ကအ်ကြိက်၊ ဒဳဇြေမ်ဗာ (၂၈)
ပ္ဍဲကအ်ကြိက် တိဍာ်ထိၚ်ဒဝ် ဒပ်မဟာ (၆) ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် တ္ၚဲဏံလေဝ် ပေါဲဗ္တိုက်ဆက်သ္ကာတ်မြဟ်ဒၟံၚ်တုဲ ဒပ်ကံၚ်ဇြဳပၞာန် စံၚ်ပလီုပလာ်လဝ် ကွာန်မွဲကွာန်ဂှ် ဂကောံဇြဟတ်ပၠန်ဂတးတံ ကေုာံ ညးဒေသတံ ဟီုကဵု ဌာန်ပရိုၚ်သြၚ်လောန်ုတိုၚ်(မ်) ရ။
ပေါဲဗ္တိုက်ကအ်ကြိက် မက္တဵုဒှ်လဝ် ပပ္တံနူဂိတုဒဳဇြေမ်ဗာ (၁၆) တုဲကၠုၚ်တေံဂှ်ဝွံ ပ္ဍဲဂိတုဒဳဇြေမ်ဗာ (၂၇) တ္ၚဲဏံဂှ်လေဝ် ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ဒၟံၚ်ကရောၚ်ပၞာန် လ္ပာ်ကွာ်တၟိ ကေုာံ ကွာန်(ကော့နွဲ့) ဒေသသ္ကုတ်သၠုၚ်ကျာကအ်ကြိက်ဂှ်ရ ပေါဲဗ္တိုက်ဆေၚ်မုက် သ္ကာတ်မြဟ်လဝ် ကုဂကောံဒပ်ပံၚ်ကောံ ဒပ်ပၠန်ဂတး နူကဵု KNLA မသ္ကိုပ်သ္ကဂှ်ရ။
ပပ္တံနူအခိၚ်နူဂယး (၈) နာဍဳကဝက် တ္ၚဲဏံတုဲ ဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံတံ ပေါဲဗ္တိုက်သ္ကာတ်မြဟ်လဝ်တုဲ ဒပ်ကံၚ်ဇြဳပၞာန် ဘိုၚ်ပန်ကဵုလဝ် အရီုဗၚ်လွဟ်ဇၞော် ဟွံပိုတ်သ္ကုတ်တုဲ နကဵုက္ၜၚ်ကျာဂှ်လေဝ် ပ္ဍဲတ္ၚဲဏံ နူဂယး (၁၁) နာဍဳကဝက်ဂှ် မွဲဝါ၊ လဒေါဝ်တ္ၚဲ (၁) နာဍဳပြၚ်ဂှ် (၁) ဝါ အပံၚ်ဖအိုတ် (၂) ဝါ ပန်ပှော်လဝ်ဂှ် ညးဒေသတံ ဟီုရ။
လ္ပာ်ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်တွာ်တိုက် လၟိဟ်ဗွဲမဂၠိုၚ်ဂၠေၚ်တုဲ သီုကဵုဗ္တိုက်စကာလဝ် အရီုဗၚ်ပန်ပှော် နူကဵုက္ၜၚ်ကျာတံဂှ်တုဲ ဟိုတ်နူပန်ပှော်လဝ် သီုလ္တူညးဍုၚ်ကွာန်ဒေသတံဂှ်ရ ညးဒေသမွဲတၠ ဇီုကပိုက်ဒးလဝ်နွံတုဲ သ္ၚိမၞိဟ်ဒၟံၚ် ဗွဲမဂၠိုၚ်ဂၠေၚ်လေဝ် ဒးအာလဝ်လွဟ်ဇၞော်ဂှ် ဒပ်ပါ်ကျာဖျူ လၟိဟ် (၂) လလောၚ်လဝ်ပရိုၚ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန် (ကော့နွဲ့) ဂှ်ဝွံ တ္ၚဲဏံ လဒေါဝ်တ္ၚဲ ၜိုတ် (၁၂) နာဍဳ (၁၅) မိနေတ်ဂှ် စံၚ်ပလီုလဝ် ကွာန်ဂှ်တုဲ အကာဲအရာ ပၟတ်တူလီုလာ်တံဂှ် ဟွံဂွံတီကေတ် ဗွဲလစှ်ေဏီရ။
ပြဟ်ဟ်ဏံ ဒၟါနူပေါဲဗ္တိုက်ကအ်ကြိက်တုဲ ညးဍုၚ်ကွာန်ဒေသ ပွဳပွူ (၂၀၀၀) ဝွံ ဒးပါဲဒလေတ်ဒၟံၚ် ဒၞါဲဗၠးဘဲတံတုဲ နွံပၟိက်ဒၟံၚ် အရီုဗၚ်ဂမၠိုၚ်ရ။
ကံၚ်ဇြဳပၞာန် ထ္ပက်ပၞာန်သာ်ဏံတုဲ ယဝ်ရကၠောန်သ္ပကၠုၚ် အဆက်က်မ္ဂး ပေါဲဗ္တိုက်ဆေၚ်မုက်တံ သ္ဂောံက္တဵုဒှ်ကၠုၚ် ဗွဲမသ္ကာတ်မြဟ်နွံဂှ် ဂကောံဒပ်ပံၚ်ကောံတံ ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)