ပျုၚ်ယာမ်-ဒဳဇြေမ်ဗာ(၂၈)
ပ္ဍဲဂိတုဒဳဇြေမ်ဗာ တုဲကၠုၚ် စၟတ်တ္ၚဲ(၂၆)ဂှ် ဟိုတ်နူဒရုမ်ကိုဝ်ရဳယျာသၟဝ်ကျာ ပဝ်လုပ်စိုပ်ကၠုၚ် ပ္ဍဲကၟိန်ဍုၚ်ကိုဝ်ရဳယျာသၠုၚ်ကျာဂှ်ရ သုၚ်စောဲက္ၜၚ်ကျာဂျေတ်၊ က္ၜၚ်ကျာပၞာန်တုဲ ကၠောန်သ္ပလဝ် ပရေၚ်ပန်ဖျေံရဂှ် ဒပ်ပၞာန်ကိုဝ်ရဳယျာသၠုၚ်ကျာ ဟီုသ္ဂးလဝ်ရ။
ပ္ဍဲကဵုဒရုမ်ကိုဝ်ရဳယျာသၟဝ်ကျာ (၅) ဖ္ဍိုက် ဒရုမ်မွဲဖ္ဍိုက်ဂှ် ပဝ်စိုပ်အာ စဵုကဵုဗ္ဒာဲဍုၚ်ဇၞော်ကိုဝ်ရဳယျာသၠုၚ်ကျာ သိုဝ်တုဲဂှ် (၄) ဖ္ဍိုက်သှ်ေမံၚ်ဂှ် ပဝ်အာ လ္ပာ်ရေၚ်ပြၚ်က္ၜဳပလိုတ်ရ။
နဒဒှ်ပရေၚ်ပလန်တဲကဵု ပရေၚ်ပရောဏံတုဲ သွက်ဂွံကေတ်သၞိၚ်ရုပ် ပရေၚ်ပြုပြေၚ်ပၞာန် ကိုဝ်ရဳယျာသၟဝ်ကျာဂှ် ကဝ်ရဳယျာသၠုၚ်ကျာ ကလေၚ်ဗလးဏာလဝ် က္ၜၚ်ကျာကၚ်ရဂှ် သၞာဲဒဴပရေၚ်ပၞာန် ဟီုသ္ဂးလဝ်ရ။
“အရာဏံဂှ် ဒှ်ပွ နူလ္ပာ်ကိုဝ်ရဳယျာသၟဝ်ကျာ လောန်ၜက်ပယျဵုဒၞက်ဗလးအာကာသပိုဲဂှ် ဂွံတီကေတ် သောၚ်ၚ်ကၠးကၠးရ” ဂှ် သ္ကိုပ်သၞာဲဒဴသ္ဇိုၚ်ဝန် ပရေၚ်ပၞာန်ပံၚ်တောဲ ကိုဝ်ရဳယျာသၠုၚ်ကျာ လဳသာန်အိုဝ် ဟီုသ္ဂးလဝ်ရ။
သ္အာၚ်နူဂှ်ပၠန် ဒပ်ပၞာန်ကိုဝ်ရဳယျာသၠုၚ်ကျာ သွက်ဂွံပန်ဖျေံဒရုမ်ဂှ်မာန် သုၚ်စောဲလဝ် ကပေါတ်ကိရိယာပၞာန်ရဂှ် ညးဟီုသ္ဂးလဝ်ဏီရ။
စပ်ကဵုပန်ဖျေံဒရုမ် မာန်ဟွံမာန်ဂှ်တုဲ ၜိုန်ရသၞာဲဒဴပၞာန် ဟီုသ္ဂးလဝ်ကီုလေဝ် အတိုၚ်အေဂျေန်ဇြဳ ပရိုၚ်ရိုဝ်ဟပ် ဓမံက်ထ္ၜးလဝ်ဂှ်မ္ဂး ဒပ်ပၞာန်ကိုဝ်ရဳယျာသၠုၚ်ကျာ ပန်လဝ် လၟိဟ်ၜိုတ် (၁၀၀) ဝါတုဲ ပန်ဖျေံဒရုမ်ဂှ် ဟွံမာန်ရောၚ်ဂှ် ဓမံက်ထ္ၜးလဝ်ရ။
