ဒၟါနူကံၚ်ဇြဳပၞာန်တုဲ ကမၠောန်ပရေၚ်ပိုန်ဒြပ် မကေတ်လဝ်သြန်ဂၠေံဍုၚ်သ္အာၚ်တံ ဒးဒုၚ်ပၠောပ်စရၚ်ယၟုလီုမာန်

မတ်မလီု၊ ဂျူလာၚ် (၁၆)

တိုက်သြန်ဗဟဵုကံၚ်ဇြဳပၞာန်ဂှ် နကဵုညးမမံၚ်တန်တဴ အပ္ဍဲကၟိန်ဍုၚ်တံ ပ္ဍဲအရာမကလေၚ်လေဲကဵု သီုတမ် သီုအိက် သြန်ဂၠေံ မကေတ်လဝ် နူကဵုဍုၚ်သ္အာၚ်တံဂှ် ဟိုတ်နူစၞောန်ပ္ညုၚ်ကၠုၚ် သွက်ဂွံလဇလဝ်ဂှ်ရ ကမၠောန်ပရေၚ်ပိုန်ဒြပ်တံ ဒးဒုၚ်ပၠောပ်စရၚ်ယၟုလီုမာန်ရောၚ်ဂှ် ညးလ္ၚတ်သ္ၚဳဂၠိပ်ပရေၚ်ပိုန်ဒြပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တိုက်သြန်ဗဟဵု သၟဝ်တဲကံၚ်ဇြဳပၞာန်ဝွံ သြန်ဂၠေံမကေတ်လဝ် နကဵုသြန်စက္ကူကဵုဒှ် ကပေါတ်ကညောတ်ကဵုဒှ် နူကဵုဍုၚ်သ္အာၚ်တံဂှ် ပြဟ်ဟ်ဏံ သီုအိက် သီုတမ် ညံၚ်ဟွံဂွံကလေၚ်လေဲဂှ် စၞောန်ပ္ညုၚ်လဝ် ကုတိုက်သြန်မဂွံလဝ်လာၚ်ဇြေန် AD သွက်ဂွံရေၚ်တၠုၚ်ပ္ညဳပ္ညပ် အကြာညးမဂလေံကဵု နူဍုၚ်သ္အာၚ်တံကဵု ညးမဇက်ကေတ်တံ ပ္ဍဲဂိတုဂျူလာၚ် (၁၃) တုဲကၠုၚ်တေံရ။

သြန်ဂၠေံ မကေတ်လဝ် နူကဵုဍုၚ်သ္အာၚ်တံဂှ် ပ္ဍဲအခိၚ်မကၞာတ်သမ္တီလဝ်ဂှ် ဟွံကလေၚ်လေဲမ္ဂး လ္ပာ်ကုမ္ပဏဳ ပၠောပ်ကၠုၚ်စရၚ်ယၟုလီုမာန်ရောၚ်တုဲ ဆောံလေၚ် ဓဝ်ပတှ်ေတုဲ သြန်ဂၠေံတၟိတၟိတံလေဝ် ဇက်ကေတ်မွဲဝါပၠန် ဂွံဟွံသေၚ်ရဂှ် ညးလ္ၚတ်သ္ၚဳဂၠိပ်ပရေၚ်ပိုန်ဒြပ်မွဲတၠ ဟီုရ။

