မတ်မလီု၊ ဂျူလာၚ် (၁၆)
သတ်ကၠေၚ်တိတ်ဂမၠိုၚ် သွက်အခေါၚ်ပလံၚ်ပ္တိုန်ဍုၚ်သ္အာၚ်တံဂှ် ယဝ်ရအာတ်ပ္တိုန်လာၚ်ဇြေန် ဗၞိက်ပလံၚ်ပ္တိုန်မ္ဂး လိက်ထံက်ဂလာန် နူကဵုဂကောံသၟာဗၞိက် ၜဲ၊ သတ်ဂန် ကေုာံ လ္ၚဴ ကၟိန်ဍုၚ်ဗၟာ ဂွံမှဟေၚ် သွက်ဂွံပ္တိတ်ကဵု လာၚ်ဇြေန်ဂှ် ဌာနဝန်ဇၞော်ပရေၚ်ပိုန်ဒြပ် ကေုာံ ပရေၚ်ကူသာန်သွံရာန် ကံၚ်ဇြဳပၞာန် စၞောန်ပ္ညုၚ်လဝ်ရ။
ကံၚ်ဇြဳပၞာန်ဂှ် ကုသတ်ကၠေၚ်တိတ်ဂမၠိုၚ် မပ္တံ ၜဲနာနာ၊ သတ်ဂန်၊ လ္ၚဴနာနာ ကေုာံ ၜဲတိတံဂှ် သွက်ဂွံဂွံအခေါၚ်ပလံၚ်ပ္တိုန်ဍုၚ်သ္အာၚ်ဂှ် ဂွံလိက်ထံက်ဂလာန် နူကဵုဂကောံသၟာဗၞိက် ၜဲ၊ သတ်ဂန် ကေုာံ လ္ၚဴ ကၟိန်ဍုၚ်ဗၟာမှ သွက်ဂွံပ္တိတ်ကဵု လာၚ်ဇြေန်အခေါၚ်ပလံၚ်ပ္တိုန်ဗၞိက်တံဂှ် လလောၚ်ပ္တိတ်လဝ် ပ္ဍဲဂိတုဂျူလာၚ် (၁၃) တေံရ။
သ္အာၚ်နူဂှ်ပၠန် ပ္ဍဲအရာပလံၚ်ပ္တိုန် ကုသတ်ကၠေၚ်တိတ် ဍုၚ်သ္အာၚ်တံဂှ်လေဝ် ဂၠံၚ်ပယျဵုကဵုဒှ် ဂၠံၚ်ဍာ်ကဵုဒှ် ပပ္တံနူဂိတုဂျူလာၚ် (၁) တုဲ နဲကဲသၠာဲဂတးဗၞိက် မစကာဒဝ်ဠာအမေရိကာန်သၟးဂှ်ဟေၚ် ပ္တိတ်ကဵုဒၟံၚ် လာၚ်ဇြေန်အခေါၚ်ပလံၚ်ပ္တိုန်ဗၞိက်တံရဂှ် သ္ဂးလဝ်ရ။
သၟာဗၞိက်ၜဲလ္ၚဴမွဲတၠဂှ် မွဲကရောံကဵု လိက်ထံက်ဂလာန်ဂကောံဂှ် သီုကဵုတၚ်နၚ်မကၞာတ်သမ္တီလဝ်တံဂှ် ၜိုန်ရဒးအာတ်ပ္တိုန် ဇရေၚ်ဌာနက္ဍိုက်ပ် ပရေၚ်သၠာဲဂတးဗၞိက်ကီုလေဝ် ယဝ်ရရေၚ်တၠုၚ်ကဵု ဗွဲမဂတာပ်အခိၚ်ဟွံမာန်မ္ဂး ဒဒှ်မလဇုဲလဇတံ နွံမာန်ရောၚ်ဂှ် ဟီုရ။
တုဲပၠန် နကဵုဌာနက္ဍိုက်ပ်ပရေၚ်သၠာဲဂတးဗၞိက်တံဂှ်လေဝ် လာၚ်ဇြေန်ဗၞိက်ပလံၚ်ပ္တိုန် မအာတ်မိက်ပ္တိုန်ထ္ၜးကၠုၚ်တံဂှ် အပ္ဍဲအခိၚ်ကာလမကၞာတ်သမ္တီလဝ်ဂှ် ယဝ်ရကၠောန်ၜိုတ်ကဵု ဟွံမာန်မ္ဂး သီုကဵုပရေၚ်ဇီုကပိုက်ဗွဝ်ဖျာတံ ထပ်နွံကၠုၚ်မာန်ရောၚ်ဂှ် ညးသ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပပ္တံနူဂိတုဂျူလာၚ် (၁၄) တုဲ သတ်ကၠေၚ်တိတ်ဂမၠိုၚ်၊ ၜဲနာနာ၊ လ္ၚဴ၊ ၜဲတိတံဂှ် ယဝ်ရပလံၚ် နူကဵုပယျဵုမ္ဂး သက်သဳသာဓက သၞောတ်ဒစးဒုၚ်သၠဲသၠုဲ ( TT) ကဵု လာၚ်ဇြေန်ဗၞိက်ပလံၚ်ပ္တိုန်တံဂှ် တောဲတုဲ အာတ်မိက်လဝ်မှဟေၚ် ကဵုအခေါၚ်ပလံၚ်ပ္တိုန်ရောၚ်ဂှ် စၞောန်ထ္ၜးလဝ်ရ။
ကၠာတေံဂှ် ကပေါတ်ဗၞိက် ပလံၚ်ပ္တိုန်ဍုၚ်သ္အာၚ် နူကဵုဒေသအပိုၚ်အခြာ ပရေၚ်သၠာဲဂတးဗၞိက် ပယျဵုတံဂှ် ၜိုန်ရကဵုလဝ်အခေါၚ် ကဵုကေတ် သြန်ဒ္ကေဝ် ကဵု ၝာတ်၊ သြန်ဒ္ကေဝ်ကဵု ယွန် ကီုလေဝ် ပပ္တံနူ ဂိတုဂျူလာၚ် (၁) တုဲ ပ္တန်ၚုဟ်မး နကဵုဒဝ်ဠာတုဲ ကဵုသွံကၠုၚ်ရ။
ပလံၚ်ပ္တိုန်ဍုၚ်သ္အာၚ်တုဲဒှ်မ္ဂးလေဝ် ထ္ၜးသြန် မအပ်ပြာပ်လဝ် ပ္ဍဲတိုက်သြန် သြန်သ္ဂောံဂွံနူကဵုဗၞိက်ပလံၚ်ပ္တိုန်မာန်မှဟေၚ် သွက်ဂွံကဵုအခေါၚ် ပလံၚ်ပ္တိုန် မွဲဝါပၠန်ဂှ် စၞောန်ပ္ညုၚ်လဝ်ဂှ်ရ သွက်ဂွံပလံၚ်ပ္တိုန် ကပေါတ်ဗၞိက် ဗွဲမဂတာပ်အခိၚ်ဂှ် ဒဒှ်မလဇုဲလဇတံ က္တဵုဒှ်ကၠုၚ်တုဲ ပွမပလံၚ်ပ္တိုန် ကပေါတ်ဗၞိက်ပယျဵုတံ သဝ်စှ်ေကၠုၚ်မာန်ဂှ် သၟာဗၞိက်တံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)