ဒရုမ် ကိုဝ်ရဳယျာသၟဝ်ကျာ (၄)ဖ္ဍိုက်ဂှ် ကၠေံအာ ပ္ဍဲဍုၚ်ကိုဝ်ရဳယျာသၠုၚ်ကျာတုဲ သှ်ေဒၟံၚ် ဒရုမ်မွဲဖ္ဍိုက်ဂှ်မ္ဂး ကလေၚ်ပဝ်စဴအာ လပါ်ဍုၚ်ကိုဝ်ရဳယျာသၟဝ်ကျာတေံရဂှ် နိဿဲကဵု တၚ်သၞာဲဒဴပရေၚ်ပၞာန်ပံၚ်တောဲ ဟီုဂးလဝ်တုဲ ဌာန်ပရိုၚ်ရိုဝ်ဟပ် ဓမံက်ထ္ၜးလဝ်ရ။
အတိုၚ်လဟီု သ္ကိုပ်သ္ကသၞာဲဒဴ ပရေၚ်ပၞာန်ပံၚ်တောဲကိုဝ်ရဳယျာသၠုၚ်ကျာ လဳသာန်အိုဝ်ဂှ်မ္ဂး ပ္ဍဲအခိၚ်စၟဳစၟတ် ဆဵုဂဗဒရုမ်လုပ်စိုပ် ဗွဲကိုပ်ကၠာ ပန်ကဵုလဝ်သတိရဂှ် ဟီုသ္ဂးလဝ်ရ။
စပ်ကဵုဒရုမ်ထံက်ကၚ် လုပ်စိုပ်ပ္ဍဲကၟိန်ဍုၚ်ကိုဝ်ရဳယျာသၠုၚ်ကျာတုဲ ကိုဝ်ရဳယျာသၟဝ်ကျာ ဟီုသွဟ်လဝ်ကဵု တၚ်သၟာန်မဳဒဳယာဂမၠိုၚ် ဟၟဲကီု ပ္ဍဲမဳဒဳယာ ကၟိန်ဍုၚ်ညးတအ်ပိုၚ်ဂှ်လေဝ် ဓမံက်ထ္ၜးလဝ်ဟၟဲရဂှ် ဂွံတီကေတ်လဝ်ရ။
ဒရုမ်ကိုဝ်ရဳယျာသၟဝ်ကျာ ဒးဒုၚ်ထေၚ်ကေတ် ရေၚ်တၠုၚ်ဒၟံၚ် မေတ်ယှေန်ဒမၠုက် မွဲဖ္ဍိုက်ဂှ် ပြဟ်ဒတုံစှ်ေ ပ္ဍဲရေၚ်ဒဵုမွဲဒၞာဲတုဲဂှ် ကြဴနူပရေၚ်ပဝ်ဂ္ၚေၚ် သၞာံ၂၀၁၇ တုဲဂှ် အလန်ဏံ ဒှ်အလန်ကိုပ်ကၠာအိုတ်ရဂှ် ညးပိုၚ်အာဏာကိုဝ်ရဳယျာသၠုၚ်ကျာ သ္ပလဝ်ဒ္တန်ရ။
ယာဉ်တော်ချချိၚ်ခယျကေတ် ကိုဝ်ရဳယျာသၟဝ်ကျာ ဗလးပလံၚ်နၚ်တအ်ဂှ် ဒှ်ယာဉ်ကျာဟွံတုဲဒှ် သီုကမ္မရာရဂှ် တၚ်ပတှ်ေဒုၚ်ဂိုၚ်ကေတ်ဂမၠိုၚ် နွံဒၟံၚ်တုဲ ပ္ဍဲသၞာဲ၂၀၁၄ ဂှ်လေဝ် ဒရုမ်ဗီုပြၚ်ဂှ် ဂွံဂၠာဲဆဵုကေတ် ပ္ဍဲတ္ကအ်ပယျဵုဒၞက် မွဲဒၞာဲဏီရဂှ် ဂွံတီကေတ်လဝ်ရ။
Ref; CNA