သေန်ကာပေါဝ်၊ ဂျူလာၚ် (၁၆)
သမ္မတသဳရိလၚ်္ကာ ဂိုဝ်ဒါဗာရာ ရာဂျာပက်သာဝွံ နူကဵုမဝ်(လ်) ဒိုက်ဂှ် မွဲကဆံၚ် ကြဴနူစိုပ်သေန်ကာပေါဝ်တုဲ လလအ်ပွိုၚ်နာဍဳညိညဓဝ်ဂှ် ပ္တိုန်လဝ်လိက်နုက်တိတ်ဂှ်ရောၚ် ညးမၞုံအခေါၚ်ဟီုဂးပါလဳမာန် ဟီုဂးလဝ် ပ္ဍဲဂိတုဂျူလာၚ် (၁၄) ဂှ်ရ။
ယၚ်တၚ်လလောၚ်တြးဂှ်ဝွံ သ္ကဵုညးဍုၚ်ကွာန် မၞုံဍုၚ်ဇၞော်ကဝ်လာမ်ဗဝ် ဍုၚ်ဇၞော်ပရေၚ်ပိုန်ဒြပ်ကၟိန်ဍုၚ်တံ မိပ်မြဟ်ကၠေံ ဗွဲမလောန်ရ။
သၟတ်ဗြဴချဳဒရာၚ် ကတိုၚ်ကၟဟ်မွဲတၠဂှ် “အလုံမွဲကၟိန်ဍုၚ် တ္ၚဲဏံ ကၠောန်ဗဒှ်ပေါဲသ္အၚ်အိုတ်ဏောၚ်၊ ဣဏံဂှ် ဒှ်ပရေၚ်အံၚ်ဇၞး တဲဇၞော်ရ၊ ကၟိန်ဍုၚ်ပိုယ်တံ ကလေၚ်ဗၠးကၠုၚ် နူကဵုတဲဍေံတံရောၚ်ဂှ် မွဲလှ်ေမှ ဟွံထေၚ်လဝ်ပုဟ်” သာ်ဝွံ သ္ဂးရ။
ရာဂျာပက်သာဝွံ တ္ၚဲဗုဒ္ဓဝါဂှ် စိုပ်မဝ်(လ်) ဒိုက်တုဲ နကဵုဂၠံၚ်တရဴက္ၜၚ်ကျာ ဇြဝ်ဒဳအာရေဗဳယျာဂှ် တိတ်စ္ဍးပ္တဝ်အာက္ဍိုပ် သေန်ကာပေါဝ်ဂှ် ညးမစုက်လုက်ကဵု အကာဲအရာဏံ မွဲတၠ ဟီုဂးလဝ်ရ။
က္ၜၚ်ကျာ ဒပ်ပၞာန်သဳရိလၚ်္ကာပိုၚ် မဖ္ဍိုက်ကၠုၚ် သမ္မတဂိုဝ်ဒါဗာရာကဵု သမ္ဘာညး မွဲဖ္ဍိုက်ဂှ် အခိၚ်မစိုပ်ကၠုၚ် သွက်ဂွံပြံၚ်သၞေဟ်ဂှ် ရီုဗၚ်ရေၚ်တၠုၚ်ကဵုလဝ် အတိုၚ်ပရေၚ်ကလုတ်တမာန်ရောၚ်ဂှ် အလဵုအသဳမဝ်(လ်)ဒိုက် ဟီုဂးလဝ် ပ္ဍဲတ္ၚဲဗြဴဗ္တိဂှ်ရ။
အတိုၚ်ဂလာန် ဌာနဝန်ဇၞော်ကာဍုၚ်သ္အာၚ်သေန်ကာပေါဝ် မဟီုဂးလဝ်ဂှ်မ္ဂး ရာဂျာပက်သာဝွံ သွက်တရဴဂေတ်ဝေၚ်ပူဂဵုဂှ် လုပ်စိုပ်ကၠုၚ်လဝ် အပ္ဍဲကၟိန်ဍုၚ်တုဲ ပွမအာတ်မိက် အခေါၚ်စ္ၜုဲစ္ၜော် ဟွံသေၚ်မ္ဂး သ္ဂောံကဵုအခေါၚ် စ္ၜုဲစ္ၜော်တံဂှ် ကၠောန်သ္ပလဝ်ဟွံမွဲပုဟ်ဂှ် သ္ဂးရ။
တၚ်သ္ဂုတ်သွာတ်ရာဂျာပက်သာ သွက်ဂွံခါန်ကၞက် သ္ကိုပ်ဝန်ဇၞော်သဳရိလၚ်္ကာလၟုဟ် ရာနေ(လ်) နဒဒှ်သမ္မတယာယဳဂှ်ဝွံ သ္ကဵုအသိၚ်ပေါဲထ္ၜးဆန္ဒဂမၠိုၚ် သၠုၚ်တိုန်ကၠုၚ်ဣရ။
သၟာဒဳကွဳသၠာပိ အာယုက် (၂၉) သၞာံ မပါလုပ်လဝ် ပ္ဍဲပေါဲထ္ၜးဆန္ဒ ပါလဳမာန်မွဲတၠဂှ် “ပိုယ်တံဂှ် ကုရာနေ(လ်) ဂှ်လေဝ် မိက်ဂွံကဵုစဴသ္ၚိကီုရ၊ ဍေံတံ သွံလဝ်ဍုၚ် ကဵုညးတၞဟ်တုဲယျ၊ သွက်ဂွံလှဲပြံၚ်ကေတ် အဝဵုဏံဂှ် မၞိဟ်သာတုဲမခိုဟ်မွဲဂှ် ပိုယ်တံ နွံပၟိက်ရ၊ လုကဴဟွံဂွံဏီတှ်ေ ပရေၚ်ချဳဒရာၚ်ဏံ သ္ဂောံဒေါအ်ဒေၚ်အာ ဟွံမွဲပုဟ်” သာ်ဝွံ ဟီုဂးလဝ်ရ။
Ref: Reuters