မတ်မလီု၊ ဂျူလာၚ် (၁၃)
ပ္ဍဲတွဵုရးဍုၚ်မန် အပ္ဍဲကာလပၞာန်သီအဝဵု ပွိုၚ်မွဲသၞာံပြၚ်ဂှ် ညးဍုၚ်ကွာန်ကဆံၚ်မၞိဟ်သ္ဇိုၚ်တံဝွံ ဒးဆေၚ်ဒၟံၚ်မုက်ကဵု အကြေပ်ဂြတ် ပရေၚ်စသုၚ်မံၚ်စံၚ်ဗွိုၚ်လ္တက် သ္ၚိကၟိန်တံ ဗွဲမဇၞော်ကဵုဇြဟတ်တုဲ ဗ္ဂါပ်ပုၚ်ဂွံမှာန်ဂှ် ဒှ်ကၠုၚ်တၟာဂလှ်ေရဂှ် ညးဍုၚ်ကွာန်ကဆံၚ်မၞိဟ်သ္ဇိုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဍုၚ်ကွာန်ကဆံၚ်မၞိဟ်သ္ဇိုၚ်တံဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် ဟိုတ်နူၚုဟ်ဗၞိက် သၠုၚ်တိုန်ကၠုၚ် မွဲဆမွဲတာန်ကီု၊ ကမၠောန်ကၟိတ်အောန်စှ်ေကၠုၚ်ကီု ကေုာံ ဟိုတ်နူစေဝ်ပၞောန် ကံၚ်ဇြဳပၞာန်တံ မပတေၚ်ဂြတ်လဝ်ဂှ်ရ ဒးဆေၚ်ဒၟံၚ်မုက်ကဵု အကြေပ်ဂြတ်ပရေၚ်စသုၚ်မံၚ်စံၚ်ဗွိုက်လ္တက် သ္ၚိကၟိန်တံရ။
ဟိုတ်နူပြသၞာ ပရေၚ်စသုၚ်မံၚ်စံၚ်ဗွိုက်လ္တက်သ္ၚိကၟိန်တံတုဲ ကမၠောန်မနွံဒၟံၚ်ညိညတံဂှ် မဂဗမကၠောန် ၜိုန်ရဒးကၠောန်စသုၚ်ဒၟံၚ်ကီုလေဝ် ဟိုတ်နူကမၠောန်ဟွံမှာန်တံ ကဵု ၚုဟ်ဗၞိက်ဇၞော်သၠုၚ် မွဲဆမွဲတာန်တံဂှ်ရ သွက်ဂွံစပုၚ်ဂှ် ဒှ်ဒၟံၚ်တၟာဂလှ်ေရဂှ် ညးဍုၚ်ကွာန်ကၠောန်မွဲတ္ၚဲ စမွဲတ္ၚဲမွဲတၠ ဟီုရ။
“အခက်အခုဲဂှ်တှ်ေ ဗီုဏံရ၊ ကၠောန်အာ စအာ၊ စအာ ကၠောန်အာ၊ ကမၠောန်ဂှ်လေဝ် လဆောဝ်နွံ လဆောဝ်ဟွံမွဲ၊ တွဵုတွဵုဂှ်တှ်ေ နကဵုခရိတ်ကမၠောန်မွဲဓဝ်ဂှ် မ္ၚးနူစသုၚ်ရုမ်ဂပ်တုဲ သီုကဵုပ္ကောံဂွံမံၚ်၊ လၟုဟ်ဂှ်တှ်ေ သၠုဲဂှ် ဟွံရုမ်ဂပ်ပုဟ်၊ ဗီုဏံရ ဇက်ဂၠေံတုဲ စအာ၊ ဂွံကမၠောန်တှ်ေ ဆာပ်လဴအာ ဂေတ်ဒၟံၚ်အေဗီုဏံ၊ ပုၚ်ရဂှ် စဟွံမာန်ပုဟ်၊ ကမၠောန်ဟွံမှာန် ၚုဟ်ဗၞိက်တံဂှ်က္ဍၚ်တုဲ သွက်ဂွံစပုၚ်ဂှ် ဒှ်ဒၟံၚ်တၟာဂလှ်ေ၊ ဒှ်အာ ဍာ်ဏံအိုတ်ယျ” သာ်ဝွံ သ္ဂးတဴရ။
ညးဍုၚ်ကွာန်ကဆံၚ်မၞိဟ်သ္ဇိုၚ်တံဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် သီုကဵုသ္ၚု မပါလုပ် ဗၞိက်စသုၚ်သ္ဇိုၚ်တံ ၚုဟ်သၠုၚ်တိုန်ကၠုၚ် မွဲဆမွဲတာန်ဂှ်ရ ဒးဖန်စဖန်သုၚ်ဒၟံၚ်တုဲ အာဟာရ ဟွံဍိုက်ပေၚ်တုဲ သီုကဵု ဒးဒုၚ်စသိုၚ်ဒၟံၚ် ပြသၞာပရေၚ်ထတ်ယုက်တံရ။
