(ညောၚ်လေးပၚ်) ၊ ဂျူလာၚ် (၁၆)
ဒပ်ကံၚ်ဇြဳပၞာန်သီအဝဵုဝွံ လက္ကရဴဏံ သာတုဲလုတ်လောန်ကၠုၚ် ပြဝစွံပွန်ဗ္တိုက် ကုညးဍုၚ်ကွာန်ကောန်အရာပ်တံ နကဵုတၚ်ရန်တၟံနွံနွံရဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဗဒိုဝ်သဝ်တဝ်နဳ ဟီုရ။
ပ္ဍဲလ္ပာ်ဒေသ ဒပ်မဟာ (၁) ခရိုၚ်သဓီု၊ ဒပ်မဟာ (၆) ခရိုၚ်ဒူပလာယာ၊ ဒပ်မဟာ (၃) ခရိုၚ်(ညောၚ်လေးပၚ်) မဒှ်တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန်ဝွံ လ္တူကွာန်ရးတံဂှ် ကၠောန်သ္ပကၠုၚ် ပွမပန်ပှော် နကဵုလွဟ်လက်နက်ဇၞော်ကီု၊ စံၚ်ကွာန်တံကီု၊ လ္တူညးဍုၚ်ကွာန်ကောန်အရာပ် မဒးဂြိပ်ဒဴပါဲဒလေတ်ဒၟံၚ်တံဂှ် ပွမဗ္တိုက် နကဵုက္ၜၚ်ကျာကီု၊ ရပ်ဒက်ညးဒေသတံတုဲ ဂစိုတ်ပျဲပျာံပ္ဍဵုပ္ဍိုက်ကၠုၚ်တံ အဆက်က်ရ။
ကံၚ်ဇြဳပၞာန်ဝွံ စွံပွန် လ္တူညးဍုၚ်ကွာန်ကောန်အရာပ်တံတုဲ ဗ္တိုက်ကၠုၚ်ဂှ်ဝွံ ဒုၚ်တဲဟွံမာန်လးလးတုဲ ဆက်ဆေၚ်အာမုက်ရောၚ်ဂှ် ညးမၞုံအခေါၚ်ဟီုဂး KNU ဗဒိုဝ်သဝ်တဝ်နဳ ဟီုရ။
“နူကဵုပြဝဓဝ်ဗ္စာရဏာမၞိဟ် ဟွံမွဲဂှ် ပြဝမရုန်မဵုသ္အဵုသ္အာၚ်၊ ပြဝဒုၚ်တဲဟွံမာန်လးလးတံ သာတုဲ သ္ကာတ်မြဟ်ကၠုၚ်ရ၊ ဂၠိုၚ်ကၠုၚ်ဟီုဂှ် ဟီုဂွံရ၊ မုဒှ်ဒှ် ဟိုတ်နူကၠောန်ဒၟံၚ် ပရေၚ်ပၠန်ဂတးတုဲ အရာဟွံထေၚ်ခယျလဝ်၊ ဟွံစၟဳစလဝ်တံဂှ် ဒးဂဗမာန်ရ၊ လ္တူဏံဂှ် သ္ဇက်ဂွံဘိၚ်ဘၚ်အာ ဟွံမွဲတုဲ ဆက်ဆၚ်အာမုက်ရောၚ်” သာ်ဝွံ သ္ဂးရ။
ပ္ဍဲကဵုပွိုၚ်ဍုၚ်ကျံက်ကျဳ ကေုာံ ပွိုၚ်ဍုၚ်မုၚ် မဒှ်ဒပ်မဟာ(၃) ခရိုၚ်(ညောၚ်လေးပၚ်) KNU ဂှ် စပ္တံနူဂိတုဂျောန် (၂၅) တုဲကၠုၚ်တေံတုဲ ဒဵုကဵုအခိၚ်လၟုဟ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်လက်နက်ဇၞော်၊ ဗ္တိုက်ကဵုက္ၜၚ်ကျာ ကေုာံ ရပ်ဒက်ဂစိုတ်တံဂှ်ရ ကောန်အရာပ်ၜိုတ် (၁၅) တၠ ဟွံအောန် သီုကဵုကောန်ၚာ်သၟတ် မပါလုပ် အောန်အိုတ် လ္တူ (၉) တၠ ဟွံအောန် ဇီုကပိုက်ဂွံလဝ်ဝပ်တုဲ ညးသၟတ်ဗဒါဲ (၃၀) တၠ ဒးဒုၚ်ရပ်ဒက်ပျဲပျာံဒၟံၚ်ရ။
ဒပ်ကံၚ်ဇြဳပၞာန်ဝွံ ဒဒှ်မမှာရာသာ်ဏံဂှ် လုတ်လောန်ဒၟံၚ် ဂၠိုၚ်ၚ်ကဵုဝါ ဂွံဆဵုကေတ်တုဲ ဟိုတ်နူပွဍေံတံ ကၠောန်သာ်ဏံတုဲ ရုပ်ရဴခိုဟ်ဟ်မိုဟ်ဟ်တံဂှ် ဟွံဂွံဆဵုကေတ်မွဲသာ် ဒးဆေၚ်ဒၟံၚ်မုက်ကဵု အကာဲအရာသာတုဲ မပရေံနူဏံတံရဂှ် ဗဒိုဝ်သဝ်တဝ်နဳ သ္ဂးရ။
“မွဲတ္ၚဲတုဲ မွဲတ္ၚဲ အရာမသ္ဂောံစိုပ်တၞုၚ်ကၞောတ်ဂှ်ရ သာတုဲဗြေဝ်ကၠုၚ်ဂှ် ဂွံဆဵုကၠုၚ်ရ၊ အကာဲအရာဍေံတံ ဒုၚ်တဲမာန်ဂှ် ပဵုသ္ၚောဲကၠုၚ်ဂှ် ဂွံဆဵုကေတ်ရ၊ ကြပ်စိုပ်ဒၟံၚ် တၞုၚ်ကၞောတ်ယျ၊ ဣဏံဂှ် ဒှ်အကာဲအရာ သွက်ပိုယ်တံ သာတုဲသ္ဂောံခိုဟ်ရောၚ်ဂှ် ဂွံဆဵုကေတ်ရ” သာ်ဝွံ သ္ဂးရ။
ဟိုတ်ဒၟါနူ ပြဝဒပ်ကံၚ်ဇြဳပၞာန်တံတုဲ ညးဍုၚ်ကွာန်ပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ် ပ္ဍဲကဵုတိဍာ်အုပ်ဓုပ် KNU ဂှ် (၂) ကိုဋ်ပြၚ် နွံကၠုၚ်တုဲ ပြဟ်ဟ်ဏံဂှ် ညးဍုၚ်ကွာန်ပါဲဒဴဘဲပၞာန်တံဝွံ ဒးဆဵုဂဗဆေၚ်ဒၟံၚ်မုက်ကဵု ပြသၞာပရေၚ်ထတ်ယုက် ကေုာံ အခက်အခုဲဇွောံမစၞစ တံရဂှ် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)