ကအ်ကြိက်၊ ဒဳဇြေမ်ဗာ (၂၇)
ဟိုတ်နူပေါဲဗ္တိုက်ၜါလ္ပာ် မက္တဵုဒှ်ဒၟံၚ် မွဲဒမြိပ်ဂၠံၚ်ဇၞော်အာယှ ကေုာံ ပွိုၚ်ဍုၚ်ကအ်ကြိက်၊ တွဵုရးကရေၚ်ဂှ်တုဲ ပရေၚ်ကူသာန်သွံရာန် သေံ−ဗၟာ ၜါဍုၚ် ဒှ်ကၠုၚ် ကြပ်ဒးဒေါအ်ဒေၚ်ဂှ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုဒဳဇြေမ်ဗာ (၁၆) တုဲကၠုၚ်တေံတုဲ ပ္ဍဲမွဲဒမြိပ်ဂၠံၚ်ဇၞော်အာယှကဵု ပွိုၚ်ဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရ။
အပ္ဍဲပေါဲဗ္တိုက်ဂှ် ထောံကၠုၚ်မခတိုဟ် နကဵုက္ၜၚ်ကျာ နကဵုပၠံၚ်ပရှ်ကျာတံသၟးဟွံက သီုကဵုပန်ပှော်ဗ္တိုက်ဒၟံၚ် လွဟ်ဇၞော် ဟွံပိုတ်သ္ကုတ် သီုကဵုဖံက်ဗ္တိုဟ်မာၚ်တံဂှ်ရ ဒဒန် (၂) တၞုၚ် ဇီုကပိုက်လီုလာ်အာလဝ်တုဲ သ္ကုတ်ဂၠံၚ်လ္ၚဵုတံလေဝ် ဇီုကပိုက်လီုလာ်လဝ်ရ။
အခိၚ်လၟုဟ်ဂှ် ဒၟါနူပေါဲဗ္တိုက်တံတုဲ မွဲဒမြိပ်ဂၠံၚ်ဇၞော်အာယှတံဂှ် ကွဳစက်ဖ္ဍိုက်ဗၞိက်တံ တတ်ကၠောံအာကၠုၚ်ဟွံဂွံဂှ်ရ ကပေါတ်ဗၞိက်ဂေတ်ဂြိပ်တံလေဝ် ကြပ်ဒးဒေါအ်ဒေၚ်အာယျဂှ် သၟာဗၞိက်ပယျဵုမွဲတၠ သ္ဂးရ။
“ဍေံတံဂှ် ၜက်တိုန် ဟွံဂွံပုဟ်လေဝ်။ ကွဳစက်ဖ္ဍိုက်ဗၞိက်သီုဖအိုတ် ရေၚ်တုဲ ကၟာတ်ဆိုအ်မံၚ် မွဲဒမြိပ်ဂှ်ဟဂှ်ရ။ ဟွံတီတုဲ တိုန်ကၠုၚ်မ္ဂးလေဝ် ဗီုကၠာတေံ ဟွံသေၚ်တုဲ ၜိုတ်မွဲသတ္တာဟဂှ် သီုညးဖအိုတ် ဒးအေၚ်ဒုၚ်ကဵုရ။ ဒှ်ဒၟံၚ်လ္ပာ်တေံလ္ပာ်ဏံ ဟီုတှ်ေလေဝ်။ ဗီုဏံမှ ဟွံသေၚ်တှ်ေ ဗၞိက်တံ သာဆောံလေၚ်အိုတ်ဏောၚ်။ ပရေၚ်ကူသာန်သွံရာန်ဗၞိက်ပယျဵုဂှ် ဒှ်သဘဴဒေါအ်ဒေၚ်အာရ” သာ်ဝွံ သ္ဂးရ။
သ္အာၚ်နူဂှ်ပၠန် ဒၟါနူပေါဲဗ္တိုက်ၜါလ္ပာ်တံတုဲ ကွဳစက်ဗၞိက်အပြောံ မကၟာတ်ဒၟံၚ် ပ္ဍဲကဵုမွဲဒမြိပ်ဂၠံၚ်ဇၞော်အာယှတံဂှ်လေဝ် ဆက်အာဂတဟွံမာန်ရတုဲ ဒးလီုလာ်ဆောံလေၚ်တံ က္တဵုဒှ်ဒၟံၚ်တုဲ ကွဳစက်ဗၞိက်အပြောံလ္ၚဵုတံဂှ်ဝွံ ၜိုတ်ၚုဟ်ဂွံဂှ် ဒးသွံဒၟံၚ် ပ္ဍဲကဵုဍုၚ်ကအ်ကြိက်၊ ကြုၚ်ဒဵုတံရ။
အကာဲအရာပြဟ်ဟ်ဏံဂှ် ပ္ဍဲလ္တူဂၠံၚ်အာယှဗြဝတဳ−ကအ်ကြိက်ဂှ် ကွဳစက်ဖ္ဍိုက်ဗၞိက် ဂၠိုၚ်ကဵုကၠံဖ္ဍိုက် ဆိုအ်ဗဒၟံၚ်တုဲ ကွဳစက်ဍောတ်တ် ကေုာံ ကွဳလိုန်ဓာတ်လ္ၚဵုတံဂှ် အာကၠုၚ်ဒၟံၚ် နူကဵုလ္ပာ်ဂၠံၚ် (ထို့ကော်ကိုး) နွံဒၟံၚ်ဂှ် ဂွံတီကေတ်ရ။
ပေါဲဗ္တိုက် တ္ၚဲဂၠိၚ်သ္ၚောဲလအ်ကၠုၚ်မ္ဂး ကပေါတ်ဗၞိက်ဂေတ်ဂြိပ် ကြပ်ဒေါအ်ဒေၚ်အာလးလးမာန်တုဲ ၚုဟ်ကပေါတ်ဗၞိက်တံဂှ်လေဝ် ဆက်သၠုၚ်တိုန်ကၠုၚ်မာန်ရောၚ်ဂှ် သၟာဗၞိက်ပယျဵုတံ သ္ဂးအိုတ်ရ။
ဍုၚ်သေံဝွံ နူကဵုဒေသပရေၚ်သၠာဲဂတးဗၞိက် ဗြဝတဳဂှ် ပၠောပ်ပ္တိုန်ဒၟံၚ် ပ္ဍဲဍုၚ်ဗၟာ မပ္တံကဵု ကပေါတ်အရပ်စပ် ကမၠောန်သိုၚ်ခၞံ သီုကဵုပါလုပ် ဗၞိက်စၞစသုၚ်၊ ဂၠိက်ယာတ်၊ ဗၞိက်ပယျေဝ်၊ စက်ယန္တယာတံ အဓိကတုဲ နူကဵုဍုၚ်ဗၟာဂှ်လေဝ် ပလံၚ်ပ္တိုန်ဒၟံၚ် အပ္ဍဲဍုၚ်သေံတေံ သတ်ဂန်၊ ကၞောန်သ္ၚု ကေုာံ ဗၞိက်တိတ်နူဍာ်တံ အဓိကရ။
ပရိုၚ်−သြၚ်လောန်တိုၚ်(မ်)