ဍာ်ဗု၊ ဂျူလာၚ် (၁၅)
ဟိုတ်ဒၟါနူ ရုၚ်ဒပ်ပရေၚ်ဂီုကၠီု စပ်ကဵုပၞာန် (စရဖရုံး) မၞုံဂၠံၚ် နဝဒေ သြၚ်ဗၟံက်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳ ဒးဒုၚ်ဗ္တိုက် ဗ္တိုဟ်မခတိုဟ်ဂှ်ရ အလုံစမြိုၚ်မွဲ သရိုဟ်စှ်ေလီုလာ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရုၚ်ဒပ်ပရေၚ်ဂီုကၠီု စပ်ကဵုပၞာန်ဂှ် တုဲကၠုၚ် ဂိတုဂျူလာၚ် (၁၃) ဗ္တံ ၜိုတ် (၁၀) နာဍဳဂှ် ဂကောံဟွံတီယၟုမွဲက္ဍိုပ် ပါမ်ဗုမ် ဖံက်ဗ္တိုဟ်လဝ်တုဲ ဟိုတ်နူဒးဒုၚ်ဖံက်ဗ္တိုဟ်ဗုမ်ဂှ်ရ အလုံစမြိုၚ်မွဲ သရိုဟ်စှ်ေလီုလာ်အာလဝ်ရ။
အတိုၚ်ဂလာန် ညးဒေသတံဂှ်မ္ဂး ဗွဲကြဴဒးဒုၚ်ဗ္တိုက် ဗ္တိုဟ်ဗုမ်တုဲဂှ် ရမျာၚ်သေနာတ်တံ တိတ်ကၠုၚ် အဆက်က်ကီုလေဝ် မၞိဟ်ဂွံဘဲဇီုကပိုက် ဟွံမွဲပုဟ်ဂှ် ဟီုရ၊ ပ္ဍဲရုၚ် (စရဖ) ကံၚ်ဇြဳပၞာန်ဂှ် အခိၚ်လဒေါဝ်တ္ၚဲ မၞိဟ်နွံဂှ် ဂွံဆဵုကေတ်ကီုလေဝ် အခိၚ်ဗ္တံတံဂှ်တှ်ေ မၞိဟ်မံၚ်စံၚ် ဟွံဆဵုကေတ်ရဂှ် သ္ဂးရ။
ရုၚ် (စရဖ) ဒးဒုၚ်ဖံက်ဗ္တိုဟ်တုဲ ကွဳစက်ကံၚ်ဇြဳပၞာန် မကၠုၚ်ကဵုအရီုဗၚ်ပၞာန် (၃) ဖ္ဍိုက် နူကဵုသြၚ်ပလိုတ် ဍာ်ဗုဂှ် ဒၟါနူဒးဒုၚ်ဗ္တိုက် ဗ္တိုဟ်မာၚ် ပ္ဍဲဗ္ဒါဲဒဒန် ဍာ်ဗုဂှ်ရ ကွဳစက် (၂) ဖ္ဍိုက် ဇီုကပိုက်လီုလာ်လဝ်တုဲ အကာဲအရာ မၞိဟ်ဇီုကပိုက်ဂှ် ဟွံဂွံတီကေတ်ဏီရောၚ်ဂှ် ကောန်ဂကောံ ဒပ်စဵုဒၞါညးဍုၚ်ကွာန်ဒေသမွဲတၠ ဟီုရ။
ပရေၚ်ဗ္တိုဟ်ဗုမ် ရုၚ် (စရဖ) ပွိုၚ်ဍုၚ်ဍာ်ဗုဂှ် ဂကောံလဵုကၠောန်ၜိုတ်လဝ်ရော ဟီုဂှ် လလောၚ်ပ္တိတ်လဝ် ဟွံမွဲဏီရ။
ပ္ဍဲပွိုၚ်ဍုၚ်ဍာ်ဗုဂှ် ဗွဲကြဴဒပ်ပၞာန်သီအဝဵုတုဲ ရုၚ်မဆေၚ်စပ်ကဵု ဌာနကံၚ်ဇြဳပၞာန် လ္ၚဵုတံ ဒးဒုၚ်ဗ္တိုဟ်လဝ်ဗုမ်ကီုလေဝ် ပ္ဍဲကဵုပရေၚ်ဖံက်ဗ္တိုဟ်ဏံဂှ်ဝွံ အလုံစမြိုၚ်မွဲ သရိုဟ်စှ်ေလီုလာ်အာလဝ်ရ။
ပရိုၚ်−သြၚ်လောန်တိုၚ်(မ်)