မတ်မလီု၊ ဂျူလာၚ် (၁၅)
ကံၚ်ဇြဳပၞာန်သီအဝဵုဂှ် ထိၚ်ဒက်လဝ် ဗွဝ်ဖျာကၠေၚ်စက်တုဲ အရိုဟ်ဒဒှ်တ္ၚဲ ဟိုတ်နူကၞာတ်သမ္တီ လလောၚ်ပ္တိတ်ဒၟံၚ် ၚုဟ်စၞောန်တံဂှ်ရ ဒးဂဗဒၟံၚ်ကဵု ကျဟောံဗြံတံရဂှ် တၠကမၠောန်ပရေၚ်သွံရာန်ကၠေၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ကၠေၚ်စက်တံဂှ် ကၠာတေံ တန်တဴကဵု လ္တူခရိတ်အိုတ် ကေုာံ ဒဒှ်မပၠောပ်နၚ်တံဂှ်တုဲ နူကဵုဆေၚ်ကၠေၚ်စက်တံ ပ္တန်ၚုဟ် သွံတြးကၠုၚ်ကေတ်တ်ဂှ် စနူဂိတုမေ သတ္တာဟဒုတိယ တုဲကၠုၚ်တေံတုဲ အတိုၚ်ၚုဟ် ကံၚ်ဇြဳပၞာန် မကၞာတ်သမ္တီလလောၚ်ပ္တိတ် လၟေၚ်တ္ၚဲဂှ် ဒးသွံတြးဒၟံၚ်ရ။
ဟိုတ်ဂှ်ရ ကၠာကၠေၚ်စက် မဗ္ကန်လဝ် ဟွံဂွံစိုပ်ဏီဂှ် ၚုဟ်ကလေၚ်စှ်ေအာဂှ်ရ ဒးဆေၚ်ဒၟံၚ်မုက်ကဵု ကျဟောံဗြံတံရဂှ် တၠကမၠောန်ပရေၚ်သွံရာန်ကၠေၚ်စက်မွဲတၠ ဟီုရ။
“တ္ၚဲဖျေံကဵု အရၚ်ပါ်ပရအ် ကုပိုယ်တံဂှ် ၚုဟ်သၠုၚ်ဒၟံၚ်ယျ၊ အခိၚ်ကပေါတ်စိုပ်ကၠုၚ်ဂှ် ၚုဟ်စကာကဵုသွံဂှ် မွဲလဳတာ ၅၀ ၊ ၁၀၀ တၞဟ်ခြာဒၟံၚ် ၜိုတ်ဏံ၊ ကြပ်စှ်ေတှ်ေ ပဵုတုဲဂွံတီကေတ်ရ၊ သာတုဲကျဟောံဗြံကၠုၚ်ရ၊ ပိုယ်တံဂှ် လၟုဟ် အတိုၚ်အစဳဇန် ဍေံတံ မဖျေံလဝ်ဂှ်ရ ဒးအာ၊ ဟွံအာ အတိုၚ်အစဳဇန်ဍေံတံတှ်ေ ဒးတပ်ဒဏ်ဏောၚ်၊ ၝောံပိုဒ်တံဂှ် ဗွဲမဂၠိုၚ်ဂၠေၚ်၊ ဥပဒေကၠေၚ်ဍေန်ဂှ် ပ္တိတ်လဝ်ရ၊ လၟုဟ်ဂှ် ဒုၚ်ကျဟောံဗြံတုဲ ဒးအာဒၟံၚ် အတိုၚ်အစဳဇန်ဍေံတံရ” သာ်ဝွံ ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ အခါလၟုဟ် ၚုဟ်နှေန်ကၠေၚ်စက် မဒးသွံ ဇၟာပ်တွဵုရး ကေုာံ ရးဒေသတံဂှ် အရိုဟ်တ္ၚဲ လလောၚ်ပ္တိတ်တုဲ ကဵုသွံတြးဒၟံၚ်ဂှ်ကီု အတိုၚ်ၚုဟ် မပ္တန်လဝ်ဂှ် ယဝ်ရဟွံသွံမ္ဂး ပွမကေတ်အရေဝ် ဗွဲမညဳကဵု သၞောဝ်ဥပဒေတံဂှ် ကၠောန်သ္ပအာရောၚ် သာ်ဝွံ စၞောန်ပ္ညုၚ်လဝ်ရ။
အခိၚ်လၟုဟ်ဂှ် ကုဆေၚ်သွံကၠေၚ်စက် (၈၂) ဆေၚ် နူကဵုရးဒေသ ကေုာံ တွဵုရးလ္ၚဵုတံ မသွံဒၟံၚ် ဂၠိုၚ်နူကဵု ၚုဟ်မပ္တန်လဝ်တံဂှ် တပ်ဒဏ်သြန် ပွမကေတ်အရေဝ်တံ ကၠောန်ၜိုတ်လဝ်ရောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဂှ် ကၠေၚ်စက်ပိုတ်အိုတ် ညံၚ်ဂွိုအ်မွဲဂှ် ပ္ဍဲကုမ္ပဏဳတံကဵု ဆေၚ်ကၠေၚ်စက်တံဂှ် ယဝ်ရကၠေၚ်ပိုတ်အိုတ် က္တဵုဒှ်ကၠုၚ်မ္ဂး ဗွဲမဂတာပ်အခိၚ် သွက်ဂွံပ္တိုန်ထ္ၜးကဵုဂှ် စၞောန်ပ္ညုၚ်လဝ်ရ။
ၚုဟ်ကၠေၚ်စက်တံဝွံ မ္ၚးနူဒုၚ်လဝ်သ္ဇိုၚ်ကဵု လ္တူဗွဝ်ဖျာကၠေၚ်ဍေန်ဂၠးတိဂှ် ပ္ဍဲကဵုအပ္ဍဲကၟိန်ဍုၚ်ဝွံလေဝ် ဟိုတ်နူအရာမကၞာတ်သမ္တီ ပရေၚ်ရာန်ဒဝ်ဠာတံ နွံဒၟံၚ်ဂှ်ရ ဗွဝ်ဖျာ ဟွံညိၚ်ဝတ်တံ က္တဵုဒှ်ဒၟံၚ်တုဲ တၠကမၠောန်ပရေၚ်သွံရာန် ကၠေၚ်စက်တံ ကျဟောံဗြံဒၟံၚ်ရဂှ် ညးမစိုတ်သ္ကီု ဗွဝ်ဖျာကၠေၚ်စက်တံ သ္ဂးအိုတ်ရ။
ကၟိန်ဍုၚ်ဗၟာဝွံ တၚ်နွံပၟိက်ကၠေၚ်စက် ဗၞတ်စှ်တၟံကၠံဟေၚ် ကၠောန်ပ္တိတ်နူအပ္ဍဲဍုၚ်မာန်တုဲ သှ်ေ ၜိုတ် (၉၀) တၟံကၠံဂှ် ပၠောပ်နူကဵုဍုၚ်သ္အာၚ်တုဲ ဒးစကာရပ်စပ်ဒၟံၚ်ရ။
ပရိုၚ်−သြၚ်လောန်တိုၚ်(မ်)