“အဓိကဂှ်တှ်ေ သြန်ဂၠေံတံ မုတံဟီုဂှ် ကၠောန်ကဵုဓဝ်ပတှ်ေရ၊ တိုက်သြန်တဂှ်လေဝ် ဂလေံကဵု ကုကမၠောန်မွဲမွဲမ္ဂး သၞောတ်ဗ္ၜတ်ဍေံတံ စၟဳစၟတ် ဗီုကဵု အကာဲအရာကမၠောန်ဂှ်ကီု၊ Backgoround ကမၠောန်ဂှ်ကီု နွံဒၟံၚ်ဏောၚ်၊ ဣဏံအိုဿီု ဍေံတံ ဒးဂၞပ်တုဲ ဂလေံကဵုရ၊ လ္တူတံဏံဂှ် တိုက်သြန်ဂှ် အခိၚ်ပိုယ်တံ ဒးကလေၚ်လေဲဂှ် အခိၚ်ပေၚ်တုဲ ဟွံလေဲကဵုပုဟ်ဟီုမ္ဂး အခိၚ်ဒးပၠောပ်အိက်သြန်ဂှ် ဟွံပၠောပ်ပုဟ်ဟီုမ္ဂး ကဵုသတိဏောၚ်၊ လ္တူနူဏံဂှ် နွံဒၟံၚ်ကဵုအဆံၚ်ၚ်ဏောၚ်၊ ယဝ်ရၜက်ကၠုၚ် အဆံၚ်တံဏံမ္ဂး လက္ကရဴအိုတ် ကုမ္ပဏဳတံဂှ် အခေါၚ်ပ္တိုန် ယၟုလီု နွံရောၚ်၊ မွဲပၠန်ဂှ် လ္ပာ်မဆောံလေၚ်အာ ဓဝ်ပတှ်ေတံဂှ် သာပရေံရောၚ်၊ မုဒှ်ရောဟီုမ္ဂး သွက်ဂွံဂွံ အခေါၚ်ဂလေံမွဲဝါပၠန်ဂှ် အရာမပ္တိုန်လဝ် သွက်ဂွံဂၠေံဂှ်လေဝ် နွံတွဵုဏောၚ်၊ ရံၚ်အကာဲအရာ Project တုဲ ဣဏံအိုဿီု ဗီုဏံရဟီုမ္ဂး သ္ဇက်ဂွံထပ်ဂွံဂှ် ဟွံမွဲရပုဟ်၊ ဗီုဏံတံဂှ် ဒးလေၚ်ဟောံကျအာ သာဂၠိုၚ်ရောၚ်” သာ်ဝွံ သ္ဂးရ။

ကံၚ်ဇြဳပၞာန် စကာကဵုလဇလဝ် အခိၚ်ကာလကလေၚ်လေဲ သြန်ဂၠေံ ဍုၚ်သ္အာၚ်တံဂှ်ဝွံ ပ္ဍဲတိုက်သြန်ဗဟဵု သၟဝ်တဲကံၚ်ဇြဳပၞာန်ဂှ် ဟိုတ်နူသြန်ဍုၚ်သ္အာၚ်သှ်ေသှ်ေ အပ္ဍဲဍုၚ် အောန်ကၠုၚ်ဂှ်ရ သွက်ဂွံထိၚ်ဒက် သြန်ဍုၚ်သ္အာၚ်ဂှ် ကၠောန်သ္ပကၠုၚ်ဣရ။

ဟိုတ်နူကဵုလဇလဝ် သွက်ဂွံကလေၚ်လေဲ သြန်ဂၠေံဍုၚ်သ္အာၚ် သာ်ဏံဂှ်ဝွံ ဍာ်ဇမၠိၚ်ဂှ် နကဵုကမၠောန်ပရေၚ်ပိုန်ဒြပ် အပ္ဍဲကၟိန်ဍုၚ် မကေတ်လဝ် သြန်ဂၠေံတံဂှ် လ္တူခတှ်ဂှ် ခတှ်ထပ်ကၠုၚ်မာန်တုဲ သွက်ဂွံကလေၚ်လေဲသြန်ဂၠေံ သာတုဲဂၠိုၚ်ကၠုၚ်မာန်ဂှ် ညးလ္ၚတ်သ္ၚဳဂၠိပ် ပရေၚ်ပိုန်ဒြပ်တံ သ္ဂးအိုတ်ရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ဟိုတ်နူတၚ်နွံပၟိက် သြန်ဍုၚ်သ္အာၚ်တံတုဲ ကမၠောန်ပလံၚ်ပ္တိုန်ဗၞိက်တံဂှ် ပ္တန်ၚုဟ် ကဵုဒဝ်ဠာတုဲ ကဵုသၠာဲဂတးဒၟံၚ်ဂှ်ကီု သြန်သ္ဂောံဂွံ နူပရေၚ်သၠာဲဂတးဗၞိက်တံကီုဂှ်လေဝ် ထ္ၜးသြန်ပအပ်လဝ် တိုက်သြန်မာန်မှ ကဵုအခေါၚ်သၠာဲဂတးဗၞိက် မွဲဝါပၠန်ရောၚ်ဂှ် စၞောန်ပ္ညုၚ်လဝ်ရ။

ပရိုၚ်−သြၚ်လောန်တိုၚ်(မ်)