ကျံက်ကျဳ၊ ဂျူလာၚ် (၁၅)
ပ္ဍဲပွိုၚ်ဍုၚ်ကျံက်ကျဳ တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် ဗွဲကြဴရပ်ဒက် ကၠေၚ်ဒက်လဝ် ညးသၟတ်ကရေၚ် (၂၃) တၠတုဲ လ္တူဂၠံၚ်ဇၞော်ဂှ် အလုံမွဲတ္ၚဲ ၜုၚ်တက်ပ္ဍဵုပ္ဍိုက်ပျဲပျာံလဝ်ဂှ် KNU လလောၚ်ပ္တိတ်လဝ်ရ။
ပ္ဍဲကဵုကွာန် အလာသု(အလယ်စု) ကေုာံ ကွာန်ဝါပေန်သု(ဝါးပၚ်စု) မၞုံပ္ဍဲဂကောံကွာန် ဒံၚ်မအ် (ဒေါင်းမို့) ပွိုၚ်ဍုၚ်ကျံက်ကျဳ မဒှ်တိဍာ် ဒပ်မဟာ (၃) ခရိုၚ် (ညောၚ်လေးပၚ်) KNU ဂှ် တုဲကၠုၚ် ဂိတုဂျူလာၚ် (၁၃) တေံဂှ် ဒပ်ပံၚ်ကောံ ကဵု ခမရ (၅၉၉) ကံၚ်ဇြဳပၞာန် လုပ်စိုပ်ကၠုၚ်တုဲ ရပ်ဒက်လဝ် ညးဍုၚ်ကွာန်မသ္ပဒတဴဒၟံၚ်ပ္ဍဲကွာန်တံဂှ်ရ။
ပ္ဍဲကဵုညးဍုၚ်ကွာန်မသ္ပဒတဴဒၟံၚ်ပ္ဍဲကွာန် မရပ်ဒက်လဝ်တံဂှ် ကုဂကူဗၟာတံဂှ် ဒဒှ်ရကၠေၚ်ဒက် ၜုၚ်တက်ပ္ဍဵုပ္ဍိုက်ပျဲပျာံ မွဲမွဲသာ် ကၠောန်သ္ပလဝ် ဟွံမွဲကီုလေဝ် ဂကူကရေၚ်တံဂှ်ဟေၚ် ကၠေၚ်ဒက်လဝ်တုဲ လ္တူဂၠံၚ်ဇၞော်ဂှ် အလုံမွဲတ္ၚဲ ၜုၚ်တက်ပ္ဍဵုပ္ဍိုက်ပျဲပျာံလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။
ကံၚ်ဇြဳပၞာန်ဂှ် ကုညးသၟတ်ကရေၚ် မကၠေၚ်ဒက်လဝ်တုဲ ၜုၚ်တက်ပျဲပျာံလဝ်တံဂှ် ဒဵုကဵုအခိၚ်လၟုဟ် ဟွံကလေၚ်ဗလးကဵုဏီတုဲ ကောန်သ္ၚိကၟိန်တံ က္တဵုဒှ်ဒၟံၚ် ဓဝိၚ်ဂွိၚ်ဂွါဲစံၚ်တူရောၚ်ဂှ် ကောန်ဂကောံကေၚ်ကာပရေၚ်မၞိဟ် လ္ပာ်အရာပ်ဒေသကရေၚ် ခရိုၚ် (ညောၚ်လေးပၚ်) မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ညးဗြဴတံဂှ် ဍေံတံ ဟွံကော်ပုဟ်၊ ကုမၞိဟ်တြုံတံဂှ် ကၠေၚ်ဒက်တုဲ ၜုၚ်တက်ဒၟံၚ်ရ၊ နွံဒၟံၚ် ပ္ဍဲကဵုကွာန် မဖျေံလဝ်ဗ္ဒိုပ်ဂှ်ရ ဟီု၊ ဟွံဗ္စကဵု ပုၚ်ဂှ် (၂) တ္ၚဲယျ၊ ဗၟာတံဂှ် ကလေၚ်ဗလးကဵုတုဲ ဂကူကရေၚ် အယဲအဒေါဝ်တံဂှ် ရပ်လဝ်ဖိုဟ်” သာ်ဝွံ သ္ဂးရ။
