လ္ဂုၚ်၊ ဂျူလာၚ် (၁၅)
အလုံမွဲကၟိန်ဍုၚ် အပ္ဍဲကာလ ဒပ်ပၞာန်သီအဝဵု နူကဵုဂိတုဖေဖဝ်ဝါရဳ သၞာံတုဲကၠုၚ်တေံ စဵုကဵု ဂိတုမေ (၁၆) သၞာံဏံဂှ် ဟိုတ်နူမာၚ်တိုပ်တိ ကဵု ကပေါတ်ပၞာန်မသၟေဟ်တံ ဗ္တိုဟ်ထ္ကးတုဲ ကောန်အရာပ် (၁၀၀) ပြၚ် ချိုတ်အာလဝ်ဂှ် ဂကောံသြန်ဂအုံကောန်ၚာ်အလုံဂၠးတိ ကုလသမဂ္ဂ (UNICEF) လလောၚ်ပ္တိတ်လဝ်ရ။
အတိုၚ်တၚ်နၚ်မလ္ၚတ်လဝ် နူကဵုယူနဳသေပ်ကၟိန်ဍုၚ်ဗၟာ လ္တူမာၚ်တိုပ်တိ ကေုာံ ကပေါတ်မလေပ်ဗ္တိုဟ်တံဂှ်မ္ဂး အပ္ဍဲပွိုၚ် (၁၆) ဂိတုဂှ် လၟေၚ်ဒဒှ်ဗ္တိုဟ်ထ္ကး အပံၚ် (၂၄၄) ဝါ က္တဵုဒှ်လဝ်တုဲ ညးဍုၚ်ကွာန်ကောန်အရာပ် (၁၁၉) ချိုတ်အာလဝ်တုဲ မၞိဟ်ဂွံဘဲဝပ် (၃၀၉) တၠ မၞုံလဝ်ဂှ် ထ္မံက်ထ္ၜးလဝ်ရ။
နကဵုဒေသမ္ဂး ပ္ဍဲတွဵုရးသေံ က္တဵုဒှ်ဂၠိုၚ်အိုတ်တုဲ ပ္ဍဲကဵုတွဵုရးကချေၚ်၊ တွဵုရးရခေၚ် ကေုာံ ရးသက်ကိုၚ်တံဂှ်လေဝ် လၟေၚ်ဒဒှ်ဗ္တိုဟ်ထ္ကးတံ က္တဵုဒှ်လဝ်ရ။
အတိုၚ်လိက်ဒုၚ်စဳရေၚ် ယူနဳသေပ်ကၟိန်ဍုၚ်ဗၟာဂှ်မ္ဂး နူကဵုပၞာန်သီလဝ်အဝဵု သၞာံတုဲကၠုၚ်တေံ ဂိတုဖေဖဝ်ဝါရဳ စဵုကဵု ဂိတုဒဳဇြေမ်ဗာဂှ် ဟိုတ်နူမာၚ်တိုပ်တိ ကေုာံ ကပေါတ်မလေပ်ဗ္တိုဟ်တံတုဲ ညးဍုၚ်ကွာန်ကောန်အရာပ် (၈၆) တၠ ချိုတ်အာလဝ်တုဲ မၞိဟ်ဂွံဘဲ (၁၈၀) တၠ မၞုံလဝ်ဣရ။
တုဲပၠန် သၞာံဏံ နူကဵုဂိတုဖေဖဝ်ဝါရဳ စဵုကဵု ဂိတုမေ အပ္ဍဲပွိုၚ် မသုန်ဂိတုဂှ် ဒၟါနူပွဗ္တိုဟ်ထ္ကးတံတုဲ ကောန်အရာပ် (၃၃) တၠ ချိုတ်တုဲ မၞိဟ်ဂွံဝပ် (၁၂၉) တၠ နွံလဝ်ရောၚ်ဂှ် သ္ဂးလဝ်ရ။
ယူနဳသေပ်ကၟိန်ဍုၚ်ဗၟာဂှ်ဝွံ ဗွဲကြဴဒပ်ပၞာန်သီအဝဵုတုဲ ဟိုတ်နူမာၚ်တိုပ်တိ ကေုာံ ကပေါတ်ပၞာန်မသၟေဟ်တံ ဗ္တိုဟ်ထ္ကးဂှ်ရ ပရေၚ်ချိုတ်ဂျိုၚ် ညးဍုၚ်ကွာန်ကောန်အရာပ်တံ သၠုၚ်တိုန်ကၠုၚ် တီတီရဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)