ၜဳကလေၚ်၊ ဒဳဇြေမ်ဗာ (၃၀)
သ္ကိုပ်အုပ်ဓုပ် ကွာန်ကျာကွေန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန် ဥူသဝ်သဵုတုၚ်ဝွံ ပ္ဍဲဂိတုဒဳဇြေမ်ဗာ (၂၉) အခိၚ်နူဂယး ၜိုတ် (၇) နာဍဳ ဒးဒုၚ်ပန်လဝ်ကုသေနာတ်တုဲ ချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ကိုပ်အုပ်ဓုပ်ဥူသဝ်သဵုတုၚ် ကံၚ်ဇြဳပၞာန် ခါန်ကၞက်ပ္တိုန်လဝ်ဂှ် သၟာသေနာတ် ဟွံတီယၟုတံ စိုပ်ကၠုၚ် ကဵုကွဳလိုန်ဓာတ်တုဲ ပန်ပှော်လဝ် နကဵုသေနာတ် ပ္ဍဲဂတမုက်သ္ၚိညးရ။
ဒးဒုၚ်ပန်ကဵုသေနာတ်ဂှ်ရ သ္ကိုပ်အုပ်ဓုပ်ဥူသဝ်သဵုတုၚ်ဝွံ ပ္ဍဲက္ဍိုပ် ကေုာံ ပ္ဍဲဇကုဇကောဝ်တံဂှ် ကလိဂွံလဝ်ဝပ်သေနာတ် (၆) လစုတ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ် လွာဲဂှ်ရ။
အတိုၚ်ဂလာန်ညးဒေသတံဂှ်မ္ဂး သ္ကိုပ်အုပ်ဓုပ် ဥူသဝ်သဵုတုၚ်ဝွံ ဘပဠကောန်ကွာန်တံ၊ ပံၚ်တောဲရေၚ်တၠုၚ်ဒၟံၚ် ကုဒပ်ကံၚ်ဇြပၞာန်တံဂှ်ရ ဒှ်မၞိဟ်ယၟုမြဟ်ဒၟံၚ် နကဵုယၟုပရေံပရေံရောၚ် သ္ဂးရ။
ဒၟါနူဒးဒုၚ်ပန်ဂစိုတ်ကဵု သေနာတ်ဂှ်ရ ဒပ်ကံၚ်ဇြဳပၞာန်တံ ကၠုၚ်စိုပ်စၟဳစၟတ် သ္ကိုပ်အုပ်ဓုပ် ဥူသဝ်သဵုတုၚ် မချိုတ်အာဂှ်တုဲ ဇွဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန်ပွိုၚ်ဍုၚ်ၜဳကလေၚ်ဂှ် ဂွံတီကေတ်ရ။
ပ္ဍဲပွိုၚ်ဍုၚ်ၜဳကလေၚ်ဂှ် ကြဴနူဒပ်ပၞာန်သီအဝဵုတုဲ သ္ကိုပ်အုပ်ဓုပ် ကံၚ်ဇြဳပၞာန်တံ၊ ရဲကဵုပရိုၚ်တံ ဟွံအောန်နူကဵု (၂၀) တၠ ဒးဒုၚ်ပန်ပှော်ပသောၚ်လဝ်ရ။
ပရိုၚ်−သြၚ်လောန်တိုၚ်(မ်)