသဝ်တ္ၚဲဂှ် စဴကၠုၚ် ခရက်ခရက်ခဗက်ခဗက်၊ ထ္ပက်တုဲဂှ် ဍောၚ်ဂးတုဲ စဴအာသ္ၚိ၊ စဴတိက်ဒၟံၚ်ပ္ဍဲသ္ၚိတုဲ တ္ၚဲယးဂှ် ချိုတ်အာဟဂှ်ရ၊ မုယဲ မုလက္ချန်မှ ဟွံမွဲပုဟ်” သာ်ဝွံ သ္ဂးရ။
ကုမၞိဟ်တြုံ ထ္ပက်ဂဥုဲစဵုဒၞါကိုဝ်ဝေဒ်တုဲ မချိုတ်အာဂှ် အ္စာဂဥုဲ သၟဝ်တဲကံၚ်ဇြဳပၞာန်တံ ဟီုဂးဒၟံၚ် မၞိဟ်ယဲသံသယ ကိုဝ်ဝေဒ်ဟေၚ်တုဲ ချိုတ်အာလဝ် ကဵုယဲမုရောဟီုဂှ်လေဝ် ဟီုဂးလဝ် ချိုတ်တ်ပၠိုတ်တ် ဟွံမွဲပုဟ်ဂှ် ညးအရာပ်တံ ဟီုရ။
စပ်ကဵုအကာဲအရာဏံတုဲ နူကဵုဌာန်ပရိုၚ်သြၚ်လောန်တိုၚ်(မ်) ၜိုန်ရကေတ်အဆက်သၟာန်သၟုက် ကုဒံက်တာနန္ဒဝေန် သ္ကိုပ်က္ဍိုက်ပ်တွဵုရး ဌာနက္ဍိုက်ပ်ပရေၚ်ထတ်ယုက် တွဵုရးဍုၚ်မန် သၟဝ်တဲကံၚ်ဇြဳပၞာန်ဂှ်ကီုလေဝ် အလဵုမၞိဟ်အာစိုပ်ဆဵုဂဗမှ သွဟ်ကဵုရောၚ်ဂှ် ဟီုဂးလဝ်ရ။
အလုံတွဵုရးဍုၚ်မန်ဂှ် အဃောထ္ပက်ဂဥုဲစဵုဒၞါကိုဝ်ဝေဒ်ဂှ် ၜိုတ်ဇကုဂမ္တဴ၊ ဂိဂေၚ်၊ ထၜူ တံဓဝ် နွံကၠုၚ်ကီုလေဝ် ဒဒှ်ရမၞိဟ်ချိုတ်အာလဝ် ဗီုလၟုဟ်သာ်ဏံဂှ် က္တဵုဒှ်လဝ် အလန်ပထမကိုပ်ကၠာအိုတ်ရ။
ကံၚ်ဇြဳပၞာန်ဂှ် အခိၚ်လၟုဟ် ကုကွးဘာတန်သ္ဇိုၚ် အာယုက် (၅) သၞာံ စဵုကဵု (၁၂) သၞာံတံဂှ် ဆက်ထ္ပက်ကဵုဒၟံၚ်ဂဥုဲစဵုဒၞါ ကိုဝ်ဝေဒ် (Sinopharn) ဂှ်တုဲ ပ္ဍဲအရာပ်တံဂှ်လေဝ် ကုညးဂွိုအ်ထ္ပက်ဂဥုဲစဵုဒၞါကဝ်ဝေဒ်တံဂှ် ဆက်ထ္ပက်ကဵုဒၟံၚ်ရ။
ပရိုၚ်−သြၚ်လောန်တိုၚ်(မ်)