ပလ၊ ဒဳဇြေမ်ဗာ (၂၈)
ဂိတုဒဳဇြေမ်ဗာ (၂၆) ၜိုတ် (၆) နာဍဳဗ္တံဂှ် ဂကောံဒပ်ပံၚ်ကောံစဵုဒၞါညးဍုၚ်ကွာန် လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ပလ မၞုံဍုၚ်ပလ၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ် ညးဒုၚ်တာလျိုၚ် လလောၚ်ပရိုၚ် တမ်ဒပ်လၟိဟ် (၁) ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တမ်ဒပ်လၟိဟ် (၁) ခရိုၚ်ဗိက် ကေုာံ ဂကောံဒပ်ပံၚ်ကောံ PDF ဒေသတံ အာစိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ပလ ဒၞါဲကောန်ဒပ်ကံၚ်ဇြဳပၞာန် ကေုာံ ကောန်ဂကောံဒပ်ဗၠာဲသၟိၚ် ဇြဟတ် (၂၀) ပြၚ် မမံၚ်တန်တဴဒၟံၚ်ဂှ်ရ။
ဒၟါနူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ် ဗ္ဒါဲ (၁၅) မိနေတ်တုဲ အကာဲအရာ ကောန်ဂကောံဒပ်ကံၚ်ဇြဳပၞာန်တံ ဇီုကပိုက်ချိုတ်ဂျိုၚ်ဗွဲလစှ်ေဂှ် ဆက်ဂၠိုက်ဂၠါဲဒၟံၚ်ရောၚ် သ္ဂးရ။
ညးဒုၚ်တာလျိုၚ် လလောၚ်ပရိုၚ် တမ်ဒပ်လၟိဟ် (၁) ခရိုၚ်ဗိက်ဂှ် လ္ပာ်ဗ္ဒိုပ်ဗၠာဲသၟိၚ်ပလ ဒၟါနူကော်ချဴလဝ် အခိၚ်ဟွံရုဲ သွက်ဂွံကၠုၚ်စိုပ်ဗ္တိုက်နွံဂှ်ရ အာစိုပ်ဗ္တိုက်လဝ် မရနုက်ကဵု ပန်ဝါရောၚ် ဟီုရ။
အပ္ဍဲပရေၚ်ပန်ပှော် ဗ္ဒိုပ်ဗၠာဲသၟိၚ်ဂှ် လ္ပာ်ကံၚ်ဇြဳပၞာန်တံ ကလေၚ်ပန်ပှော်လဝ် ကဵုလွဟ်ဇၞော်၊ လဟ်ဍောတ်တံကီုလေဝ် လ္ပာ်ဂကောံဒပ်ပံၚ်ကောံ စဵုဒၞါညးဍုၚ်ကွာန်တံ ဇီုကပိုက်ဒးဟွံမွဲပုဟ်ဂှ် သ္ဂးရ။
ဒၟါနူပရေၚ်ပန်ပှော် မွဲလ္ပာ်ကုမွဲလ္ပာ်တုဲ ညးဒေသတံ ၜိုန်ရအောပ်မာမံၚ်တန်တဴဒၟံၚ် ပ္ဍဲသ္ၚိတံကီုလေဝ် ပ္ဍဲဂိတုဒဳဇြေမ်ဗာ (၂၇) ဏံ တ္ၚဲဏံဂှ် အာကၠုၚ်ချဳဒရာၚ်ဒၟံၚ် အတိုၚ်သၞောတ်တြေံအိုတ်ရဂှ် ဂွံတီကေတ်ရ။
ပ္ဍဲဍုၚ်ပလဂှ် ပ္ဍဲဂိတုဒဳဇြေမ်ဗာ (၂၁) တုဲကၠုၚ်တေံလေဝ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံစဵုဒၞါညးဍုၚ်ကွာန်တံဂှ် ပေါဲဗ္တိုက်တံ က္တဵုဒှ်လဝ်တုဲ အပ္ဍဲပေါဲဗ္တိုက်ဂှ် ဟိုတ်နူလွဟ်ဇၞော် လ္ပာ်ဒပ်ကံၚ်ဇြဳပၞာန်တံ ပန်ပှော်လဝ်ဂှ်ရ ကောန်အရာပ် (၂) တၠ ချိုတ်အာတုဲ (၄) တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)