မတ်မလီု၊ ဂျူလာၚ် (၁၄)
ပ္ဍဲကဵုဒေသသ္ကုတ်သၠုၚ်ကျာ ကၟိန်ဍုၚ်ဗၟာ တွဵုရးဍုၚ်မန်၊ တွဵုရးကရေၚ်၊ ရးဒေသဇၞော်တၞၚ်သဳတံဂှ် အပ္ဍဲဂိတုဂျောန်တုဲကၠုၚ်တေံ ဒပ်ကံၚ်ဇြဳပၞာန် ကဵု ဂကောံသၟဝ်တဲဍေံတံဂှ် ရပ်ဒက်ဂစိုတ်လဝ် ညးဍုၚ်ကွာန်ကောန်အရာပ် ဗဒါဲ (၂၀) ပြၚ်ရဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ဌာန်သ္ဇိုၚ်အခေါၚ်အရာမၞိဟ်ဍုၚ်မန်ဂှ်ရ။
အတိုၚ်လိက်ဒုၚ်စဳရေၚ် ဌာန်သ္ဇိုၚ်အခေါၚ်အရာမၞိဟ်ဍုၚ်မန်ဂှ် အပ္ဍဲဂိတုဂျောန်ဂှ် ဒပ်ကံၚ်ဇြဳပၞာန်ဝွံ ရပ်ဒက်ဂစိုတ်လဝ် ညးဍုၚ်ကွာန်ကောန်အရာပ် (၁၉) တၠတုဲ ညးဍုၚ်ကွာန် ဟွံမွဲကဵုဒုဟ်ဒဏ် (၉၀) တၠဂှ်လေဝ် ရပ်ဒက်လဝ် ဟွံဗဗွဲဓဝ်ရဂှ် သ္ဂးလဝ်ရ။
ဟိုတ်နူဒပ်ကံၚ်ဇြဳပၞာန်သီအဝဵု လုပ်စိုပ်ချဳဒရာၚ် ပရေၚ်ပၞာန်ကီု၊ ထ္ပက်ပၞာန်ကီု ကေုာံ ပန်ပှော်ဗ္တိုက်ဒၟံၚ် နကဵုလွဟ်လက်နက်ဇၞော်တံဂှ်ရ ညးဒးဂြိပ်ဒဴထောံလသာသ္ၚိဌာန် စဵုကဵု (၃၃၀၀) ပြၚ် နွံကၠုၚ်လဝ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
အပ္ဍဲဂိတုဂျောန်ဂှ် ပ္ဍဲတွဵုရးဍုၚ်မန် ကဵု ရးတၞၚ်သဳဂှ် ကံၚ်ဇြဳပၞာန် ထ္ၜးဟိုတ် ဒဒှ်ရချဳဒရာၚ် ပရေၚ်ဒဳမဝ်ကရေဇြဳဂးတုဲ ကုကောန်ကမၠောန် ပရေၚ်ထတ်ယုက် (၂၀) တၠဂှ်လေဝ် ပ္တိတ်ထောံကမၠောန်တုဲ လိက်ဝါရာန် ဟွံပါမွဲသာ် ပရေၚ်ရပ်ဒက် ဟွံဗဗွဲဓဝ် လ္တူကောန်အရာပ်တံဂှ်လေဝ် ဆက်နွံဒၟံၚ်ဂှ် သ္ဂးလဝ်ရ။
သၞာဲဒဴပရေၚ်ဂီုကၠီု ဂယျိုၚ်အရာပ်ဂမၠိုၚ် မသ္ပလဝ်ဇုတ်ဓရံၚ်လက္ကရဴကဵု ဒပ်ပၞာန် မဂၠိုၚ်တိုန်တံဂှ် စကာနဲကဲ ပထုဲပလာပ် ဖ္ဍိုက်ဂရိုက်တံတုဲ နူကဵုကောန်အရာပ်တံဂှ် တ္ၚေတ်ပတ်ဘပဠကေတ်ဒၟံၚ် သၠုဲသၠာ် ကေုာံ ပိုန်ဒြပ်တံရောၚ်ဂှ် လလောၚ်ပ္တိတ်လဝ်ရ။
တုဲပၠန် လိက်ဝါရာန်ဟွံမွဲမွဲသာ် ပွမလုပ်ဍိုက်သ္ၚိဒၟံၚ်တံဂှ်ကီု၊ ဟွံစွံလဝ် တၚ်စၟတ်သမ္တီ ကုဒေသကောန်အရာပ်တံမွဲသာ် ဒဒှ်မပန်ပှော်ဆဆဵုတံကီုဂှ်ရ ပရေၚ်ရပ်ဒက် ဟွံမွဲကဵုသၞောဝ် ကေုာံ ပရေၚ်ထိၚ်ဒက် ဟွံမွဲကဵုသၞောဝ် ကံၚ်ဇြဳပၞာန်တံ ဆက်က္တဵုဒှ်ဒၟံၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ပရိုၚ်−သြၚ်လောန်တိုၚ်(မ်)