တယိတ်ချံၚ်၊ ဒဳဇြေမ်ဗာ (၃၀)
ပ္ဍဲကွာန်ဝါယျေတ်၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳ လ္တူဂၠံၚ်ကွဳစက် ပျဳထံၚ်သုဂှ် ကွဳစက်ကံၚ်ဇြဳပၞာန် ဒးဒုၚ်ဖံက်ဗ္တိုဟ်မာၚ်ဂှ်ရ ကောန်ဒပ်ကံၚ်ဇြဳပၞာန် (၆) တၠ ချိုတ်အာတုဲ မၞိဟ်ကလိဂွံဝပ်တံလေဝ် နွံဒၟံၚ်ဂှ် ညးတာလျိုၚ် ဂကောံပြုပြေၚ်ပၞာန်ဒံၚ်မေန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဒဳဇြေမ်ဗာ (၂၈) တုဲကၠုၚ်တေံ ဇိုၚ်သဝ်တ္ၚဲ (၅) နာဍဳဂှ် ဂကောံပြုပြေၚ်ပၞာန်ဒံၚ်မေန် ဗ္တိုက်ဗ္တိုဟ်လဝ်မာၚ် (၃) မ ကုကွဳစက်ပၞာန် (၃) ဖ္ဍိုက် ဇြဟတ်ဒပ် (၇၀) ပြၚ်ပါ နူလ္ပာ်ထဝါဲ မစှ်ေကၠုၚ် လ္ပာ်ပဠဝ်တံဂှ်ရ။
ဒၟါနူဒးဒုၚ်ဖံက်ဗ္တိုဟ်မာၚ်ဂှ်ရ ကွဳစက်ပၞာန်မွဲဖ္ဍိုက် ဒးအာလဝ်တုဲ ကောန်ဒပ်ကံၚ်ဇြဳပၞာန် မပါကၠုၚ် လ္တူကွဳစက်တံ (၆) တၠ ချိုတ်အာလဝ်တုဲ ဗ္ဒါဲ (၁၀) တၠ ကလိဂွံလဝ်ဝပ်ဂှ် သ္ဂးရ။
ဒၟါနူဒးဒုၚ်ဖံက်ဗ္တိုဟ်လဝ်မာၚ်ဂှ်ရ ကောန်ဂကောံဒပ်ကံၚ်ဇြဳပၞာန် မချိုတ်အာတံဂှ် စွံလဝ် ပ္ဍဲဘာဗ္တောန်လိက် ကွာန်ဝါယျေတ်တုဲ ပ္ဍဲဂိတုဒဳဇြေမ်ဗာ (၂၉) အခိၚ်ဂယးဂှ် ကၠုၚ်စိုပ်ကပှ်ဏာလဝ်ရောၚ် ညးတာလျိုၚ်ဂကောံပြုပြေၚ်ပၞာန်ဒံၚ်မေန်မွဲတၠ ဟီုရ။
ဒပ်ကံၚ်ဇြဳပၞာန် မဒးဒုၚ်ဖံက်ဗ္တိုဟ်မာၚ်ဂှ်ဝွံ ပပ္တံနူဂိတုဒဳဇြေမ်ဗာ (၂၉) ကြဴနူလုပ်စိုပ်ဂၠိုက်ဂၠါဲဗ္တးဗ္တန် အပ္ဍဲကွာန်ဝါယျေတ်တုဲဂှ် သီုကဵုပလီုပလာ်လဝ် သ္ၚိဒၟံၚ်ညးဒေသ (၇) မဂှ်လေဝ် ဂွံတီကေတ်ရ။
ပ္ဍဲပွိုၚ်ဍုၚ်တယိတ်ချံၚ်ဂှ် တုဲကၠုၚ်တ္ၚဲအကြာတံဏံလေဝ် အကြာဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်ဒေသတံ က္တဵုဒှ်လဝ် ပေါဲဗ္တိုက်တုဲ ၜါလ္ပာ်ဇီုကပိုက်ချိုတ်ဂျိုၚ်တံ နွံလဝ်ရ။
ပရိုၚ်−သြၚ်လောန်တိုၚ်(မ်)