ဒပ်ကံၚ်ဇြဳပၞာန်ဝွံ မ္ၚးနူရပ်ဒက် ညးဍုၚ်ကွာန် ဒၟံၚ်ပ္ဍဲကွာန်တံတုဲဂှ် သီုကဵု လုပ်စိုပ်ဗ္တးဗ္တန်လဝ် သ္ၚိဒၟံၚ်ညးဍုၚ်ကွာန်တံတုဲ ကပေါတ်ကညောတ်မၞုံကဵု ၚုဟ်မးတံဂှ် ကေတ်ဏာလဝ် ဗွဲအတေၚ်အဓမ္မရဂှ် KNU လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန်ဝွံ လ္တူညးဍုၚ်ကွာန်ကောန်အရာပ်တံဂှ် ရပ်ဒက်တုဲ မ္ၚးနူကေတ်စဵုဒၞါ စကာနဒဒှ်ဇွောံစဵုဒၞါပၞာန်ဂှ် ပပ္တံနူဂိတုဂျူလာၚ် (၁၄) ပယျာံဂယးဂှ်တုဲ ပ္ဍဲကဵုပွိုၚ်ဍုၚ်ကျံက်ကျဳဂှ် သီုကဵုကၠောန်ၜိုတ်ပန်ပှော်လဝ် လွဟ်လက်နက်ဇၞော် ဆဆဵုတံရဂှ် ညးဒေသတံ ဟီုရ။
ပ္ဍဲကဵုပွိုၚ်ဍုၚ်ကျံက်ကျဳ ကေုာံ ပွိုၚ်ဍုၚ်မုၚ် တိဍာ်ဒပ်မဟာ (၃) ခရိုၚ်(ညောၚ်လေးပၚ်) KNU ဂှ် ဟိုတ်နူဒပ်ကံၚ်ဇြဳပၞာန် လုပ်စိုပ်ၜက်ၜေတ်တိဍာ်တုဲ ကၠောန်ၜိုတ်ဒၟံၚ် ပရေၚ်ပၞာန်ဂှ်ရ ပေါဲဗ္တိုက်ဇီုမုက် ကဵုဒပ်မဟာ (၃) ဒပ်ပၞာန်ဗၠးၜးကောန်ဂကူကရေၚ် နူဒေသဂှ် ဆက်တုဲ က္တဵုဒှ်လဝ်ရ။
ဒပ်ကံၚ်ဇြဳပၞာန်ဝွံ အပ္ဍဲပေါဲဗ္တိုက်ဂှ် လ္တူကွာန်၊ သ္ၚိဒၟံၚ် ညးဍုၚ်ကွာန်ကောန်အရာပ်တံဂှ် နကဵုလွဟ်လက်နက်ဇၞော်တံဂှ် တၚ်ရန်တၟံနွံနွံ စွံပွန်ဗ္တိုက်ဂှ်ကီု၊ ပွမဗ္တိုက်ဂြာတ်မခတိုဟ် ကဵုက္ၜၚ်ကျာတံကီုဂှ် ကၠောန်သ္ပဒၟံၚ်တုဲ တၟံတၟံဌာန်ဒေသတိဍာ် အလုံကၟိန်ဍုၚ်ဂှ် နကဵုပွမဓဇန်ကြမ်ကြ၊ ပွမဂစိုတ်ဂယိုၚ်၊ ပွမပ္ဍဵုပ္ဍိုက်ပျဲပျာံတံဂှ် ဖျေံစၟတ်ပဝ်လဇြဳ ပကီုပရာပ်ကဆံၚ်ကၟိန်ဍုၚ်တုဲ ကၠောန်ၜိုတ်ဒၟံၚ်ရောၚ်ဂှ် KNU သ္ဂးလဝ်ရ။
ပရိုၚ်−သြၚ်လောန်တိုၚ်(မ်)