သ္အာၚ်နူဂှ်ပၠန် ပ္ဍဲအရာကၠောန်ၜိုတ်စသုၚ် မဂဗမကၠောန် သွက်ပရေၚ်ဗုၚ်ဂၞဴသ္ၚိကၟိန်တံဂှ်လေဝ် ဟိုတ်နူဒးဒုၚ်ဖအောန်ဖျေံလဝ် ခရိတ်ကမၠောန်ၚုဟ်လိၚ် တံဂှ်ရ ဒးဂဗဒၟံၚ်ကဵု အကာဲအရာသြန်လုပ် ကဵုသြန်တိတ် ဟွံရုမ်ဂပ်တံတုဲ ဒးဂၠေံဇက်ကၠုၚ်ဂှ်ကီု သ္ၚိကၟိန်လ္ၚဵုတံမ္ဂး မွဲတ္ၚဲ ဂွံစပုၚ်မွဲဗ္ဂါပ်ဂှ် ဒးဂ္စါန်ဒၟံၚ် တၟာဂလှ်ေရ။
အခိၚ်လၟုဟ်ဂှ် ညးဍုၚ်ကွာန်ကဆံၚ်မၞိဟ်သ္ဇိုၚ်တံဝွံ ဟိုတ်နူအကြေပ်ဂြတ်ပရေၚ်စသုၚ်မံၚ်စံၚ်တုဲ သီုကဵုကမၠောန် မ္ၚးဗွိုၚ်သၞောဝ်ဥပဒေတံဂှ် လုတ်လောန်တုဲ ကၠောန်ၜိုတ်စသုၚ်ကၠုၚ်အိုတ်ရဂှ် ညးမရီုဗၚ်ကဵုဒၟံၚ် ပရေၚ်ညးဍုၚ်ကွာန်ကဆံၚ်မၞိဟ်သ္ဇိုၚ်မွဲတၠ ဟီုရ။
“လ္ၚဵုတံဂှ်တှ်ေ ကောန်သ္ၚိကၟိန်ဂှ် ပိပန်တၠ နွံ၊ မၞိဟ်ကၠောန်ကမၠောန်ဂှ် မွဲတၠရ နွံ၊ မွဲရနွံတုဲ ပရေၚ်စသုၚ်မံၚ်စံၚ် ဗွိုက်လ္တက်တံဂှ် ဗီုလဵုမှ ဟွံပြေပြံၚ်အိုတ်ရ၊ ညးတံ ကြေပ်ဂြတ်အာ ကွေံကွေံရ၊ မၞိဟ်တံဂှ် ဒးဟီုကၠးကၠးမှးမှးမ္ဂး သီုဖအိုတ် ကမၠောန်ဟွံမွဲပုဟ်၊ ဒှ်အခက်အခုဲ ပရေၚ်စသုၚ်မံၚ်စံၚ်ဗွိုက်လ္တက်တုဲ ဒးဗက်ကၠောန်ဒၟံၚ် မဂွံမကၠောန်ရ၊ လၟုဟ်မ္ဂးလေဝ် မၞိဟ်ကၠတ်ဂှ် ကၠတ်၊ မၞိဟ်ဟွံကေၚ်သွံဂဥုဲချေံတံ မုတံလေဝ် သွက်ပရေၚ်စသုၚ်မံၚ်စံၚ်တံဂှ် ဒးဗက်ကၠောန်ဒၟံၚ်တံ နွံဒၟံၚ်ရ၊ ပိုယ်တံဂှ် ဆဵုလေဝ်ဆဵု ညာတ်လေဝ်ညာတ်ဒၟံၚ်ရ” သာ်ဝွံ သ္ဂးရ။
မွဲလ္ပာ်ပၠန်ဂှ် ညးဍုၚ်ကွာန်ကဆံၚ်မၞိဟ်သ္ဇိုၚ်တံဝွံ အပ္ဍဲကၟိန်ဍုၚ်ဂှ် မ္ၚးနူကမၠောန်ကၟိတ်ဟွံမွဲဂှ် သီုကဵုအခက်အခုဲ ပရေၚ်စသုၚ်မံၚ်စံၚ်ဗွိုက်လ္တက်တံတုဲ အာစိုပ်ကၠောန်ကမၠောန် ပ္ဍဲဍုၚ်သေံ နူကဵုဂၠံၚ်ဟွံဗဗွဲဓဝ် မွဲကဆံၚ်တံ နွံကၠုၚ်တုဲ အရိုဟ်ဒဒှ်တ္ၚဲ ဒးဒုၚ်ရပ်ဒၟံၚ်ရ။
အတိုၚ်ဂလာန် အစဳဇန်ဇွောံမစၞစဂၠးတိ (WFP) ဂှ်မ္ဂး ဟိုတ်နူကံၚ်ဇြဳပၞာန် သီလဝ်အဝဵုတုဲ အပ္ဍဲသၞာံဏံ ညးဍုၚ်ကွာန်ကၟိန်ဍုၚ်ဗၟာ (၂) ပြကောဋိကိုဋ်ပြၚ်ဝွံ သွက်ဂွံထပ်တုဲ ဒးဆေၚ်မုက်ကဵု ဘဲအန္တရာယ် ကၞောဝ်ကၠောဝ်ဗျဵုနွံဒၟံၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)