ဘာအၚ်၊ ဂျူလာၚ် (၁၆)
ကောန်ထံၚ်ပရေၚ်ဍုၚ်ကွာန် နူထဝါဲကဵု ဘာအၚ်တံဂှ် သၟိၚ်တၠအဝဵုထံၚ်တံ ထ္ၜးဟိုတ်နာနာတုဲ လုတ်လောန်ဒၟံၚ် ပွမၜုၚ်တက်ပျဲပျာံ အဆက်က်တံရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ကောန်ထံၚ်ပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲကဵုဂိတုဂျူလာၚ် (၁၄) ဂှ် ပ္ဍဲကဵုထံၚ်ထဝါဲ၊ ရးတၞၚ်သဳဂှ် ဟုမ်ဍာ်လဇုဲဂးတုဲ ကောန်ထံၚ်ပရေၚ်ဍုၚ်ကွာန် (၁၀) တၠဂှ် သၟိၚ်တၠအဝဵုထံၚ်တံ ၜုၚ်တက်ပျဲပျာံပ္ဍဵုပ္ဍိုက်လဝ်ရောၚ်။
ကောန်ထံၚ်ပရေၚ်ဍုၚ်ကွာန် မဒးဒုၚ်ၜုၚ်တက်ပျဲပျာံတံဝွံ ဒှ်ညးမဒးဒုၚ်ဖျေံစၟတ်လဝ်ဒဏ်ထံၚ် နကဵုၝောံပိုဒ် ၅၀၅ (က) သၞောဝ်ဥပဒေရာဇသာတ်ဇၞော်ရ။
တုဲပၠန် ကွးဘာတက္ကသိုလ်ဘာအၚ် (၉) တၠ နူကဵုထံၚ်ဘာအၚ် မဒးဒုၚ်ပဆုဲပြံၚ်လဝ် ပ္ဍဲထံၚ်သာယာဝတီ၊ ရးဒေသဇၞော်ဗဂေါဂှ်လေဝ် သၟိၚ်တၠအဝဵုထံၚ်တံ ၜုၚ်တက်ပျဲပျာံလဝ်ရောၚ်ဂှ် ဂကောံသမဂ္ဂကွးဘာတက္ကသိုလ်ဘာအၚ် လလောၚ်ပ္တိတ်လဝ်ရ။
ကုကွးဘာတက္ကသိုလ် မဒးဒုၚ်ပဆုဲပြံၚ်ထံၚ်တံဂှ် သၟိၚ်တၠအဝဵုထံၚ်တံ “ၝတံဟာ သၟာပၠန်ဂတး၊ ပရေၚ်ပၠန်ဂတး အံၚ်ဇၞးဒၟံၚ်ယျဟာ” သာ်ဝွံ ဂးတုဲ ၜုၚ်တက်ပျဲပျာံတုဲ ကၟာတ်လဝ်တိုက်ဂှ် ဂွံတီကေတ်ရ။
ကွးဘာတက္ကသိုလ်ဘာအၚ် (၉) တၠ ဒးဒုၚ်ပဆုဲပြံၚ်ထံၚ်တံဝွံ ဒးဒုၚ်ရပ်ဒက်ဟွံဗဗွဲဓဝ်တုဲ ဒှ်ညးမဒးဒုၚ်ဖျေံစၟတ်လဝ် ဒဏ်ထံၚ် (၁၂) သၞာံကဵု (၁၃) သၞာံတံတုဲ ဒးဒုၚ်ပဆုဲပြံၚ်လဝ် ထံၚ်သာယာဝတီ နကဵုတၚ်ရန်တၟံနွံနွံရောၚ်ဂှ် သမဂ္ဂကွးဘာတက္ကသိုလ်ဘာအၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)